Read tsotso MARIKO 14 Bible Online

MARIKO 14 - tsotso bible

MARIKO 14

¹Kali nikarikale matukhu kavili khutukha khu Mulukha kwa Pasaka nende Mulukha Kukhulia Mukati kwalombwa vuchila Mamela. Vasalisi vakali nende veechitsi va Malako vakhavanga khuli vanyala khukumila Yesu muvwivisi nu khumwiira.

²Vavoola, “Khuvuli khukhola khulitukhu liu Mulukha kwa Pasaka; inoho vandu vanyala khukhola shileeche.”

³Lwa Yesu yali nali mu litaala lia Betsania, mu inzu ya Simoni, wali niyalwala vuchele, niyikhale hamesa naliitsanga shiukhulia; mukhali wundi yinjilamu. Yali nachinji ichupa ya alabasita ya makura ku vukuuli vululu kalombwa khu inaridi. Yaraana shikhunikho shiu khu ichupa yeneyo, natsukha makura kenako khu murwi kwa Yesu.

⁴Valala khu vandu vali nivaliho vali nu vurima nivareevana vene khuvene, “Shichila shina yononyinyi makura ku khwivekha yaka?

⁵Kakhakuulitswi himbi tsidinari tsimia tsivaka, ma tsisenti tsiheelwi vamanani!” Khulwa yako, vakondeshela mukhali mwenoyo vululu muno.

⁶Navutswa Yesu yavavoolela, “Muleshi ave! Shichila shina mumunyashitsanga? Ukholele shikholwa shilahi muno.

⁷Matukhu koosi muvetsanga na vandu vamanani; khandi munyala khuvakhonya isaa yosi yamwenyi. Navutswa muliitsa khuvula khuvetsanga ninzi shia khase khosi.

⁸Uchelitsi khukhola kanyala, shichila uveshi mmbili kwanje makura khukulomba kwirecheshe nu kushili khuyeveelwa mu shilindwa.

⁹Muvoolelanga kilikali ndi shia havundu hosi ha valiitsa khuva nivilwatsanga Ivanjeli mu shivala, shikholwa shiu mukhali uyu akholi shilitsa khuvoolwa, khulu khwitsushitsa mukhali uyu.”

¹⁰Mulala khu veechi likhomi na vavili walaangwangwa Yuda Isikarioti yasimukha natsia khutsama Yesu khu vasalisi vakali.

¹¹Vali nu vuyaanzi vunyishi khuhulila ka yenyanga khuvoola, nivalaka khumuha tsisenti. Yuda yaraanga khukhava vwiyangu vulahi vu khutsama Yesu.

¹²Khulitukhu liu khuraanga liu Mulukha Kukhulia Mikati Chialombwa Vuchila Mamela, litukhu lia makondi ki shiukhulia shiu Mulukha kwa Pasaka kasinzwangwa, Veechi va Yesu vareeva Yesu, “Ni hena ha wenyanga khutsi khukhulombele wa khunyala khulia shiukhulia shiu Mulukha kwa Pasaka?”

¹³Nalwo lwa Yesu yaruma veechi vavili khu veechi veve na mivaalo yaka: “Simushi mutsi mu litaala likali, khandi muliitsa khwakana nu mundu nachinji matsi mushivuyi. Mumulonde

¹⁴khutukha mu inzu yayinjila, mamuvoolele mwene inzu, ‘Mwechitsi areevanga, Ni hena ha inzu ya inzi nende veechi vaanje khulia shiukhulia shiu Mulukha kwa Pasaka?’

¹⁵Naye aliitsa khumumanyinya inzu ingali yikolofa yu vwiyangu, yalombwa vulahi khandi yasiaywa, ha muliitsa khunyola nivakhulombele vindu viosi.”

¹⁶Veechi varulaho nivatsia mu litaala likali, nivanyola shia shindu shiosi khuli Yesu yali navavoolele; nivalomba shiukhulia shiu Mulukha kwa Pasaka.

¹⁷Lwa khulukolovo khwali nu khwakhatukha, Yesu yatukhaho na veechi veve likhomi na vavili.

¹⁸Lwa vali nivikhale hamesa, nivaliitsanga shiukhulia, Yesu yavoola, “Muvoolelanga kilikali ndi mulala khu munyi, nali woyo uliitsanga shiukhulia ninzi, aliitsa khunzama.”

¹⁹Veechi veve vali nilivelela mu mwoyo, nivaraanga khumureeva, shia mulala, “Anyala khuva ninzi toto?”

²⁰Yesu yavachipa, “Nu mulala khu munyi likhomi na vavili, nali woyo winikhanga mukati kwekwe mu ibakuli ninzi.

²¹Mwana wu Mundu khutukha aliitsa khukhutsa khuli Mahandiko Matakatifu kavoolanga aliitsa khukhutsa; navutswa mundu uliitsa khumutsama aliitsa khuva khu vutiinyu muno! Vwakhavele vulahi muno niiva mundu mwenoyo shiyakhavele niyivulwa tawe!”

