Read tsotso LITSUSHITSWA 15 Bible Online

LITSUSHITSWA 15 - tsotso bible

LITSUSHITSWA 15

¹“Shia khumuhika kwosi kwa saba kukhumalilikha, muliitsa khulekha khutaayakhu vandu vali na makoovi kenyu.

²Nindi kaliitsa khwikholekha: Shia mundu wosi uliitsa khwikopitsa tsisenti Muisraeli weshie aliitsa khuvula khumutaayakhu likoovi. Aliitsa khulekha khutsiayo khuvukula tsisenti tsienetso; shichila Mwami Nyasaye mwene waviritsa muvuli khutaaya makoovi kenako.

³Munyala khutsia khuvukula tsisenti tsienyu tsiu mundu mucheni ali natsio; navutswa muvuli khutsiakhu khuvukula tsisenti tsienyu, tsi mulala khu vandu venyu vene ali natsio.

⁴“Mwami Nyasaye, uli Nyasaye wenyu, aliitsa khumukasitsa mu shivala shia amuheetsanga munyi. Khali mundu mumanani avulakhuho, uliitsa khuva mu vandu venyu,

⁵niiva muliitsa khulonda malako keke koosi, mamuve vacheli khukhola shia shindu shiosi, shia muvoolele mukhole nunundi.

⁶Mwami Nyasaye, uli Nyasaye wenyu aliitsa khumukasitsa, khuli lwa yali niyalaaka. Muliitsa khwikopitsa vandu vi tsimbia tsinyishi tsisenti, navutswa muliitsa khuvula khusava tsisenti khali luhia lulala khu vandu vi tsimbia tsienetso. Muliitsa khwamiha vandu vi tsimbia tsinyishi, navutswa khali luhia lwosi mu vandu vi tsimbia tsienetso, luvulakhuho luliitsa khwamiha munyi.

⁷“Niiva khuliitsa khuva nu mundu mumanani mu vandu venyu, mu litaala liosi mu mataala ku mu shivala shiu Mwami Nyasaye, uli Nyasaye wenyu amuheetsanga, muvuli khuva vimani inoho khwambakhana khukhonya mundu mwenoyo.

⁸Navutswa muliitsa khumukhonya nu mwoyo mulala, khandi muhe mundu mwenoyo shia shindu shiosi shia aliitsa khuva niyenyanga.

⁹Muvuli khwambakhakhu khumuha shindu shiosi; shichila nu muhika kwa saba, nukuli muhika kukhulekha khutaaya makoovi kuli himbi khutukha. Muve vacheli inganakani indamanu yiyi khuvula khwinjilakhu mu munyi. Niiva muliitsa khwambakhana khumuhaakhu khali shindu shiosi, aliitsa khulila khu Mwami Nyasaye shichila munyi, khandi muliitsa khuva mukholi vwoni.

¹⁰Muliitsa khumuha shia yenyanga nu mwoyo mulala vuchila khumwiima. Mwami Nyasaye aliitsa khumukasitsa mu mihinzilu chienyu, khandi mu shia shindu shiosi shia mukholanga.

¹¹Vandu vamanani valiitsa khutsililila khumenya mu shivala shia mumenyamu. Khulwa yako, muvoolelanga ndi muvakhonye nu mwoyo mulala mu shivala shienyu.

¹²“Niiva Muhebrania weshie, ave mundu musatsa inoho mukhali, aliitsa khukuulitswa khu munyi, mundu mwenoyo aliitsa khumurumishila khumihika sita. Muliitsa khumulakhula khumuhika kwa saba khuva muvoholole.

¹³Lwa muliitsa khuva numumulakhuli khuva muvoholole, muvuli khumulekha khurulaho makhono makhaya.

¹⁴Muliitsa khuha mundu mwenoyo shiosi khurula khu vindu viu Mwami Nyasaye, uli Nyasaye wenyu, aliitsa khuva niyamukasitsa navio -- makondi, imu nende idivai.

¹⁵Muliitsa khwitsushitsa ndi khali munyi mwali varukwa numuli mu shivala shia Misri, khandi ndi Mwami Nyasaye, uli Nyasaye wenyu, yamukhola khuva vavoholole. Nashio shivune shichilanga nimuha lilako yili nunundi.

¹⁶“Navutswa niiva murukwa wowo aliitsa khukhuvoolela, ‘Shinyala khurula hanu tawe,’ shichila wakhuyaanza yivi nende vandu vi inzu yoyo; khandi amenyanga na munyi mu milembe,

¹⁷nalwo lwa muliitsa khuvukula shisala shiuchi, nu khumulivira mushiroyi shiu murukwa mwenoyo khuvirila mu muliango. Numumali khukhola ndio, aliitsa khuva murukwa wenyu mihika ni mihika. Muliitsa khukhola malala mele, khu varukwa venyu vakhali.

¹⁸Muvuli khulolakhu khuli nu musiko mulitoho, lwa muliitsa khuva numukholanga murukwa wenyu khuva muvoholole; shichila murungu ku muhinzilu kwa yamukholela khumihika sita ni inusu yu muhinzilu, ku mundu wa mwasamulitsa akholelanga munyi. Mwami Nyasaye, uli Nyasaye wenyu, aliitsa khumukasitsa mu shia shindu shiosi shia mukholanga.

¹⁹“Muliitsa khwahulila Mwami Nyasaye, uli Nyasaye wenyu haluveka vimoli vihuunwa viosi vi tsing'ombe tsienyu viu khuraanga khwivulwa nende vimeme via makondi viu khuraanga khwivulwa. Muvuli khurumishilakhu khali shihunwa shilala khuvio khukhola muhinzilu kwosi inoho khukhalaakakhu vwoya, khurula khu lilala khu makondi kenyu kenako.

²⁰Shia khumuhika kwosi, munyi nende vandu vi inzu yenyu muliitsa khulia vindu vienevo imbeli wu Mwami Nyasaye, uli Nyasaye wenyu havundu halala hele ha aliitsa khurovola ha valiitsa khusaala khuye.

²¹Niiva muruku kuliitsa khuva ni imbala yosi, kwafwokoya inoho kwavekhula, inoho kuli nakhavala khosi, muvuli khurumishila khukhola musango khu Mwami Nyasaye, uli Nyasaye wenyu.

²²Muliitsa khulia vene muruku kwenoko mu mataala kenyu. Shia mundu wosi khu munyi, ave mundu munihu inoho woneshe, aliitsa khulia inyama khuli muliitsanga inyama yi impoko inoho impongo.

²³Navutswa muliitsa khulekha khung'wa masahi ku muruku kwenoko. Muliitsa khukasuundula hasi khuli musuundulaho matsi.