Read tsotso LITSUSHITSWA 31 Bible Online

LITSUSHITSWA 31 - tsotso bible

LITSUSHITSWA 31

¹Musa yatsililila khulomoloma khu Vaisraeli,

²navoola, “Mali khutushitsa nunundi mihika imia indala na makhomi kavili, khandi mbula tsingulu tsiu khuva mwimilili wenyu. Khumeeta khu yaka, Mwami Nyasaye umali khumbolela ndi shinzitsanga khwambukha Muchela kwa Yorodani tawe.

³Mwami Nyasaye, uli Nyasaye wenyu mwene aliitsa khwambukha, khutsia khumwimilila imbeli wenyu, nu khutivitsa vandu vi tsimbia tsindi vamenyayo, khu muvukule shivala shiavo mumenyemu. Yoshwa aliitsa khwambukhayo imbeli wenyu, khuli Mwami Nyasaye yali niyavoola.

⁴Mwami Nyasaye aliitsa khukhola vandu venavo, khuli yakhola Mwami Sihoni nende Mwami Ogu, vamihanga Vaamori, nativitsa shivala shiavo.

⁵Mwami Nyasaye aliitsa khumuha tsingulu tsiu khukuura, mamuvakhole koosi ka navoola muvakhole.

⁶Muve ni tsingulu khandi ni ikholo indahi. Muvuli khuria inoho khukhutsa mwoyo shichila vo; Mwami Nyasaye, uli Nyasaye wenyu, aliitsa khutsia na munyi. Shialiitsa khumulekha inoho khumwivala tawe.”

⁷Nalwo lwa Musa yalaanga Yoshwa nalomoloma khuye imbeli wa Vaisraeli voosi; navoola, “Uve ni tsingulu khandi ni ikholo indahi; nivi utsitsanga khuhila vandu yava khuvukula nu khumenya mu shivala, shiu Mwami Nyasaye yalaaka aliitsa khuha vakuuka vavo. Nivi uliitsa khuchila vamenye mu shivala shienesho.

⁸Mwami Nyasaye mwene aliitsa khukhwimilila imbeli wowo. Aliitsa khuva nivi; shialiitsa khukhulekha inoho khukhwivala tawe. Lekha khuria inoho khukhutsa mwoyo.”

⁹Nalwo lwa Musa yahandika Malako ka Nyasaye naha vasalisi vuluhia lwa Levi, vasinjililanga Lisanduku li Lilakano liu Mwami Nyasaye, khandi khu vimilili voosi va Israeli.

¹⁰Musa yavavoolela, “Khulitukhu liukhumalilikha, lia shia khumihika saba, lwa muhika kwa makoovi khurulitswaho kuvetsanga nu kwakhatukha, muliitsa khusomanga malako kenako nu mwoyo mukali, lwa muvetsanga nu mwikhoyela Mulukha kwa Matiili.

¹¹Muliitsa khusomela Vaisraeli voosi lwa vitsanga khusaala khu Mwami Nyasaye, uli Nyasaye wenyu, havundu halala hele ha vasaalilanga.

¹²Uliitsa khulaanga halala vandu vasatsa voosi, vakhali, vaana, nende vandu vacheni vamenyanga mu mataala kenyu, khu mundu akahulile khandi yeche khuha Mwami Nyasaye, uli Nyasaye wenyu luyali khandi ave mucheli khulonda mechitso keke.

¹³Vaana vavo, vakorwa malako kenako, valiitsa khukahulila, ma veche khuha Mwami Nyasaye, uli Nyasaye wenyu luyali, khumatukhu koosi ka muliitsa khuva numushili mwoyo mu shivala, shia mwambukhanga Muchela kwa Yorodani khutsia khumumenyamu.”

¹⁴Mwami Nyasaye yavoolela Musa, “Litukhu liolio liu khukhutsa lili himbi khutukha. Laanga Yoshwa, ma mwinjile mu Liheemo Litakatifu, khu muhe mivaalo keke kalonda.” Musa nende Yoshwa vasimukha, nivinjila mu Liheemo Litakatifu,

¹⁵ma Mwami Nyasaye nalolekha khuvo hawenaho, khuvirila mu malesi malitoho kasinjila mu vwinjililu vwi Liheemo Litakatifu.

