Read tsotso LUKA 20 Bible Online

LUKA 20 - tsotso bible

LUKA 20

¹Litukhu lindi, lwa Yesu yali nali mu lwanyi mwi Litempeli, niyechitsanga vandu khandi niyilwatsanga Ivanjeli, vasalisi vakali nende veechitsi va malako, halala na vasakhulu, vatukhaho

²nivamureeva, “Khuvoolele, nu vunyali shina vuli navwo vuchilanga nukhola vindu yivi? Ni viina wakhuha vunyali yuvu?”

³Yesu yavachipa, “Leshi nunundi mureeve lireevo lilala; mboleli,

⁴vunyali vwa Yohana khubatisa vwarula khu Nyasaye inoho khu vandu?”

⁵Varanga khureevana vene khuvene nivavoola, “Ni shina shia khunyala khuvoola? Niiva khunyala khuvoola, ‘Khurula khu Nyasaye,’ alareeva, ‘Shichila shina numuvula khusuuvila Yohana?’

⁶Navutswa niiva khulavoola, ‘Khurula khu vandu,’ shituma shia vandu voosi vanyala khukhulesa na machina, shichila voosi vali ni lisuuvila ndi Yohana yali muprofeti.”

⁷Khulwa yako, vachipa Yesu, “Khwakorwa wi libatisa lia Yohana liarula.”

⁸Yesu yavavoolela, “Khali inzi shinyala khumuvoolela nu vunyali shina vuchilanga nikhola vindu yivi tawe.”

⁹Yesu yavoolela vandu lukanu yulu: “Litukhu lindi, khwaliho nu mundu wali niyaraaka misabibu mu mulimi kwekwe, nakukoteshitsa khu valimi vakoteshitswa valala, natsia mu luchendo khumatukhu manyishi.

¹⁰Lwa matukhu kukhuchesa matunda ki misabibu kali nikamali khutukha, yaruma murumishi khu valimi vakoteshitswa, anyole khurula khuvo shitonye shieshie shi lichesa; navutswa valimi vakoteshitswa venavo vamushuta, nivamukhunga makhono mele.

¹¹Khulwa yako, yaruma murumishi wundi; khali valimi vakoteshitswa venavo vamushuta khandi, nivamukholela tsisoni, nivamukhunga makhono mele.

¹²Yaruma murumishi wa khavaka; valimi vakoteshitswa vamusalilitsa nivamusiuva ilwanyi.

¹³Mwene mulimi kwi misabibu yireevana, ‘Ni shina shianyala khukhola? Nzitsanga khuruma mwana wanje wa nayaanza; haundi vanyala khumuhulishitsa.’

¹⁴Navutswa lwa valimi vakoteshitswa vamulola, vavoolelana vene khuvene, ‘Uyu neye mwana wu mwene mulimi kwi misabibu; chendi khumwiiri, ma miandu chiechie chiliva chieru!’

¹⁵Khulwa yako, vamusiuva ilwanyi wu mulimi kwi misabibu nivamwiira.” Yesu yavareeva, “Musuuvilanga mwene mulimi kwi misabibu anyala khukhola shina?

¹⁶Aliitsa khwitsa yiiri valimi vakoteshitswa; khandi akoteshitsi mulimi kwi misabibu kwenoko khu valimi vandi.” Lwa vandu vahulila ndio, vavoola, “Yaka kavuli khwikholekha!”

¹⁷Navutswa Yesu yavaheenza nareeva, “Mahandiko Matakatifu yaka kavoolanga shina? ‘Lichina lia vumbashi vambakhana livula vukhonyi lianyolekha khuva liu mukona khuvira machina kandi koosi.’

¹⁸Shia mundu wosi nakwa khu lichina lienelo, aliitsa khusionokhanamu khutukha akwi lukuushi; navutswa niiva lichina lienelo liliitsa khukwa khu mundu, liliitsa khumusionola akwi lukuushi.”

¹⁹Vechitsi va Malako nende vasalisi vakali vachelitsa khukumila Yesu hawenaho vwangu, shichila vali vamanyi ndi uvooli lukanu lwenolo khuvanyeka; navutswa varia vandu.

²⁰Khulwa yako, vakhava vwiyangu vu khumunyola. Vaha vandu valala asoya khwikhola khuva vatoto; nivavaruma khutsia khureeka Yesu na mareevo, vamuhaane khu vimilili nende vi tsingulu tsia Gavana wa Varoma.

²¹Vavoolela Yesu, “Mwechitsi, khumanyi ndi ka ulomolomanga khandi ka wechitsanga ni ku vulunji. Khumanyi ndi shiuwihonelanga vandu tawe; navutswa wechitsanga kilikali khulondokhana khu lienya lia Nyasaye ali nalio khu vandu.

