Read tsotso LUKA 5 Bible Online

LUKA 5 - tsotso bible

LUKA 5

¹Litukhu lindi, Yesu yali nasinjile khuluchinga lwi Inyanza ya Genesareti; khandi vandu vaminakana vatushi khuye vahulishitsi likhuva lia Nyasaye.

²Yesu yalola maaro kavili khundulu khwa matsi; navutswa valuvi vali varuli muko, khandi vali nivochitsanga tsineti tsiavo.

³Yesu yinjila mu liaro lilala khu maaro kali nikaliho, nilili lia Simoni, namureeva alisuundiikhu hatititi khurula khuluchinga. Yesu yikhala niyechitsa shituma shia vandu nali mu liaro lienelo.

⁴Lwa Yesu yali namali khulomoloma, yavoolela Simoni, “Sunda liaro khutukha mu luliiva lwa matsi, mulakhuli tsineti tsienyu mu matsi khu muluvi tsisutsi.”

⁵Simoni yavoola, “Muruchi, khuhinzili ni tsingulu tsinyishi vutukhu vwosi; nu khuvula khunyolakhu shindu shiosi. Navutswa nuvoolakhu shindu, nalakhula mu matsi tsineti yitsi.”

⁶Lwa vali nivakholi ndio, valuva tsisutsi tsinyishi, khali tsineti tsiavo nitsiranga khukutuukha.

⁷Valaanga valina vavo khurula mu liaro lindi, khwitsa khuvakhonya. Vitsa nivitsulitsa tsisutsi mu maaro kavili kenako, khali maaro kenako, khali nikava himbi khwiyinikha mu matsi.

⁸Navutswa lwa Simoni Petro yalola ndio, yakwa hasi hi vilenje via Yesu; navoola, “Yivi mwami, rula handi hanu; shichila ndi mundu mwoni.”

⁹Petro halala na vandi voosi vali nivali naye vali nilichenya, shichila vunyishi vwi tsisutsi tsia vali nivaluvi.

¹⁰Malala mele kikholekha khu valina va Simoni, nivali Yakobo nende Yohana, nivali vaana va Zebedayo. Yesu yavoolela Simoni, “Lekha khuria; khuraanjila nunundi, niitsa khukhwechitsa khuli uliitsa khulera vandu khwinzi.”

¹¹Lwa vali nivakhasuunda maaro kavo khuluchinga, valekha shia shindu shiosi havundu henaho, nivalonda Yesu.

¹²Lwa Yesu yali nali mu litaala lilala khu mataala kenako, mundu yitsaho niyalwala vuchele. Lwa mundu mwenoyo yalola Yesu, yasikama imbeli wewe namusaya nayaanza, “Mwami, niiva wenyanga, unyala khukhola khuva munihu.”

¹³Yesu yanyiila mukhono kwekwe khuye, manatiila khu mundu mwenoyo. Yesu yavoola, “Mbuchilile! Va munihu!” Vuchele vwarula mu mundu mwenoyo vwangu.

¹⁴Nalwo lwa Yesu yamuvoolela, “Uvuli khuvoolelakhu mundu wosi; navutswa simukha utsi vulunji khu musalisi akhukole; khandi uhaane shihanwa shiu khukholela musango kwa Musa yalaaka, khuli shimanyilu, khu vandu voosi ndi umali khuhona.”

¹⁵Navutswa makhuva khulondokhana khu Yesu katsililila khulanda shia havundu hosi, ma vituma via vandu vanyishi nivivunjelitsa halala khumuhulila nu khuhonyinywa khurula mu vulwale vwavo.

¹⁶Navutswa Yesu yarulaho natsia havundu ha vandu vavula khusaala.

¹⁷Litukhu lindi, lwa Yesu yali ni yechitsanga, Vafarisayo nende veechitsi va Malako vali nivaruli mu michitsi chili mu lusomo lwa Galilaya, khandi khurula mu lusomo lwa Yudeya nende Yerusalemi vali nivikhaleho. Tsingulu tsiu Mwami Nyasaye tsiali na Yesu khuhonyinya vandu vali nivalwala.

¹⁸Vandu valala vitsaho, nivachinjili khu shitali mundu wafwokoya; vachelitsa khumwinjilitsa munzu khutsia khumuvikha imbeli wa Yesu.