¹⁶Mwami Nyasaye yavoolela Musa, “Ulakhutsa vwangu yuvu, khandi lwa uliitsa khuva nu wakhutsa, vandu valiitsa khwambakhana khuva vasuuvilwa khwinzi, khandi valiitsa khumeneka lilakano lia nakhola navo. Valiitsa khunzivala vasaale khu vanyasaye va vandu vi tsimbia tsindi, vamenyanga mu shivala shia vali himbi khwinjilamu.

¹⁷Lwa kaliitsa khwikholekha, niitsa khuvalolela vurima. Niitsa khuvalekha, nu khuvativitsa. Valiitsa khuvirila mu matiinyu manyishi muno, khandi valiitsa khulola ndi vindu vienevo vikholekhanga khuvo shichila inzi, Nyasaye wavo, lwa ndi ihale wene khurula khuvo.

¹⁸Niitsa khwambakhana khuvakhonya, shichila vakholi shindu shitamanu khusaala khu vanyasaye vandi.

¹⁹“Khulwa yako, wihandichili mwene lwimbo yulu, khandi wechitsi Vaisraeli. Uliitsa khuvavoolela vimbi lwimbo lwenolo, khu luve khuli nalwo vushiahidi vwanje khulondokhana khuvo.

²⁰Niitsa khuvahila mu shivala, shi lilova lilahi khandi shinuulu nende vushi, khuli nalaaka vakuuka vavo. Valiitsa khunyolayo viukhulia viosi via venyanga, nu khumenya limenya lilahi muno. Navutswa valiitsa khunzambakhana vasaale khu vanyasaye vandi. Valiitsa khunzambakhana, nu khumeneka lilakano lianje,

²¹khandi matiinyu manyishi kaliitsa khuvanyola. Navutswa valiitsa khutsililila khwimba lwimbo yulu, khandi luliitsa khuva khuli shimanyilu khulondakhana khuvo. Khali nunundi, nishili khuvahila mu shivala shia nalaaka niitsa khuvaha, manyi makhuva ka vakanakananga.”

²²Nalwo lwa Musa yahandika lwimbo lwenolo, khulitukhu lilala lienelo, maniyechitsa Vaisraeli.

²³Mwami Nyasaye yalomoloma khu Yoshwa mwana wa Nuni; namuvoolela, “Uve ni tsingulu khandi ni ikholo indahi; shichila uliitsa khuhila Vaisraeli mu shivala, shia nalaaka niitsa khuvaha, khandi niitsa khuva nivi.”

²⁴Musa yahandika mu shitabu malako ka Nyasaye, naheenzeshitsa khuvula khwivala shindu shiosi ilwanyi.

²⁵Lwa yali niyakhamala, yavoolela vasalisi vuluhia lwa Levi, vasinjililanga Lisanduku li Lilakano liu Mwami Nyasaye,

²⁶“Vukuli shitabu shia Malako ka Nyasaye yishi, ma mushire himbi khu Lisanduku li Lilakano liu Mwami Nyasaye, uli Nyasaye wenyu, khu shiveho shia khase khosi khuli vushiahidi khulondokhana khu vandu veve.

²⁷Manyi khuli vali vahaaka khandi vahingani. Vahinganyinya Mwami Nyasaye, khumatukhu ka inzi shili mwoyo; khandi valiitsa khuva vahingani khuye khushila muno, ninakhutsa.

²⁸Laanji halala vimilili va vandu vi tsimbia tsienyu tsiosi nende varumishi vavo imbeli wanje, nikanyalikha vavoolele vindu yivi. Nzisuuhanga khu likulu nende khulilova, khuhaana vushiahidi vwanje khulondokhana khuvo.

²⁹Manyi ndi lwa niitsa khuva ninakhutsa, vandu valiitsa khukhola vindu vitamanu ma vambakhane khulonda mechitso ka naveechitsa. Lwa matukhu kaliitsa khutukha matiinyu kaliitsa khuvanyola, shichila valiitsa khuva nivalombi Mwami Nyasaye khuvalolela vurima, lwa valiitsa khuva nivakholanga vindu via yakaya.”

³⁰Musa yimba lwimbo lwosi Vaisraeli voosi nivamuhulilanga: