Read tsotso LUKA 15 Bible Online

LUKA 15 - tsotso bible

LUKA 15

¹Litukhu lindi, vasololi vu vushuru nende vooni vandi vasimukha nivatsia khuhulila Yesu nalomolomanga.

²Vafarisayo nende veechitsi va Malako varaanga khung'ung'una, nivavoola, “Mundu uyu yinjilitsanga vandu vooni, nalia navo.”

³Khulwa yako, Yesu yavavoolela lukanu yulu:

⁴“Khuvoole mulala khu munyi ali na makondi imia indala khandi akoritsi lilala khuko yakhakhola shina? Aliitsa khulekha makondi karikale makhomi tisa na tisa mulwayilu atsi khukhava likondi likori lienelo khutukha lwa aliitsa khunyola.

⁵Navutswa lwa alinyolanga, alichinganga khu maveeka keke nali nu vuyaanzi.

⁶Lwatukhanga ingo, alaanganga halala valina veve nende vareende veve, avavoolela. ‘Mwikhoye ninzi, shichila mali khunyola likondi lianje liali ni liakora.’

⁷Munjila indala yeneyo, muvoolelanga ndi khuliitsa khuva nu vuyaanzi vunyishi mwikulu, shichila mwoni mulala wikanili khuvira vandu vi likhola liu vulunji makhomi tisa na tisa vambakhananga khwikanila.

⁸“Khuvoole mukhali ali ni tsishilinji likhomi tsialombwa khu ifetsa, ma akoritsi indala khutsio, yakhakhola shina? Alahaambitsa itaaha, nu khuyenza munzu mwemwe, khukhava isenti yeneyo khutukha lwa achinyola.

⁹Lwa ava nanyoli, alalaanga halala valina veve nende vareende veve, avavoolele, ‘Mwikhoye ninzi, shichila mali khunyola isenti yanje ya mbele ningoritsi.’

¹⁰Munjila indala yeneyo, muvoolelanga ndi tsinjelosi tsia Nyasaye tsili nu vuyaanzi vunyishi shichila mundu mwoni mulala umali khwikanila.”

¹¹Yesu yatsililila khuvoola, “Litukhu lindi, khwaliho nu mundu wali na vaana vi shiyayi vavili.

¹²Mwana mushie yavoolela tata wewe, ‘Tata, mbe shitonye shianje khu miandu nunundi.’ Tata wavo yakavulila vaana veve vavili venavo miandu chiechie.

¹³Matukhu mati nikakhavira, mwana mushie yakuulitsa miandu chia yaheelwa; nahamila mu shivala shihale wene, wa yamalila tsisenti mu limenya livula vukhonyi.

¹⁴Lwa yamala shia shindu shiosi shia yali nashio, inzala yakwa mu shivala shienesho; navula khuva ni shindu shiosi.

¹⁵Khulwa yako, yasimukha natsia khuhinzilila mulala khu vandu vi shivala shienesho. Mundu mwenoyo yamuruma khutsia khukhola mihinzilu mu mulimi kwekwe khuha tsingulume tsietsie shiukhulia.

¹⁶Yikomba khulia viukhulia vi tsingulume tsialiitsakhu; navutswa mundu avulakhuho wamuheetsanga shiukhulia shialia.

¹⁷Lwa yali niyakhacheliha, yavoola, ‘Varumishi voosi va tata wanje yasamulitsa khumukholela muhinzilu vali ni viukhulia vinyishi, khali vi vakhayanga khulia, navutswa inzala yenyanga khunziirila hanu!’

¹⁸Nasimukha ngalushi khu tata wanje, muvoolele, ‘Tata wanje, kholi vwoni khu Nyasaye khandi khu yivi;

¹⁹khali shindushili khulaangwa mwana wowo tawe; khola mbe khuli mulala khu varumishi vovo va wasamulitsa.’

²⁰Yarula natsia khu tata wewe. “Navutswa lwa yali nashilikhu ihale wene khurula ingo, tata wewe yamulola. Yamulolela tsimbavasi, niyilukhaka, natsia khumukhumbelela khandi natsunzuna mwana wewe mwenoyo.

²¹Mwana mwenoyo yavoolela tata wewe, ‘Tata wanje, kholi vwoni khu Nyasaye khandi khu yivi; khali shindushili khulaangwa mwana wowo tawe.’[9]

²²Navutswa tata wu mwana mwenoyo yavoolela varumishi veve, ‘Leri vwangu inguvu indahi yene, mumufwale; mufwali ipete khu mukhono kwekwe, khandi vilaaro mu vilenje vievie.

²³Musinzili shimoli shikhomeelu, muleshe khwikhoyele mulukha kwi lilia;

²⁴shichila mwana wanje yali wakhutsa, navutswa nunundi ashili mwoyo; yali wakora, navutswa nunundi khumali khumunyola.’ Khulwa yako, varaanga khwikhoyela mulukha kwi lilia.

²⁵“Navutswa, mwana wewe mukhulundu yali nali mu mulimi. Lwa yisuunda himbi khu inzu, yahulila vandu nivimbanga nivasieva.

²⁶Yalaanga mulala khu varumishi namureeva makhuva kali nikakholekhanga.

²⁷Murumishi mwenoyo yamuchipa, ‘Amwavo wowo ukalushi ingo; ma tata wowo umusinzili shimoli shikhomeelu, shichila umunyoli nashili mwoyo khandi mulamu.’

²⁸“Navutswa mwana mukhulundu yali nu vurima vunyishi muno niyambakhana khwinjila munzu. Khulwa yako, tata wewe yarulamu namusaya nayaanza yinjilimu;

²⁹navutswa yavoolela tata wewe, ‘Lola, mihika yichi chiosi nakhukholela muhinzililu khuli murukwa; khandi shili khwambakhanakhu khulonda malako koko koosi. Ni shina shia wambakhu? Khali ushili khumbakhu imbuli, khu nzikhoye na valina vaanje.

³⁰Navutswa mwana wowo uyu wamalila miandu chiochio khu vakhali vakholanga vulaaya; navutswa lwa akalushi ingo umusinzili shimoli shikhomeelu!’

³¹Tata yachipa mwana mukhulundu, ‘Mwana wanje, shia khase khosi wumenyanga ninzi; khandi miandu chiandi nachio chiosi ni chiochio.

³²Vwali vulahi khwikhoya nukhuyaanza, shichila amwavo wowo yali wakhutsa, navutswa nunundi ashili mwoyo; yali wakora, navutswa nunundi khumali khumunyola.’ ”