¹⁹Navutswa lwa vanyola havulakhuho havundu ha vanyala khumwishitsila, shichila shituma shia vandu, vanina ikulu khushisechese, nivikula havundu wa vamuviritsila nali khu shitali shieshie khutukha hakari hi shituma shia vandu, ha Yesu yali nali.

²⁰Lwa Yesu yalola lisuuvila lia vandu venavo vali nivali nalio, yavoola, “Mulina wanje, vwoni vwovwo vusemehelwi.”

²¹Vechitsi va Malako nende Vafarisayo varaanga khwireevana, “Uyu nu mundu shina unyekanga Nyasaye? Nyasaye wonyene neye uli nu vunyali vukhusemeha vandu khurula mu vwoni, navutswa wundi avulakhuho!”

²²Lwa Yesu yamanya ka vali nivakanakananga, yavareeva, “Shichila shina mukanakananga murio mu mioyo chienyu?

²³Nu vutoro khuvoolela mundu wafwokoya uyu, ‘Usemehwi khurula mu vwoni vwovwo,’ inoho khumuvoolela, ‘Sinjila uchende’?

²⁴Navutswa namumanyinya ndi Mwana wu Mundu ali nu vunyali khulilova khusemeha vandu khurula mu vwoni.” Khulwa yako, Yesu yavoolela mundu wafwokoya mwenoyo, “Sinjila, vukula shitali shioshio, utsi ingo!”

²⁵Nalwo lwa mundu mwenoyo yasinjila vwangu imbeli wavo voosi, navukula shitali shieshie shia yali nakonikhu, natsia ingo ni yitsominyanga Nyasaye.

²⁶Vandu voosi vali nilichenya linyishi! Varia ni vitsominya Nyasaye nivavoola, “Khuloli nunundi vindu viu khuchenyinya!”

²⁷Yaka nikamali khwikholekha, Yesu yarulaho natsia ilwanyi, nalola musololi wu vushuru walaangwangwa Levi, niyikhale mu inzu ya vasololelamu vushuru. Yesu yamuvoolela, “Nonda.”

²⁸Levi yasinjila, nalekha shia shindu shiosi, namulonda.

²⁹Khulwa yako, Levi yalombela Yesu mulukha mukali kwi lilia munzu mwemwe; khandi khwalimu na vasololi vu vushuru vanyishi nende vandu vandi mu mulukha kwi lilia kwenoko.

³⁰Valala khu Vafarisayo nende veechitsi va Malako vali nivali mu shituma shiavo, vang'ung'unila veechi va Yesu. Vareeva, “Shichila shina uliitsanga shiukhulia khandi nung'wa halala na vasololi vu vushuru nende vooni vandi?”

³¹Yesu yavachipa, “Vandu valamu shivanyala khwenya mushilishi tawe; navutswa yavo valwalanga vonyene vutswa.

³²Shinayitsa khulaanga vandu vi likhola liu vulunji tawe, navutswa vandu vooni khwikanila.”

³³Vandu valala vavoolela Yesu, “Veechi va Yohana vahonganga vuchila khulia shia khase khosi nivasaala, khandi veechi va Vafarisayo vakholanga ndio; navutswa veechi vovo valiitsanga shiukhulia nivang'wa.”

³⁴Yesu yachipa, “Mukanakananga munyala khukhola vacheni khuhonga vuchila khulia shiukhulia, musatsa uselelanga mwiiha nali navo?

³⁵Navutswa litukhu liliitsa khutukha lwa musatsa uselelanga mwiiha aliitsa khurulitswa khuvo; ma valihonga vuchila khulia mumatukhu kenako.”

³⁶Yesu yavavoolela khandi lukanu yulu: “Mundu avulakhuho urandulanga shilaka shi inguvu impia khandi anavila khu inguvu ikhulu. Niiva aliitsa khukhola ndio, aliitsa khuva narunduli inguvu impia; khandi shilaka shi inguvu impia shishinyala khuva shilala ni shi inguvu ikhulu tawe.

³⁷Mundu avulakhuho unyala khutsukha idivai impia mu maseelo makhulu ki idivai; niiva aliitsa khukhola ndio, idivai impia ilarulaka maseelo kenako idivai isuundushi; ma maseelo koneshe.

³⁸Navutswa idivai impia itsukhwangwa mu maseelo mayia!

³⁹Mundu avulakhuho wenyanga khung'wa idivai impia, namali khung'wa idivai ikhulu, shichila avoolanga, ‘Ikhulu nindahi muno.’ ”