Read tsotso MARIKO 3 Bible Online

MARIKO 3 - tsotso bible

MARIKO 3

¹Yesu yinjila mu lisinagogi, mwa mundu wali niyalema mukhono yali nali.

²Vandu valala vaheenzeshitsa Yesu valole niiva alamuhonyinya khulitukhu li Lisabato, nikanyalikha vamuyaale.

³Yesu yavoolela mundu mwenoyo, “Hamba imbeli inu.”

⁴Yesu yavareeva, “Malako keru kavoolanga khukhole shina khulitukhu li Lisabato? Khukhole vindu vilahi inoho vindu vitamanu? Khuhonyinyi vulamu inoho khwiira?” Navutswa vahonjela vutswa.

⁵Yesu yaheenza muvo nu vurima navavelelela shichila vali vachinji mirwi mikali, navoolela mundu mwenoyo, “Kololoshitsa mukhono kwokwo.” Mundu mwenoyo yakukololoshitsa, nu kuhona.

⁶Vafarisayo vasimukha nivarula mu lisinagogi nivakana vwangu na vandu valala varulanga mu mukaanda kwa Herode, khandi nivaloshitsa khuli vanyala khwiira Yesu.

⁷Yesu nende veechi veve vasimukha nivatsia khu Inyanza ya Galilaya; khandi shituma shikali shia vandu nivamulonda. Vali nivaruli mu tsisomo tsia Galilaya nende Yudeya,

⁸Yerusalemi, mu lusomo lwa Idumeya, khuluveka luli ivukwi wu Muchela kwa Yorodani, mu mataala kali himbi Tiro nende Sidoni. Vandu venavo voosi vitsa khulola Yesu, shichila vali vahulila makhuva khulondokhana khu vindu via yali nakholanga.

⁹Yesu yavoolela veechi veve vamurecheshele liaro, shichila vandu vali nivamuminanga;

¹⁰yali uhonyinyi vandu vanyishi; khali yavo voosi vali nivalwala viminilitsanga nivenya khumutiilakhu.

¹¹Lwa vandu vali na matimoni muvo valolanga Yesu, vakwitsanga hasi imbeli wewe, nivalaanjilila, “Uli Mwana wa Nyasaye!”

¹²Yesu yasiomela matimoni kavuli khuvoolelakhu mundu wosi ye ni viina.

¹³Yesu yasimukha natsia khunina khu shikulu, nalaanga vandu va yenyanga, navo nivatsia khuye.

¹⁴Yesu yarovola likhomi na vavili, vayalaanga varumwa, navavoolela, “Murovole munonde; khandi niitsa khumuruma khutsia khwilwatsa;

¹⁵na munyi muliitsa khuva nu vunyali vu khukhunga matimoni.”

¹⁶Yava navo va yarovola likhomi na vavili: Simoni (Yesu yamukulikha lira Petro);

¹⁷Yakobo nende amwavo wewe Yohana, nivali vaana va Zebedayo, (Yesu yavakulikha lira Boaneregesi, kavoolanga “Vahilikananga khuli likulu)”

¹⁸Andereya, Filipu, Batsolomeyo, Matayo, Tomasi, Yakobo mwana wa Alufayo, Tatayo, Simoni wakwanilanga shivala shieshie,

¹⁹nende Yuda Isikarioti, watsama Yesu.

²⁰Nalwo lwa Yesu yasimukha natsia ingo. Shituma shikali shia vandu vitsa khandi nivakana halala, khali Yesu nende veechi veve nivavula vwiyangu vukhulia.

²¹Lwa vandu vi inzu yavo vahulila vandu nivavoolanga, Yesu ukwili mulalu, vasimukha nivatsia khumuvukula.

²²Vechitsi va Malako valala vali nivaruli Yerusalemi vavoolanga, “Belezebuli ali muye! Mukali wa matimoni neye umuheetsanga tsingulu tsiu khukakhunga.”

²³Khulwa yako, Yesu yavalaanga ha yali nali navareevela mu tsinganu: “Shetani yakhanyala ndina khukhunga Shetani weshie?

²⁴Niiva shivala shilavukhana mu vituma vikwananga viene khuviene, shivala shienesho shishinyala khuhindila tawe.

²⁵Niiva vandu vi inzu valiitsa khwavukhana mu vituma vikwananga viene khuviene, vandu vi inzu yeneyo valiitsa khuyongovela.

²⁶Khulwa yako, niiva vwami vwa Shetani vuliitsa khwavukhana mu vituma, vuliitsa khuvula khuhindila; navutswa vuliitsa khusalana nu khuvwaho.

²⁷“Mundu avulakhuho unyala khwinjila mu inzu yu mundu wi tsingulu, amunuuli vindu vievie, nakharaanji khuvoha mundu wi tsingulu mwenoyo; khwachinguli inzu yeye.”

²⁸“Muvoolelanga kilikali ndi, vandu vanyala khusemehwa khurula mu vwoni vwavo vwosi nende vindu vitamanu via vavoolanga khu Nyasaye;

²⁹navutswa mundu uvoolanga shindu shitamanu khu Roho Mutakatifu, aliitsa khuvula khusemehwa; shichila nu vwoni vunyala khuvula khusemehwa”

³⁰Yesu yavoola ndio, shichila vandu valala vavoolanga, “Litimoni lili muye.”

³¹Mama wa Yesu nende vaana vanga Yesu vatukhaho. Vasinjila ilwanyi wi inzu, nivarumana likhuva venyanga khulola Yesu.

³²Vandu vali nivikhale himbi khu Yesu vamuvoolela, “Lola, mama wowo, vamwavo vovo, nende vambotso vovo vali ilwanyi, khandi venyanga khukhulola.”

³³Yesu yavareeva, “Ni viina mama wanje? Ni vanga viina vaana veru?”

³⁴Yaheenza mu vandu vali nivikhale himbi khuye, navoola, “Loli! Woyo neye mama wanje nende vamwavo vaanje!

³⁵Mundu wu kholanga lienya lia Nyasaye neye amwavo wanje, mbotso wanje, nende mama wanje.”