Read tsotso LITSUSHITSWA 30 Bible Online

LITSUSHITSWA 30 - tsotso bible

LITSUSHITSWA 30

¹Musa yatsililila khuvoola, “Rovoli shia mwenyanga khu vindu vivili vili imbeli wenyu yivi, khukasitswa inoho shilaamo. Lwa vindu vienevo viosi, viliitsa khwikholekha khu munyi, khandi muve mumenyanga mu vandu vi tsimbia, tsiu Mwami Nyasaye, uli Nyasaye wenyu yamusalanyinyamu, muliitsa khwitsushitsa shia munyi vene, muliitsa khuva numurovole.

²Niiva munyi nende vitsukhulu venyu, valiitsa khukalukha khu Mwami Nyasaye, khandi mulonde malako keke, ka muheetsanga nunundi nu mwoyo kwosi,

³nalwo lwa Mwami Nyasaye, uli Nyasaye wenyu, aliitsa khumulolela tsimbavasi. Aliitsa khumulera khandi khurula mu vandu vi tsimbia tsindi tsiosi, ha yamusalanyinya. Aliitsa khumukhola khandi khuhindahala.

⁴Khali niiva muliitsa khuva nu mwasalanyinywa mu vandu vi tsimbia tsindi tsiosi tsili ihale wene, Mwami Nyasaye, uli Nyasaye wenyu aliitsa khumulera halala, nu khumukalushitsa khurulayo.

⁵Aliitsa khumulera mu shivala shiali shianga vakuuka venyu vamenyamu, mamumenyemu. Aliitsa khumukhola khuhindahala, nu khwivulana khuva vanyishi khuvira vakuuka venyu.

⁶Mwami Nyasaye aliitsa khuchila munyi, halala na vitsukhulu venyu muve nu mwoyo ku khuhulila, mumuyaanze nu mwoyo kwosi khandi ni liiva lienyu liosi, nu khutsililila khuva mwoyo.

⁷Mwami Nyasaye, uli Nyasaye wenyu aliitsa khuchila vilaamo yivi, khukwila vatsiku venyu vamuhimanga nivamutambitsa.

⁸Nalwo lwa muliitsa khulonda khandi malako ku Mwami Nyasaye, mamukhole koosi kamuvoolele nunundi.

⁹Mwami Nyasaye aliitsa khumukhola khuva vahinda, mu muhinzilu kwa mukholanga kwosi; muliitsa khwivula vaana vanyishi, khandi muve ni miruku minyishi. Muliitsa khuchesa viraakwa vinyishi khurula mu milimi chienyu. Aliitsa khusangala nu vuyaanzi muno, khulola ndi munyi muli vahinda khuli yenyanga vakuuka venyu vave vahinda,

¹⁰navutswa mumuhulishitsi khandi mulonde malako keke koosi, kahandikwa mu shitabu shia mechitso keke yishi. Muliitsa khukalukha nu mwoyo kwosi khu Mwami Nyasaye, uli Nyasaye wenyu.

¹¹“Likhuva lia muvoolelanga munyi nunundi shilinyala khumutinyila, inoho khumuvira ni tsingulu tawe.

¹²Shilili ikulu mwikulu tawe. Muvuli khureeva, ‘Ni viina unyala khutsia mwikulu khulilera hasi hanu, khu khulihulile nu khulilonda?’

¹³Inoho shilili khuluveka lundi lwi inyanza yolo tawe. Muvuli khureeva, ‘Ni viina unyala khwambukha inyanza khutsia khukhulerela hanu, khu khulihulile nu khulilonda?’

¹⁴Shikaliitsa khwikholekha kario tawe; shichila likhuva lienelo, lili hanu na munyi; mwalimanya khandi lili mu mwoyo kwenyu, mulilonde.

¹⁵“Muheetsanga nunundi shindu shia murovolakhu, hakari wu khukhola kali malahi nende vutamanu, hakari wu vulamu nende likhutsa.

¹⁶Niiva mulalonda malako ku Mwami Nyasaye, uli Nyasaye wenyu, ka muheetsanga nunundi, niiva mwamuyaanza, mumuhulile, nu khutsililila khulonda malako keke. Muliitsa khuva vandu vahinda khandi mwivulane khuva vandu vanyishi. Mwami Nyasaye, uli Nyasaye wenyu, aliitsa khumukasitsa mu shivala, shia muli himbi khutsia khumenyamu.

¹⁷Navutswa niiva muliitsa khwambakhana khukalonda, khandi muvuli khuhulishitsa, nu khusaala nu khurumishila vanyasaye vandi,

¹⁸muchelihitsanga nunundi ndi muliitsa khwiirwa. Muliitsa khuvula khumenya khumatukhu manyishi mu shivala shili injelekha wu Muchela kwa Yorodani, shia muli himbi khutsia khwinjila mumenyamu.

¹⁹Muheetsanga nunundi vindu vivili via murovolakhu, hakari wu vulamu nende likhutsa, hakari wu khukasitswa na Nyasaye nende shilaamo shia Nyasaye. Nzisuuhanga khu likulu nende lilova khuva khuli vashiahidi vaanje, vu khulola shia munyi vene murovole. Murovole vulamu, khu munyi halala na vitsukhulu venyu, mutsililile khuva mwoyo.

²⁰Muyaanze Mwami Nyasaye, uli Nyasaye wenyu, mulonde malako keke nu khuva vasuuvilwa khuye, ma munyi halala na vitsukhulu venyu mutsililile khuva mwoyo khumatukhu manyishi mu shivala, shia yali niyalaaka aliitsa khuha vakuuka venyu, Aburahamu, Isaka, nende Yakobo.”