Read tsotso LUKA 22 Bible Online

LUKA 22 - tsotso bible

LUKA 22

¹Litukhu liali nilili himbi khutukha liu khukhola Mulukha Kukhulia Mukati kwalombwa vuchila Mamela, kwalaangwangwa Mulukha kwa Pasaka.

²Vasalisi vakali nende veechitsi va Malako vali ni vakhavanga khuli vanyala khwiira Yesu; navutswa varia vandu.

³Khulwa yako, Shetani yinjila mu Yuda, walaangwangwa Isikarioti, wali mulala khu veechi likhomi na vavili.

⁴Yuda yasimukha natsia khulomoloma na vasalisi vakali nende vandu vasinjililanga valindi vi Litempeli makhuva khulondokhana khuli anyala khutsama Yesu khuvo.

⁵Vali nu vuyaanzi vunyishi, nivirulitsa khumurunga tsisenti.

⁶Yuda yahuchilila khukhola ndio, naraanga khukhava vwiyangu vulahi vu khutsama Yesu khuvo, vuchila shituma shia vandu khumanya ka yenyanga khukhola.

⁷Litukhu liatukha liu khukhola Mulukha Kukhulia Mikati Chialombwa Vuchila Mamela, lwa vasinzanga vimeme via makondi ku khukholela musango ku Mulukha kwa Pasaka.

⁸Yesu yaruma Petro nende Yohana, navoola, “Tsi mwirecheshitsi shiukhulia shiu Mulukha kwa Pasaka.”

⁹Vamureeva, “Ni hena ha wenyanga khutsi khwirecheshitsa?”

¹⁰Yesu yavachipa, “Lwa muliitsa khuva numwinjilanga mu litaala likali, mulavukana nu mundu nachinji matsi mushivuyi; mumulonde khutukha mu inzu yayinjila;

¹¹muvoolele mwene inzu, ‘Mwechitsi areevanga, Ni hena wa inzu ya veechi vaanje nende inzi khuliilamu shiukhulia shiu Mulukha kwa Pasaka?’

¹²Aliitsa khumumanyinya vwiyangu munzu ingali yikolofa yarecheshitswa vulahi. Murecheshitsili mwenomo.”

¹³Vasimukha nivatsia, nivanyola vindu viosi khuli Yesu yali navavoolele; nivarecheshitsa shiukhulia shiu Mulukha kwa Pasaka.

¹⁴Lwa isaa yali niyakhatukha, Yesu yikhala hamesa khulia shiukhulia na varumwa veve.

¹⁵Yesu yavavoolela, “Nayikomba muno khulia shiukhulia shiu Mulukha kwa Pasaka yishi na munyi nishili khunyakhana!

¹⁶Muvoolelanga ndi shinzitsanga khuliakhu khandi[14] Shiukhulia shia Pasaka, nikashili khurweshitswa mu Vwami vwa Nyasaye tawe.”

¹⁷Nalwo lwa Yesu yavukula shikombe shilimu ni idivai, nasanditsa Nyasaye, navoola, “Vukuli shikombe shi idivai yishi, mukavane vene khuvene.

¹⁸Muvoolelanga ndi khuraanjila nunundi shinzitsanga khung'wakhu khandi idivai yiyi, Vwami vwa Nyasaye nuvushili khwitsa tawe.” [

¹⁹Yesu yavukula shitonye shiu mukati, nasanditsa Nyasaye, natong'olanyinya, naha veechi veve, navoola, “Yuku nakwo mmbili kwanje, kwahaanwa shichila munyi; mukhole yaka khunzitsushitsa.”

²⁰Munjila indala yeneyo, nivakhalia shiukhulia shiukhumalilikha, Yesu yavukula shikombe shilimu ni idivai navoola, “Yishi ni shikombe shi lilakano liyia lia Nyasaye, liahambanyinywa na masahi kaanje, kasuundulwa shichila munyi.][15]

²¹“Navutswa, loli! Mundu unzamanga ali hanu khu imesa khuliitsanga shiukhulia naye!

²²Mwana wu Mundu atsitsanga khukhutsa khuli Nyasaye yaviritsa kalikholekha, navutswa mundu utsitsanga khumutsama ali khu vutiinyu muno!”

²³Khulwa yako, veechi varaanga khwireevana vene khuvene ni viina khuvo wali natsitsanga khukhola ndio.

