Read tsotso LITSUSHITSWA 23 Bible Online

LITSUSHITSWA 23 - tsotso bible

LITSUSHITSWA 23

¹“Mundu musatsa wanatwa inoho wu vusatsa vwevwe vwakhalaakwa aliitsa khuvula khuvalitswa khuli mulala khu vandu vi shikhaalo shiu Mwami Nyasaye.

²“Mundu wivulwa ilwanyi inoho khali mwitsukhulu wosi wu mundu khuli mwenoyo, khali mulikhula li likhomi, aliitsa khuvula khuvalitswa khuli mulala khu vandu vali mu shikhaalo shiu Mwami Nyasaye.

³“Mundu avulakhuho, ave arulanga mu Vaamori inoho Vamoabu uliitsa khuvalitswa mu vandu vi shikhaalo shiu Mwami Nyasaye. Khali avulakhuho mulala khu vitsukhulu vavo, kave mulikhula li likhomi uliitsa khuvalitswa mu vandu vi shikhaalo shiu Mwami Nyasaye;

⁴shichila vambakhana khumuha shiukhulia nende matsi, numuli khu luchendo lwenyu lu khurula mu shivala shia Misri; khandi shichila vasamulitsa Balamu mwana wa Behori, warulanga mu litaala lia Petsori mu shivala shia Mesopotamia, khumulaama.

⁵Navutswa Mwami Nyasaye, uli Nyasaye wenyu yambakhana khuhulishitsa Balamu. Nikhali Mwami Nyasaye, uli Nyasaye wenyu yakalukhanyinya shilaamo shienesho nishilera tsikhaavi, shichila yali wamuyaanza.

⁶Muvuli khuvakhonya inoho khuvakhola khuhindahala, khumatukhu koosi ka muliitsa khuva numushili mwoyo.

⁷“Muvuli khulechelitsa Vaedomu; shichila navo viikho venyu. Muvuli khulechelitsa Vamisri, shichila mwamenyanga mu shivala shiavo khuli vandu vacheni.

⁸Vitsukhulu vavo vanyala khuvalitswa mu vandu vi shikhaalo shiu Mwami Nyasaye khuraanjila khulikhula lia khavaka nu khutsililila khumbeli.

⁹“Lwa muliitsa khuva numuli mu maheemo ka mumenyamu mumatukhu kiliihe, muliitsa khulekhana ni shindu shinyala khuchila muvuli khuva vanihu.

¹⁰Niiva mundu musatsa aliitsa khuvula khuva munihu, shichila wononyinyi viseelo lwakoni vutukhu, muliitsa khumurulitsa mu maheemo ka vasikali vamenyamu khutsia khumenya ihale wene.

¹¹Navutswa lwa khulukolovo khuliitsa khutukha, aliitsa khwisinga na matsi. Lwa liuva liliitsa khuva niliakhayeela, aliitsa khukalukha mu maheemo ka vasikali vamenyamu.

¹²“Muliitsa khurovola havundu ihale wene khurula mu maheemo ka vasikali vamenyamu ha munyala khutsitsanga numwenyi khwikhonya vene.

¹³Muliitsa khuchinganga shisala shiliitsa khuva khuli shindu shienyu shiu khurumishila, khu lwa muliitsa khuva numwakhihulila mwenyanga khwikhonya, munyala khuyeveela induhu nu khukhunikha mavi kenyu.

¹⁴Lwa Mwami Nyasaye, uli Nyasaye wenyu ali na munyi mu maheemo ka mumenyamu, khumulinda; khandi khumukuurila vatsiku venyu; khu maheemo kenyu kaliitsa khuva Havundu Hatakatifu, khu Mwami Nyasaye avuli khulola mu munyi shifwavi nu khumwilukha.

¹⁵“Niiva murukwa aliitsa khuva wayilukha khurula khu muruchi wewe, khandi wayitsa khu munyi khulindwa, muvuli khumukalushitsa khu muruchi wewe mwenoyo.

¹⁶Aliitsa khutsililila khumenya na munyi, shia havundu hosi ha yenyanga mu litaala lia mwene aliitsa khurovola. Leshi khumutambitsa.

¹⁷“Muisraeli avulakhuho, ave nu mundu musatsa inoho mukhali, uliitsa khuhuchililwa khukhola vulaaya mu litempeli.

¹⁸Tsisenti tsiosi tsiu mundu yanyola munjila khuli yu khukhola vulaaya khuli yeneyo, shitsiliitsa khuhilwa mu inzu yu Mwami Nyasaye, uli Nyasaye wenyu, khulu khurweshitsa lilaaka tawe. Mwami Nyasaye wayambakhana, mundu musatsa inoho mukhali wu kholanga vulaaya mu litempeli.

¹⁹“Muvuli khurunjitsa Muisraeli weshie vukhala, kave khu tsisenti inoho khu shiukhulia inoho khu shindu shindi shiosi shinyala khumulerela vukhala.

²⁰Munyala khukhola mundu mucheni khurunga vukhala khu shindu shia muvetsanga numumuheele, navutswa khu shindu, shia muliitsa khuva numuheele Muisraeli weshie, muvuli khumurunjitsa vukhala, khu Mwami Nyasaye, uli Nyasaye wenyu alimukasitsa mu shia shindu shiosi, shia mutsitsanga khukhola mu shivala shia mutsitsanga khumenyamu.

²¹“Lwa mwisuuhanga khu Mwami Nyasaye, uli Nyasaye wenyu, murweshitsi ka mwalaaka muliitsa khukhola; shichila ni kilikali Mwami Nyasaye, aliitsa khumukumilila khu kamwisuuha muliitsa khukhola. Muliitsa khuva numukholi vwoni, niiva muliitsa khwambakhana khurweshitsa kenako.

²²Navutswa niiva muliitsa khulekha khwisuuha, shiumuliitsa khuva mukholi vwoni tawe.

²³Shia shindu shiosi, shia muliitsa khulomoloma, mu shikhole nu mwoyo kwosi; shichila munyi vene mwirulitsa lwa mwisuuha khu Mwami Nyasaye, uli Nyasaye wenyu, mu ka vene mwavoola muliitsa khukhola.

²⁴“Niiva munyala khwinjila mu mulimi kwi misabibu ku mureende wenyu, muliitsa khulia matunda ki misabibu koosi ka mwenyi, khutukha lwa muliitsa khwikura; navutswa muvuli khuvikhakhu mu musiko kwenyu khali lilala khu matunda kenako.

²⁵Niiva munyala khwinjila mu mulimi kwi imu ku mureende wenyu, munyala khuvunga imu mu makhono kenyu; navutswa muvuli khureemakhu ni ikhoni yenyu khali imu yeye.