Read tsotso LITSUSHITSWA 27 Bible Online

LITSUSHITSWA 27 - tsotso bible

LITSUSHITSWA 27

¹Nalwo lwa Musa nende vimilili va Israeli vavoolela vandu voosi, “Mulonde malako koosi, kamuheetsanga nunundi.

²Khulitukhu lia muliitsa khwambukha Muchela kwa Yorodani, khutsia khwinjila mu shivala shiu Mwami Nyasaye, uli Nyasaye wenyu amuheetsanga, muliitsa khusinjilitsa machina makali kene khandi mukaveshe ilaanji.

³Muliitsa khuhandika khuko malako koosi, lwa muliitsa khuva numwakhambukha khutsia khwinjila mu shivala, shiu Mwami Nyasaye, uli Nyasaye wenyu amuheetsanga, shivala shi lilova lilahi khandi shinuulu, khuli Nyasaye wa vakuuka venyu yali niyalaaka aliitsa khumuha.

⁴Lwa muliitsa khuva numwakhambukha Muchela kwa Yorodani, muliitsa khusinjilitsa machina yaka khu Shikulu shia Ebali, khandi mukaveshe ilaanji, khuli muvoolele mukhole nunundi.

⁵Muliitsa khumbakhayo vwaali khurula khu machina, vuchila khurumishilakhu shivia shiosi khulomba.

⁶Muliitsa khumbakha vwaali vu Mwami Nyasaye, uli Nyasaye wenyu khurula khu machina vutswa. Muliitsa khukholelakhu Mwami Nyasaye, uli Nyasaye wenyu misango chi vihanwa viu khusambwa;

⁷khandi muliitsa khukholelayo musango kwi vihanwa viu khulera milembe, numwikhoyela Mwami Nyasaye, uli Nyasaye wenyu.

⁸Muliitsa khuhandika vulahi khu machina kenako havulavu makhuva koosi, khulondokhana khu malako ka Nyasaye.”

⁹Nalwo lwa Musa, nende vasalisi vuluhia lwa Levi, vavoolela Vaisraeli, “Munyi Vaisraeli, muhonjele mamuhulishitsi ka khuvoolanga! Mumali khukwa nunundi vandu vu Mwami Nyasaye, uli Nyasaye wenyu.

¹⁰Mulonde malako ku Mwami Nyasaye, uli Nyasaye wenyu; khandi mutsililile khulonda mivaalo keke ka muheetsanga nunundi.”

¹¹Khulitukhu lienelo, Musa yavoolela vandu,

¹²“Lwa muliitsa khuva numwakhambukha Muchela kwa Yorodani, vandu vi tsimbia tsia Israeli yitsi, valiitsa khusinjila khu Shikulu shia Gerizimu khukasitsa Vaisraeli: navo ni vandu vi tsimbia tsia Simioni, Levi, Yuda, Isakari, Yosefu nende Benyamini.

¹³Vandu vi tsimbia tsia Israeli tsindi yitsi, valiitsa khusinjila khu Shikulu shia Ebali khulaama vandu; vandu vi tsimbia tsia Rubeni, Gadi, Asheri, Zabuloni, Dani nende Nafutali.

¹⁴Vandu vuluhia lwa Levi valiitsa khulaanjila nivavoolela Vaisraeli,

¹⁵“‘Shilaamo shia Nyasaye shikwili mundu ulombanga musambwa khu lichina, musala, inoho shivia nu khuvisaala muvwivisi. Mwami Nyasaye shiyayaanza musambwa tawe.’ “Vandu voosi valiitsa khuvoola, ‘Amina!’

¹⁶“‘Shilaamo shikwili mundu wambakhananga khuha tata wewe inoho mama wewe luyali.’ “Vandu voosi valiitsa khuchipa, ‘Amina!’

¹⁷“‘Shilaamo shikwili mundu usuundanga lwakho lu mureende wewe.’ “Vandu voosi valiitsa khuchipa, ‘Amina!’

¹⁸“‘Shilaamo shikwili mundu ukoritsanga mundu muvekhu injila yu khuvirilakhu.’ “Vandu voosi valiitsa khuchipa, ‘Amina!’

¹⁹“‘Shilaamo shikwili mundu wambakhananga khukholela mucheni, vavisandu, nende vakhali vakhutsakhali katoto.’ “Vandu voosi valiitsa khuchipa, ‘Amina!’

²⁰“‘Shilaamo shikwili mundu ukonanga nu mukhali wa tata wewe yahila, shichila ukholele tata wewe tsisoni.’ “Vandu voosi valiitsa khuchipa, ‘Amina!’

²¹“‘Shilaamo shikwili mundu ukonanga nu muruku.’ “Vandu voosi valiitsa khuchipa, ‘Amina!’

²²“‘Shilaamo shikwili mundu ukonanga na mbotso wewe inoho nu mwana wi shikhana wa tata wewe yivula khu mukhali wundi.’ “Vandu voosi valiitsa khuchipa, ‘Amina!’

²³“‘Shilaamo shikwili mundu ukonanga na nakukhulu wewe.’ “Vandu voosi valiitsa khuchipa, ‘Amina!’

²⁴“‘Shilaamo shikwili mundu wiiranga mureende wewe muvwivisi.’ “Vandu voosi valiitsa khuchipa, ‘Amina!’

²⁵“‘Shilaamo shikwili mundu uhuchililanga khuheelwa asoya khusuundula shisahi shiu mundu uvula vutamanu vwosi.’ “Vandu voosi valiitsa khuchipa, ‘Amina!’

²⁶“‘Shilaamo shikwili mundu wambakhananga khulonda makhuva kahandikwa khulondokhana khu malako.’ “Vandu voosi valiitsa khuchipa, ‘Amina!’