Read tsotso LUKA 3 Bible Online

LUKA 3 - tsotso bible

LUKA 3

¹Kwali muhika kwi likhomi na kharanu mu vwamihi vwa Tiberio, Mwami wa Roma. Pontio Pilato neye wali gavana wu lusomo lwa Yudeya. Herode yali mwamihi wu lusomo lwa Galilaya; khandi amwavo wewe Filipu neye wali mwamihi wi tsisomo tsia Itureya nende Iturakoniti; Lusania neye wali mwamihi wa Abilene;

²mumatukhu ka Anasi nende Kayafa nivali vasalisi vakali. Likhuva lia Nyasaye liatukha khu Yohana, mwana wa Zakaria namenyi mu shiangalangwi.

³Yohana yachenda chenda shia havundu hosi mu lusomo lu Muchela kwa Yorodani, ni yilwatsanga, “Mwikanile khurula mu vwoni vwenyu mubatiswi; na Nyasaye aliitsa khumusemeha vwoni vwenyu.”

⁴Khuli kahandikwa mu shitabu shiu Muprofeti Isaya: “Mundu alaanjililanga mu shiangalangwi, navoola, ‘Lombi injila yu Mwami; Lunjishitsi injila yalondelakhu!

⁵Shia luhoongo lwosi luliitsa khwililitswa, shia rukulu nende shikulu viliitsa khulekhanyinywa. Mihanda chiashama chiliitsa khukololoshitswa, ma tsinjila tsindamanu tsililombwa vulahi.

⁶Vandu voosi valiitsa khulola vuhonyinyi vwa Nyasaye ahaananga!’ ”

⁷Vituma via vandu vatsia khulola Yohana khubatiswa. Khulwa yako, Yohana yavavoolela, “Munyi vandu vamulolekhanga khuli tsinzukha! Ni viina wamuvoolela munyala khwihonolokha khurula mulisalila lia Nyasaye ali himbi khulera?

⁸Mukhole vindu vinyala khumanyinya ndi mwayikanila khurula mu vwoni vwenyu. Muvuli khuraanga khuvoolelana vene khuvene ndi Aburahamu ni kuuka weru. Muvoolelanga kilikali ndi Nyasaye anyala khukalukhanyinya machina yaka khuva vitsukhulu va Aburahamu!

⁹Khali nunundi, ihaywa imali khurecheshitswa khureema misala khuraanjila khu miili. Shia musala kwosi kuliitsa khuvula khwama matunda malahi, kuliitsa khureemwa khandi kusiuvwi mu mulilu.”

¹⁰Vandu vareeva Yohana, “Ni shina shia khunyala khukhola?”

¹¹Yohana yavachipa, “Mundu uli ni tsinguvu tsivili khutukha akhonye mundu uvula inguvu yosi; khandi mundu uli ni shiukhulia yenyekhanga akhole malala mele.”

¹²Valala khu vasololi vu vushuru vasimukha nivatsia khu Yohana khubatiswa, nivamureeva, “Mwechitsi, ni shina shia khunyala khukhola?”

¹³Yohana yavavoolela, “Muvuli khusololakhu tsisenti tsinyishi khuvira tsia viritswa.”

¹⁴Vasikali valala vamureeva khandi, “Khali khutsi, ni shina shia khunyala khukhola?” Yohana yavachipa, “Muvuli khurumishilakhu tsingulu khunuula mundu tsisenti inoho vuvehi khuvoola shindu shitamanu shichila mundu wosi. Navutswa muhuchilile murungu kwenyu.”

¹⁵Lwa vandu vali nivalindililanga nu mwoyo kwosi, voosi varaanga khwireevana vene khuvene mu mioyo, niiva Yohana anyala khuva neye Masiha.

¹⁶Khulwa yako, Yohana yavavoolela voosi, “Mubatisanga na matsi, navutswa woyo uli nu vunyali khumbira yitsanga. Mbulakhu vunyali vukhwinama nu khumuvoholola vilaaro vievie. Neye uliitsa khumubatisa na Roho Mutakatifu nende mulilu.