²²Lwa vali nivaliitsanga shiukhulia, Yesu yavukula shitonye shiu mukati, nasanditsa, natong'olanyinya, naha veechi veve. Yavoola, “Vukuli, yuku nakwo mmbili kwanje.”

²³Yesu yavukula khandi shikombe shilimu ni idivai. Lwa yali niyakhasanditsa, yavaha; khandi nivang'wamu.

²⁴Yesu yavoola, “Yaka ni masahi kaanje, kasuundulwa shichila vanyishi; masahi kaanje kahambanyinyanga lilakano lia Nyasaye nende vandu veve.

²⁵Muvoolelanga kilikali ndi niitsa khuvula khung'wakhu khandi idivai yiyi nishili khung'wakhu idivai impia mu Vwami vwa Nyasaye.”

²⁶Khulwa yako, vimba lwimbo nivasimukha nivatsia khu Shikulu shia Misayituni.

²⁷Yesu yavoolela veechi veve, “Munyi voosi muliitsa khwilukha munzivale, shichila Mahandiko Matakatifu kavoolanga, ‘Nyasaye aliitsa khwiira mwayi, khandi makondi koosi nikasalane.’

²⁸Navutswa lwa mba nimali khwisimushitswa khurula mu likhutsa, natsia mu lusomo lwa Galilaya imbeli wenyu.”

²⁹Petro yavoolela Yesu, “Khali niiva voosi valiitsa khukhwivala, inzi shinyala khukhwivala tawe!”

³⁰Yesu yavoolela Petro, “Khuvoolelanga kilikali ndi itaywa nishili khulakula hali khavili vutukhu vunu, uliitsa khuvoola hali khavaka wangorwa.”

³¹Petro yakalushila khumuvoolela, “Khali niiva nyala khukhutsa nivi, shinyala khukhwambakhana tawe!” Veechi vandi voosi vavoola makhuva malala mele.

³²Yesu nende Veechi veve vasimukha nivatsia havundu halaangwangwa Getsesemani. Yesu navavoolela, “Mwikhale hanu, nishitsia khusaala.”

³³Yesu yavukula Petro, Yakobo nende Yohana halala naye. Yaraanga khunyakhana naheenda mwoyo,

³⁴navavoolela, “Mwoyo kwanje kuvelele muno, khali nakhava himbi khukhutsa. Mwikhale hanu, mutsililile khuheenza.”

³⁵Lwa Yesu yisuundakhu hambeli hatititi, yasikama hasi, nasaala ndi niiva kanyala khunyalikha avuli khunyakhana isaa yeneyo.

³⁶Yesu yasaala “Aba, Tata wanje! Shia shindu shiosi shinyala khwikholekha shichila yivi. Rulitsa shikombe shi linyakhana yishi khwinzi. Liakhava lienya lianje tawe, navutswa lienya liolio likholeshe.”

³⁷Yesu yakalukha, nanyola veechi vavaka venavo nivakonanga tsindolo. Yareeva Petro, “Simoni, ukoni tsindolo? Shiuvele waheenzakhu khali khu isaa indala yonyene tawe?”

³⁸Yesu yavavoolela, “Mutsililile khuheenza, khandi musaale ndi mulivula khukwa mu machelitso. Roho yenyanga, navutswa mmbili kuteteshele.”

³⁹Yesu yasimukha khandi natsia, navoola makhuva malala mele.

⁴⁰Khulwa yako, yakalukha khu veechi veve, nanyola vashikonanga; shivali vanyala khuteminya tawe. Vakorwa shia vanyala khumuvoolela.

⁴¹Lwa Yesu yakalukha lwa khavaka khu veechi veve, yavareeva, “Mushitsililila khukona tsindolo numuhulukha? Luvwele! Isaa yakhatukha! Loli, Mwana wu Mundu ahaanwangwa nunundi khu vandu vooni.

⁴²Sinjili, chendi khutsi. Loli, mundu unzamanga ali hanu uyu!”

⁴³Yesu yali nashilomolomanga, lwa Yuda, mulala khu veechi likhomi na vavili yatukhaho. Yuda yali ni shituma shia vandu niviyavaale vivavi nende vikong'o, va vasalisi vakali, veechitsi va Malako nende vasakhulu vali nivarumi.

⁴⁴Yuda yali usimi shituma shia vandu khandi uvavoolele: “Mundu wanzunzunakhu neye wa mwenyanga. Mukumili khandi mumurulitsiho nu vulindi vukali.”

⁴⁵Lwa Yuda yatukhaho vwangu, yasimukha natsia vulunji khu Yesu navoola, “Mwechitsi!” Manamutsunzuna.

⁴⁶Khulwa yako, vakumila Yesu ni vahaanda khuye ni tsingulu.

⁴⁷Navutswa mulala khu vandu vali nivasinjileho yasomola shivavi shieshie nareema shiroyi shiu murukwa wu Mukali wa vasalisi voosi.

