Read tsotso MARIKO 8 Bible Online

MARIKO 8 - tsotso bible

MARIKO 8

¹Mumatukhu kenako, shituma shindi shikali shia vandu vakanila halala. Lwa vandu vali nivavula shiukhulia, Yesu yalaanga halala veechi veve havundu ha yali nali, navavoolela,

²“Mbelele vandu yava; shichila vamali khuva ninzi khumatukhu kavaka khandi vavula shia valia.

³Niiva nyala khuvaseevula vatsi ingo nivali ni inzala, vanyala khuhundushila khunjila nivatsitsanga, shichila vandu valala khuvo varulanga ihale wene.”

⁴Veechi veve vamureeva, “Ni hena mu shiangalangwi yumu wa mundu anyala khunyola shiukhulia shitukha vandu yava voosi?”

⁵Yesu yavareeva, “Muli ni mikati chianga?” Vamuchipa nivavoola, “Mikati saba.”

⁶Khulwa yako, Yesu yavoolela shituma shia vandu vikhale hasi. Yavukula mikati saba, nasanditsa Nyasaye, natong'olanyinya, naha veechi veve vakavulili vandu; ma veechi veve nivakavulila vandu.

⁷Vali ni tsisutsi tsindititi khandi. Yesu yasanditsa shichila tsisutsi naha veechi va vakavulili khandi.

⁸Vandu voosi valia nivikura. Veechi veve vavunjelitsa mihinda saba chia matonye ki shiukhulia kali nikarikale.

⁹Vandu voosi valia vali tsiheelefu tsine. Ma Yesu naseevula vandu khutsia.

¹⁰Yinjila mu liaro na veechi veve vwangu natsia mu lusomo lwa Dalamanutsa.

¹¹Vafarisayo valala vatsia khu Yesu nivaraanga khumuhangalitsa mulilomoloma. Venyanga khumureeka. Khulwa yako, vamureeva avakholele shiloleshitsu khurula mwikulu.

¹²Navutswa Yesu yirulila muno mu mwoyo navoola, “Shichila shina vandu va matukhu kanu vareevanga shiloleshitsu? Muvoolelanga kilikali ndi valiitsa khuvula khuheelwakhu shiloleshitsu shiosi khuli shienesho!”

¹³Yesu yavalekha, niyinjila mu liaro niyambukha natsia khuluveka lundi lwi inyanza.

¹⁴Veechi va Yesu vali vayivilila khuchinga mikati chivatukha; navutswa vali nivachinji mukati mulala kwonyene mu liaro.

¹⁵Yesu yavachelihitsa navoola, “Muve vacheli khu mamela ka Vafarisayo nende ka Herode.”

¹⁶Veechi varaanga khureevana vene khuvene, nivavoola, “Avoolanga ndio shichila khuvula mukati.”

¹⁷Yesu yamanya ka vali nivavoolanga, navareeva, “Shichila shina mureevananga vene khuvene muvula mukati? Mushili khulola inoho khuhulilakhu? Tsinganakani tsienyu tsiasuluhala?

¹⁸Lwa muli ni tsimoni, mwa yambakhana khulola? Lwa muli na maroyi, mwayambakhana khuhulila? Mushili khwitsushitsakhu,

¹⁹lwa natong'olanyinya mikati chiranu khu vandu tsiheelefu tsiranu, mwavunjelitsa mihinda chianga nichitsuli matonye ki shiukhulia kali nikarikale?” Vamuchipa, “Likhomi na chivili.”

²⁰Yesu yavareeva khandi, “Lwa natong'olanyinya mikati saba khu vandu tsiheelefu tsine, mwavunjelitsa mihinda chianga nichitsuli matonye ki shiukhulia kali nikarikale?” Vamuchipa, “Saba.”

²¹Nalwo lwa yavareeva, “Munyala khuva mushili khumanya?”

²²Vatukha mu litaala lia Betsesaida; ma vandu vandi nivalerela Yesu mundu muvekhu nivamusaya nayaanza amutiilikhu makhono.

²³Yesu yakumila mukhono ku mundu muvekhu mwenoyo, namurulitsa mu muchitsi. Lwa yali niyakhasutsa maree mu tsimoni tsiu mundu muvekhu mwenoyo, yavikha makhono keke khuye namureeva, “Unyala khulola shindu shiosi?”

²⁴Mundu muvekhu mwenoyo yaheenza ikulu navoola, “Ndolanga vandu; navutswa vasasanga khuli misala ni chichendanga.”

²⁵Yesu yavikha makhono keke khandi mu tsimoni tsiu mundu muvekhu mwenoyo. Lwenolo, mundu muvekhu mwenoyo yalola vulahi vwene ni tsimoni tsietsie, khandi nalola shia shindu shiosi vulahi muno.

²⁶Yesu yamuseevula khutsia ingo, namuvoolela, “Lekha khukalukhakhu mu muchitsi yuku khandi.”

²⁷Yesu nende veechi veve vasimukha nivatsia mu michitsi chili himbi mu litaala lia Kaisaria Filipi. Lwa vali nivali khunjila, Yesu yareeva veechi veve, “Vandu vavoolanga ninzi viina?”

²⁸Vamuchipa, “Valala vavoolanga uli Yohana Mubatisi; vandi vavoolanga uli Eliya, navutswa valala vavoolanga uli mulala khu vaprofeti.”

²⁹Yesu yavareeva, “Na munyi muvoolanga ninzi viina?” Petro yachipa, “Uli Masiha.”

³⁰Yesu yavakaya vavuli khuvoolelakhu mundu wosi ndi ye ni Masiha.

³¹Khulwa yako, Yesu yaraanga khwechitsa veechi veve, navoola, “Mwana wu Mundu aliitsa khunyakhana muno nu khwambakhanwa na vasakhulu, vasalisi vakali, nende veechitsi va Malako. Aliitsa khwiirwa, navutswa matukhu kavaka nikakhavira, aliitsa khwisimukha khurula mu likhutsa.”

³²Yesu yavavoolela makhuva kenako havulavu. Nalwo lwa Petro yamuhila haluveka naraanga khumukondeshela.

³³Navutswa Yesu yishevukha veechi veve, nakondeshela Petro namuvoolela, “Shetani, rula khwinzi! Shichila vindu viukanakananga shivirulanga khu Nyasaye tawe; navutswa virulanga khu vandu!”

³⁴Nalwo lwa Yesu yalaanga halala shituma shia vandu nende veechi veve navavoolela, “Niiva mulala khu munyi yenyanga khunonda khutukha yileshitsi liiva lielie, achinji musalaba kwekwe shia khase khosi, anonde.

³⁵Mundu wenyanga khuhonyinya vulamu vwevwe, aliitsa khuvukoritsa; navutswa mundu wenyanga khukoritsa vulamu vwevwe shichila lira lianje nende Ivanjeli, aliitsa khuvuhonyinya.

³⁶Mundu yakhanyoli vukhala shina niiva anyala khunyola shia shindu shiosi mu shivala, navutswa akoritsi vulamu vwevwe?

³⁷Ni shindu shina shiu mundu anyala khuhaana khu anyole vulamu vwevwe khandi.

³⁸Niiva mundu anyala khulolela inzi halala na mechitso kaanje tsisoni mumatukhu kanu, ka vandu vambakhananga khuva vasuuvilwa khu Nyasaye khandi vakholanga vwoni, Mwana wu Mundu aliitsa khumulolela tsisoni khandi lwa aliitsa khukalukha mu vukhumi vwa Tata wewe, halala ni tsinjelosi tsietsie tsindakatifu.”