¹⁷Ali nu lutelu lu khwilula mu makhono keke, khwilula imu yosi khandi khuvunjelitsa inganu mu shiachi shieshie; navutswa aliitsa khusamba ikhulio mu mulilu kukhanyala khuvula khutsima.”

¹⁸Yohana yilwatsa Ivanjeli khu vandu mu tsinjila tsindi lukanu; navavoolela vakalukhane mu liiva liavo.

¹⁹Navutswa Yohana yakondeshela mwamihi Herode, shichila yali wahila Herodiasi, wali nali mukhali wa amwavo wewe; khandi yali wakhola vindu vindi vitamanu vinyishi.

²⁰Khumeeta khu kenako, Herode yakhola shindu shitamanu, lwa yavoha Yohana mucheela.

²¹Lwa vandu voosi vali nivakhabatiswa, Yesu yabatiswa khandi. Lwa yali nasaalanga, likulu likukha,

²²ma Roho Mutakatifu niyitsa khu Yesu ni tsingulu mu likoondo khuli li shituti. Mwoyo kwarula mwikulu nu kuvoola, “Nivi Mwana wanje wa nayaanza; nyanzitswangwa nivi.”

²³Lwa Yesu yaraanga muhinzilu kwekwe, yali ni mihika himbi makhomi kavaka, mwana wa Yosefu (khuli vandu vakanakananga). Yosefu yali mwana wa Heli:

²⁴Heli yali mwana wa Matsati, mwana wa Levi; Levi yali mwana wa Meleki, mwana wa Yanai, mwana wa Yosefu;

²⁵Yosefu yali mwana wa Matatsia, mwana wa Amosi, mwana wa Nahumi, mwana wa Hesili, mwana wa Nakai,

²⁶mwana wa Mahatsi, mwana wa Matatsia, mwana wa Shemeni mwana wa Yoseki, mwana wa Yuda;

²⁷Yuda yali mwana wa Yohanani, mwana wa Resa, mwana wa Zerubabeli, mwana wa Shalitieli;

²⁸Shalatieli yali mwana wa Neli, mwana wa Meleki, mwana wa Adi, mwana wa Kosamu, mwana wa Elimotamu, mwana wa Eri;

²⁹Eri yali mwana wa Yoshwa, mwana wa Eliezeri, mwana wa Yoramu, mwana wa Matsati, mwana wa Levi;

³⁰Levi yali mwana wa Simoni, mwana wa Yuda, mwana wa Yosefu; Yosefu yali mwana wa Yonamu, mwana wa Eliakimu,

³¹mwana wa Meleha, mwana wi shiyayi wa Mena; Mena yali mwana wa Matatsia, mwana wa Natsani, mwana wa Daudi;

³²Daudi yali mwana wa Yese, mwana wa Obedi, mwana wa Boazi; Boazi yali mwana wa Salumoni, mwana wa Nahashoni,

³³mwana wa Aminadabu; Aminadabu yali mwana wa Adimini, mwana wa Arini, mwana wa Hezironi; Hezironi yali mwana wa Perezi, mwana wa Yuda,

³⁴mwana wa Isaka; Isaka yali mwana wa Aburahamu, mwana wa Tera, mwana wa Nahori;

³⁵Nahori yali mwana wa Seruki, mwana wa Rehu, mwana wa Peleki; Peleki yali mwana wa Eberi, mwana wa Shela,

³⁶mwana wa kainani; Kainani yali mwana wa Arafakisadi, mwana wa Shemu, mwana wa Nuhu; Nuhu yali mwana wa Lameki,

³⁷mwana wa Mathushela, mwana wa Enoko; Enoko yali mwana wa Yaredi, mwana wa Mahalaleli, mwana wa Kenani;

³⁸Kenani yali mwana wa Enoshi, mwana wa Setsu, mwana wa Adamu; Adamu yali mwana wa Nyasaye.