⁴⁸Yesu yareeva shituma shia vandu, “Shikenyeshenje mwitsi ni vivavi nende vikong'o khungumila, khuli mundu munuuli tawe?

⁴⁹Shia litukhu namwechitsanga mu Litempeli, numuvula khungumila. Navutswa Mahandiko Matakatifu khutukha karweshitswi.”

⁵⁰Navutswa veechi veve voosi vamulekha, nivilukha.

⁵¹Musatsa wundi muvukha, wali niyivohi luvaala lwonyene, yalonda Yesu. Vachelitsa khumukumila,

⁵²navutswa yilukha shekenye, nalekha inguvu inyuma.

⁵³Vahila Yesu mu inzu yu Mukali wa vasalisi voosi, mwa Vasalisi vakali vandi, vasakhulu nende veechitsi va Malako vali nivakanile halala.

⁵⁴Petro yavalonda munyuma, niyinjila mu lwanyi lwi inzu yu Mukali wa vasalisi voosi. Yikhalaho niyora mulilu na vasikali valindaho.

⁵⁵Vasalisi vakali nende vandu vi Shikhaalo shiosi vachelitsa khukhava vushiahidi khulondokhana khu Yesu khu vamwiiri, navutswa shivavunyola tawe.

⁵⁶Vashiahidi vanyishi vakaatila Yesu, navutswa makhuva kavo ka vavoolanga shikatsianakana tawe.

⁵⁷Vandu valala vasinjila nivakaata Yesu nivavoola,

⁵⁸“Khwahulila navoolanga, ‘Niitsa khupomolanyinya Litempeli lia vandu vumbakha, khandi matukhu kavaka nikakhavira, niitsa khumbakha Litempeli lindi lia vandu vakhanyala khumbakha tawe?’ ”

⁵⁹Khali ndio, makhuva kavo ka vavoola shikatsianakana tawe.

⁶⁰Mukali wa vasalisi voosi yasinjila imbeli wi Shikhaalo shiosi, nareeva Yesu, “Uvulakhu lichipu liosi liu nyala khuvaha khulondokhana khu ka vavoola khu yivi? Ni vindu shina vichilanga vandu yava nivakhuyaala?”

⁶¹Navutswa Yesu yahonjela vuchila khuvoolakhu shindu shiosi. Mukali wa vasalisi voosi yamureeva khandi, “Nivi Masiha, Mwana wa Nyasaye wu Vukhumi?”

⁶²Yesu yachipa, “Ninzi ye; khandi muliitsa khulola Mwana wu Mundu niyikhale khuluveka lu mukhono musatsa kwa Nyasaye, niyitsanga khuvirila khu malesi.”

⁶³Mukali wa vasalisi voosi yarandula ikaanzu yeye navoola, “Shichila shina khutsililile khwenya vashiahidi vandi vanyishi!

⁶⁴Mumali khuhulila khuli anyekanga Nyasaye. Ni shina shia muviritsanga khumukhola?” Voosi vaviritsa nivavoola ndi khutukha yiirwi.

⁶⁵Valala khuvo varaanga khusutsila Yesu maree, nivamuvoha mu tsimoni khandi nivamutuuya nivavoola, “Khuprofetele mundu ukhutuuyi!” Khali valindi valindaho vamuvukula, nivamusamula tsikhovi.

⁶⁶Petro yali nashikhale ilwanyi mu lwanyi, lwa mulala khu varumishi vi shikhana vu Mukali wa vasalisi voosi yatukhaho.

⁶⁷Lwa yalola Petro niyoranga mulilu, yamuheenza vululu; namuvoolela, “Khali yivi uvele na Yesu wa Nazareti.”

⁶⁸Navutswa Petro yambakhana navoola, “Shimanyikhu ka ulomolomanga khulondokhanakhu, khali shimbulilanga tawe.” Petro yarula natsia mu shilivwa. Ma hene yaho, itaywa nilakula.[12]

⁶⁹Murumishi wi shikhana mwenoyo yalola khandi Petro, naraanga khuvoolela khandi vandu vali nivasinjileho, “Mundu uyu nu mulala khuvo!”

⁷⁰Navutswa Petro yambakhana khandi. Hari hatititi, vandu vali nivasinjileho vavoolela Petro, “Ni kilikali, uli mulala khuvo, shichila uli Mugalilaya.”

⁷¹Khulwa yako, Petro yavoola, “Nzisuuhanga mbolanga kilikali! Nyasaye asalilitse niiva ngatanga! Nakorwa mundu wamulomolomanga khulondokhanakhu woyo!”

⁷²Ma hene yaho, itaywa yalakula lwa khavili, ma Petro niyitsushitsa khuli Yesu yali namuvoolele, “Itaywa nishili khulakula hali khavili, uliitsa khuvoola hali khavaka wangorwa.” Nalwo lwa Petro yaraanga khulila.