²²Khuvoolele, malako keru kahuchililanga khurunga vushuru khu Mwami wa Roma inoho khulekha khurunga?”

²³Navutswa Yesu yalola vupele vwavo navareeva,

²⁴“Manyinyikhu isenti. Likoondo nende lira lili khu isenti yili nilia viina?” Vamuchipa, “Ni liu Mwami wa Roma.”

²⁵Khulwa yako, Yesu yavavoolela, “Nu vulahi, runji khu Mwami wa Roma viu Mwami wa Roma, ma murunji khu Nyasaye via Nyasaye.”

²⁶Vakhaywa khukumila Yesu vandu voosi nivaliho, khulondokhana khu ka yali navooli; navutswa lwa vachenyinywa ni lichipu lielie vahonjela.

²⁷Vasadukayo valala, vavoolanga ndi lisimukha lia vandu vakhutsa khurula mu likhutsa livulaho, vatsia khu Yesu,

²⁸nivavoola, “Mwechitsi, Musa yakhuhandichila lilako: ‘Niiva mundu aliitsa khukhutsa nu khulekha mukhali navutswa vuchila vaana; amwavo wewe aliitsa khuhila mukhutsakhali nu khwivula khuye vaana va amwavo wewe yali wivula.’

²⁹Litukhu lindi, khwaliho na vamwavo saba; wu khuraanga yahila mukhali, nakhutsa vuchila khwivulakhu mwana wosi;

³⁰wa khavili yahila mukhutsakhali mwenoyo;

³¹khandi wa khavaka nahila mukhutsakhali mwenoyo. Vamwavo voosi saba vahila mukhali mwenoyo, navo nivakhutsa vuchila khwivulakhu vaana.

³²Lukhumalilikha lwene, mukhutsakhali mwenoyo yakhutsa.

³³Khulwa yako, khulitukhu lia vandu valiitsa khwisimukha khurula mu likhutsa, aliitsa khuva mukhali wa viina? Shichila vamwavo voosi saba vali vamuhila khuli mukhali wavo.”

³⁴Yesu yavachipa, “Vandu vasatsa nende vakhali va matukhu kanu vahilananga;

³⁵navutswa vandu vatushili khwisimukha khurula mu likhutsa khandi valiitsa khuva mwoyo mumatukhu kaliitsa khuvaho valiitsa khuvula khuhilana.

³⁶Valiitsa khuva khuli tsinjelosi; khandi valiitsa khuvula khukhutsa. Ni vaana va Nyasaye, shichila vayisimushitswa khurula mu likhutsa.

³⁷Navutswa khulondokhana khu shisakha shiakhanga mulilu, khali Musa yamanyinya ndi vandu vakhutsa visimukhanga khurula mu likhutsa; shichila alaanganga Mwami Nyasaye, ‘Nyasaye wa Aburahamu, Nyasaye wa Isaka, khandi Nyasaye wa Yakobo.’

³⁸Ni Nyasaye wa yavo vali mwoyo, navutswa wa vandu vakhutsa tawe, shichila vandu voosi vali mwoyo shichila ye.”

³⁹Valala khu veechitsi va Malako vavoola, “Mwechitsi, uvooli lichipu lilahi.”

⁴⁰Mundu avulakhuho wachelitsa khandi khureeva Yesu mareevo.

⁴¹Navutswa Yesu yavareeva, “Vanyala ndina khuvoola Masiha aliitsa khuva mwitsukhulu wa Daudi?

⁴²Daudi mwene avoolanga mu Shitabu shi Tsitsabuli, ‘Mwami Nyasaye yavoolela Mwami wanje: Yikhala hanu khuluveka lu mukhono kwanje musatsa,

⁴³khutukha lwa khukuurila vatsiku vovo.’

⁴⁴Daudi yamulaanga ‘Mwami’; Masiha anyala khuva ndina mwitsukhulu wa Daudi?”

⁴⁵Lwa vandu voosi vali ni vamuhulishitsanga, Yesu yavoolela veechi veve,

⁴⁶“Muve vacheli shichila veechitsi va Malako, vayaanza khuchenda chenda nivifwali tsikaanzu tsiavo tsindaambi, nu khuheelwa milembe chiu luyali musokoni; khandi varovolanga visoko viu luyali mu masinagogi nende havundu halahi mu milukha;

⁴⁷vihonelanga vakhutsakhali, ni vavanuula vindu mu tsingo tsiavo; khandi vikhola vasaalanga lisaala liraambi! Valiitsa khusalilitswa vululu muno!”