²⁴Veechi va Yesu varaanga khuhangalitsana mulilomoloma vene khuvene nivareevana ni viina unyala khuva mukali muno muvo.

²⁵Yesu yavavoolela, “Vami va vandu vi tsimbia tsindi vali nu vunyali khuvo; khandi yavo vali nu vunyali khuvo vilaanganga vene ‘Valina va Vandu.’

²⁶Navutswa kenako kavuli khwikholekha mu munyi. Nikhali, mukali muno mu munyi aliitsa khuva khuli mutititi; khandi mwimilili ave khuli murumishi.

²⁷Ni viina mukali, mundu uliitsanga shiukhulia inoho mundu uhaananga shiukhulia? Toto, nu mundu uliitsanga shiukhulia. Navutswa ndi mu munyi khuli murumishi.

²⁸“Mwamenya ninzi mu matiinyu kaanje koosi.

²⁹Mukavilakhu nunundi vwami, khuli Tata wanje yangavilakhu,

³⁰khu mulilia shiukhulia khandi muling'wa hamesa hanje mu Vwami vwanje; khandi mulikhala mu visoko viu vwami numukhalachila tsimbia likhomi na tsivili tsia Israeli.

³¹“Simoni, Simoni! Hulishitsa! Shetani umali khuhuchililwa khumuchelitsa munyi voosi, khwahukhanyinya vali valahi khurula mu vatamanu, khuli mulimi yahukhanyinyanga inganu khurula mukhulio.

³²Navutswa mali khukhusaalila uvuli khuva ni lisuuvila liteteshele; khandi nu wakhakalukha khwinzi, tinyilitsa vasuuvili voshio mwoyo.”

³³Petro yavoolela Yesu, “Mwami, nzirecheshe khutsia nivi mucheela, khali khukhutsa.”

³⁴Yesu yamuvoolela, “Petro, khuvoolelanga ndi itaywa nishili khulakula vutukhu vunu ulavoola hali khavaka wangorwa.”

³⁵Nalwo lwa Yesu yareeva veechi veve, “Lwa namuruma mumatukhu kenako khutsia, vuchila shisiko shi tsisenti, musiko nende vilaaro, ni shina shia mwali nu mwacheheelwakhu?” Vachipa, “Khuvulakhu shindu shia khwacheheelwa.”

³⁶Yesu yavavoolela, “Navutswa nunundi, leshi mundu uli ni shisiko shi tsisenti inoho musiko akuvukule. Leshi khandi mundu uvula shivavi akuulitsi likoti lielie akuule shivavi.

³⁷Muvoolelanga ndi Mahandiko Matakatifu kavoolanga, ‘Yasanga mulinyakhana lia vandu vatamanu,’ khutukha karweshitswi khulondokhana khwinzi, shichila kahandikwa khulondokhana khwinzi kakwitsanga katoto.”

³⁸Veechi vavoola, “Mwami, lola! Khuli hanu ni vivavi vivili.” Yesu yachipa, “Luvwele.”

³⁹Yesu yasimukha narula mu litaala likali natsia khu Shikulu shia Misayituni khuli kwali mwiima kwekwe; ma veechi veve nivamulonda.

⁴⁰Lwa yatukha havundu henaho, yavavoolela, “Musaale muvuli khukwa mu machelitso.”

⁴¹Yesu yisuundakhu hambeli hatititi wi lichina linyala khusiuvwa khurula khuvo, nasikama hasi naraanga khusaala;

⁴²navoola, “Tata, niiva ni lienya liolio, rulitsa shikombe shi linyakhana yishi khwinzi; lia khava lienya lianje tawe; navutswa lienya liolio likholeshe.” [

⁴³Khulwa yako, injelosi yalolekha khuye khurula mwikulu nimuha tsingulu.

⁴⁴Lwa yali nanyakhananga muno, yasaala nu mwoyo kwosi; khandi tsinjeli tsietsie tsialolekha khuli masahi nikaroonyanga hasi khu malova.][16]

⁴⁵Lwa Yesu yali namali khusaala, yakalukha khu veechi veve, nanyola vakonanga tsindolo, nivavelele mu mioyo;

⁴⁶navareeva, “Shichila shina mukonanga? Vushi musindolo musaale khu muvuli khukwa mu machelitso.”

