Read tsotso LITSUSHITSWA 13 Bible Online

LITSUSHITSWA 13 - tsotso bible

LITSUSHITSWA 13

¹“Niiva muprofeti inoho mukalukhanyinyi wa malooro, anyala khulolekha mu munyi khandi amulaache khumukholela shiloleshitsu inoho shindu shiu khuchenyinya,

²ma shiloleshitsu nende shindu shiu khuchenyinya shikholeshe; naye amuvoolele, ‘Leshi khusaale nu khurumishila vanyasaye vandi’ (vanyasaye vamushili khumanyakhu),

³muvuli khuhulishitsakhu ka muprofeti inoho mukalukhanyinyi wa malooro mwenoyo aliitsa khuva navoolanga; shichila Mwami Nyasaye, uli Nyasaye wenyu achelitsanga munyi, khwenya khumanya nikava mwamuyaanza nu mwoyo kwosi nende tsingulu tsienyu tsiosi.

⁴Mwami Nyasaye, uli Nyasaye wenyu, neye wa muliitsa khulonda, khandi neye wonyene wa muliitsa khuha luyali. Mulatsililila khulonda makhuva keke nende malako keke, musaale khuye khandi muve vasuuvilwa khuye.

⁵Navutswa muprofeti inoho mukalukhanyinyi wa malooro mwenoyo aliitsa khwiirwa, shichila yachila numunyeka Mwami Nyasaye, uli Nyasaye wenyu, wamurulitsa mu shivala shia Misri, wa mwamenyanga mu vurukwa. Mundu khuli mwenoyo nu mutamanu, khandi achelitsanga khumukoyanyinya khuvula khumenya, khuli Mwami Nyasaye yamuvoolela mumenye. Muliitsa khumwiira khu vindu vitamanu vienevo viruli mu munyi.

⁶“Khali amwiru wowo inoho mwana wi shiyayi wowo inoho mwana wi shikhana wowo inoho mukhali wowo wa wayaanza inoho mulina wowo wa hahimbi, anyala khumutinyilitsa muvwivisi khusaala khu vanyasaye vandi, vanyasaye va munyi nende vakuuka venyu, vashili khusaalakhu khuvo.

⁷Mulala khu vanyasaye vavo anyala khumutinyilitsa musaale khu vanyasaye, va vandu vamumenyanga navo himbi inoho vanyasaye, va vandu vamenyanga ihale wene khurula khu munyi.

⁸Navutswa muvuli khulonda makhuva keke inoho khumuhulishitsa, inoho khumulolela tsimbavasi, inoho khumuvela tsimbavasi inoho khumulinda.

⁹Navutswa uliitsa khumwiira; nivi uliitsa khuva wu khuraanga khumulesa na machina. Numumali khukhola ndio, vandu vandi voosi valiitsa khandi khumulesa na machina.

¹⁰Muliitsa khumulesa na machina khutukha lwa aliitsa khukhutsa; shichila yachelitsa khumukoyanyinya khurula khu Mwami Nyasaye, uli Nyasaye wenyu, wamurulitsa mu shivala shia Misri, wa mwamenyanga mu vurukwa.

¹¹Nalwo lwa Vaisraeli voosi valiitsa khuhulila nu khuraanga khuria, lwa shikholwa shitamanu khuli shienesho, shilitsa khuvula khwikholekhakhu mu shivala shieru.

¹²“Lwa muliitsa khuva numumenyanga mu mataala ku Mwami Nyasaye, uli Nyasaye wenyu, amuheetsanga khumenyamu, muliitsa khuvoolelwa

¹³ndi vandu valala vatamanu mu munyi, vakoyanyinyi vandu vi litaala liavo khusaala khu vanyasaye, vamushili khumanyakhu.

¹⁴Niiva muliitsa khuhulila makhuva khuli kenako nikavoolwangwa, mukarunishitsi vulahi vwene. Niiva ni kilikali, shikholwa shitamanu khuli shienesho shiakholekha,

¹⁵muliitsa khwiira shia mundu wosi mu litaala lienelo. Muliitsa khutivitsa litaala lienelo, shia shindu shiosi mulio nende miruku chiosi chili mulio.

¹⁶Muliitsa khuvunjelitsa miandu chia vandu vi litaala lienelo, khuchira havulavu mukari mwi litaala lienelo. Numwakhakhola ndio, muliitsa khuchisambila mu litaala lienelo halala ni shia shindu shiosi shili mulio, khuli shihanwa shiu khusambwa khu Mwami Nyasaye, uli Nyasaye wenyu. Litaala lienelo liliitsa khukwa lichiinga mihika ni mihika, khandi liliitsa khulekhwa khumbakhwakhu vuyia.

¹⁷Muvuli khwivishila vindu viakhalachilwa khutivitswa, khu Mwami Nyasaye alivula khumulolela vurima; navutswa khumulolela tsimbavasi. Aliitsa khumulolela tsimbavasi, nu khumukhola mwivulane mu vunyishi, khuli yali niyalaaka aliitsa khukholela vakuuka venyu,

¹⁸niiva muliitsa khulonda nunundi malako keke kamuheele koosi, nu khukhola vikholwa vimuyaanzitsanga.