⁴⁷Yesu yali nashilomolomanga, lwa shituma shia vandu vatukhaho; vali vimililwi nu mundu walaangwangwa Yuda, mulala khu veechi likhomi na vavili. Yisuunda khu Yesu namutsunzuna khuluseye;

⁴⁸navutswa Yesu yamureeva, “Yuda, utsamanga Mwana wu Mundu numutsunzuna khuluseye?”

⁴⁹Lwa veechi va Yesu yali navo valola makhuva kali nikatsitsanga khwikholekha vareeva, “Mwami, khunyala khukwanila vivavi vieru?”

⁵⁰Mulala khuvo yareema murukwa wu Mukali wa vasalisi voosi, namukutula shiroyi shieshie shisatsa.

⁵¹Navutswa Yesu yavoola, “Luvwele!” Yatiila khu shiroyi shienesho namuhonyinya.

⁵²Khulwa yako, Yesu yavoolela vasalisi vakali nende vimilili va valindi vi Litempeli na vasakhulu vali nivatushiho khumukumila, “Shichila shina mwitsi ni vivavi nende vikong'o khungumila, khuli mundu munuuli?

⁵³Lwa navetsanga na munyi shia khase khosi mu Litempeli, shiumwangumila tawe. Navutswa isaa yenyu yu khungumila neyo yinu, lwa tsingulu tsi shisuundi tsiamihanga.”

⁵⁴Vakumila Yesu nivamurulitsaho; nivamuhila mu inzu yu Mukali wa vasalisi voosi; ma Petro navalonda ihalekhu.

⁵⁵Lwa vali nivakhahaambitsa mulilu hakari wu lwanyi khandi nivikhale halala, Petro yikhala navo.

⁵⁶Mwana wi shikhana mulala khu varumishi yamulola ha mulilu mu vulavu; yamuheenza vulunji navoola, “Mundu uyu avele na Yesu!”

⁵⁷Navutswa Petro yambakhana navoola, “Mukhali yivi, namukorwa!”

⁵⁸Hari hatititi, mundu wundi yalola Petro khandi, navoola, “Yivi khandi uli mulala khuvo.” Navutswa Petro yachipa, “Mundu yivi, shindi mulala khuvo tawe.”

⁵⁹Himbi isaa indala niyakhavira mundu wundi khandi yavoola, “Ni katoto mundu uyu yali na Yesu, shichila arulanga mu lusomo lwa Galilaya!”

⁶⁰Navutswa Petro yavoola, “Mundu yivi, shimanyi makhuva kulomolomanga tawe!” Lwa yali nashilomolomanga, itaywa yalakula vwangu.

⁶¹Mwami yishevukha naheenza Petro vulunji. Petro yitsushitsa makhuva ku Mwami yali niyamuvoolela, “Itaywa nishili khulakula nunundi, uliitsa khuvoola hali khavaka wangorwa.”

⁶²Khulwa yako, Petro yasimukha natsia ilwanyi naraanga khulila.

⁶³Vandu vali nivalindi Yesu, vamukholela shihenye henye khandi nivamushuta.

⁶⁴Vamuvoha ni shitambaya mu tsimoni tsietsie, nivamureeva, “Vuula! Ni viina ukhutuuyi!”

⁶⁵Vamunyeka manyeko manyishi lukanu.

⁶⁶Lwa vwashia mu mavwevwe, vasakhulu, vasalisi vakali, nende veechitsi va Malako vakana halala, ma Yesu nalerwa imbeli wi Shikhaalo.

⁶⁷Vamureeva, “Khuvoolele, nivi Masiha?” Yesu yavachipa, “Niiva namuvoolela, shiumunyala khusuuvila inzi tawe;

⁶⁸khandi niiva namureeva lireevo shiumunyala khunjipa tawe.

⁶⁹Navutswa khuraanjila nunundi Mwana wu Mundu aliitsa khwikhala khuluveka lu mukhono musatsa ku Mwami Nyasaye.”

⁷⁰Voosi vamureeva, “Nivi Mwana wa Nyasaye toto?” Yesu yavachipa, “Munyi vene navo vamuvoolanga ninzi ye.”

⁷¹Vareevana vene khuvene nivavoola, “Shiukhwenyi vashiahidi vandi tawe! Khutsi vene khumali khuhulila makhuva kavooli.”