Read tsotso LITSUSHITSWA 33 Bible Online

LITSUSHITSWA 33 - tsotso bible

LITSUSHITSWA 33

¹Yitsi natsio tsikhaavi tsia Musa, wali mundu wa Nyasaye yasaalila Vaisraeli, lwa yali nashili khukhutsa.

²Mwami Nyasaye yarula mu Shikulu shia Sinai; yalolekha khuli liuva khu shivala shia Edomu nasashila vandu veve khurula khu Shikulu shia Parani. Yali halala ni tsinjelosi tsiheelefu likhomi, mulilu nu kumema khuluveka lu mukhono kwekwe musatsa.

³Mwami Nyasaye wayaanza vandu veve khali neye ulindanga vatakatifu veve voosi. Voosi vamusikamilanga khali nivanyola mivaalo khurula khuye;

⁴Malako ka Musa yakhuha, nako kalindanga vandu vi tsimbia tsia Israeli.

⁵Mwami Nyasaye yali Mwami wa Israeli, lwa vimilili vavo vakanila halala, nivavunjelitsa vandu vi tsimbia tsia Israeli.

⁶Musa yavoola likhuva khu vandu vuluhia lwa Rubeni, “Ndi ni lienya vandu vuluhia lwa Rubeni vatsililile khuva mwoyo vavuli khukhutsa, khali vandu vuluhia lwenolo vavuli khuva vati.”

⁷Musa yavoola likhuva khu vandu vuluhia lwa Yuda, “Mwami Nyasaye, uhulishitse khuli vandu va Yuda valilanga; vakalushitsi khu vandu vavo vandi yavo. Mwami Nyasaye, nuyaanza uvakwanile, khali uvakhonye khukuura vatsiku vavo.”

⁸Musa yavoola likhuva khu vandu vu lwivulu lwa Levi, “Mwami Nyasaye, nivi wamanyinya vandu vu lwivulu lwa Levi, lienya liolio khuvirila khu Urimu, lienya liolio khu vandu va yivi mwene wayaanza khuvirila khu Tsumimu, lwa wa vachelitsa nivali mu litaala lia Masa.

⁹Nivi wahingana navo nivali ha tsisieveye tsia Meriba. Vandu vuluhia lwa Levi virulitsa khulekhana na vakuuka vavo, nivivilila vandu vi tsinzu tsiavo, khuvula khwenya khumanya vaana vavo navutswa shichila vali ninganakani yu khwenya khulonda malako koko nu khwenya khuva vasuuvilwa khu lilakano liolio.

¹⁰Valiitsa khwechitsa vandu vovo mivaalo koko; valiitsa khwechitsa Vaisraeli malako koko. Vandu vuluhia lwa Levi valiitsa khusambila vubani imbeli wowo, vihanwa viu khusambwa viosi khu vwaali vwovwo.

¹¹Mwami Nyasaye, nuyaanza wu vakhonye ni tsingulu; uhuchilile mihinzilu chiavo. Nuyaanza utivitsi vatsiku vavo voosi; tsingulu tsia vandu va vakwananga utivitsi.”

¹²Musa yavoola likhuva khu vandu vuluhia lwa Benyamini, “Yava navo vandu vuluhia lu Mwami Nyasaye yayaanza, navo vamenyanga mu vulindi vulahi himbi naye, Neye uvalindanga mbasu kwosi, khandi amenyanga navo.”

¹³Musa yavoola likhuva khu vandu vuluhia lwa Yosefu, “Mwami Nyasaye akasitse shivala shiavo, ni tsikhaavi tsindahi tsiene khurula mwikulu,

¹⁴shikasitswi na matunda kenga vulahi, matunda malahi mumatukhu koosi,

¹⁵ni vindu vilahi khurula mu vikulu viavo via khale ni viraakwa vilahi mu vunyishi mu vikulu vi mihika ni mihika;

¹⁶shivala shiavo shive ni vindu vinyishi vilahi, vakasitswi nu vulahi vu Mwami Nyasaye, walomoloma khuvirila mu shisakha shiakhanga mulilu. Tsikhaavi yitsi tsikwili vandu vuluhia lwa Yosefu, lwa yali mwimilili mu vamwavo veve.

¹⁷Tsingulu tsia Yosefu tsili khuli tsingulu tsi ichilishi, Tsinzika khuli tsi ihili indulu. Tsinzika tsiayo tsili khuli vandu tsiheelefu likhomi vuluhia lwa Efurahimu khandi vandu tsiheelefu vuluhia lwa Manaase. Atsirumishilanga khutuuya vandu vi tsimbia tsindi tsiosi nu khuvasuunda khundulu khwi lilova.”

¹⁸Musa yavoola likhuva khu vandu vi tsimbia tsia Zabuloni nende Isakari, “Vandu vuluhia lwa Zabuloni, mwikhoyele mu luchendo lwenyu, na munyi Isakari, mu maheemo ka mumenyamu.

¹⁹Valiitsa khwinjilitsa vandu vacheni khu shikulu shiavo; valiitsa khukholela misango chiavo chiatoto; shichila vanyolanga miandu chiavo khurula mu inyanza, khandi livishilu liavo mu muyeeshe khuluchinga lwi inyanza.”

²⁰Musa yavoola likhuva khu vandu vuluhia lwa Gadi, “Mwitsominye Nyasaye, wavambalalitsa lusomo lwa Gadi! Vandu vuluhia lwa Gadi vanyenyekhanga khuli isimba khwavulanyinya mukhono inoho murwi.

²¹Vandu vuluhia lwa Gadi vivukulila vene shivala shilahi muno; navo vaheelwa shitonye shiu mwimilili. Navo valonda lienya liu Mwami Nyasaye nende malako keke, lwa vimilili va Israeli vakanila halala.”

²²Musa yavoola likhuva khu vandu vuluhia lwa Dani, “Vandu vuluhia lwa Dani vali khuli mwana wi isimba; asila silanga khurula Bashani.”

²³Musa yavoola likhuva khu vandu vuluhia lwa Nafutali, “Vandu vuluhia lwa Nafutali vakasitswa muno nu vunyishi vu vulahi vu Mwami Nyasaye. Mupaka kwi shivala shiavo kutukhanga khuluveka luli ikuvanda khuraanjila khu Inyanza ya Galilaya.”

²⁴Musa yavoola likhuva khu vuluhia lwa Asheri, “Vandu vuluhia lwa Asheri vakasitswa muno khuvira vandu vi tsimbia tsindi tsiosi. Vakholelwi vulahi mu vamwavo vavo, khandi shivala shieshie shimele misayituni mu vunyishi.

²⁵Milondi chia mataala kenyu kaliitsa khuva ki vivia nende mukasa; Valiitsa khumenya mu vulindi vulahi khumatukhu koosi ka valiitsa khuva nivashili mwoyo.”

²⁶Musa yamalila navoola, “Israeli, wundi avulakhuho khuli Nyasaye wenyu, uchendelanga mu malesi khwitsa khukhonya munyi, khandi mwikulu mu vukhumi vwevwe.

²⁷Nyasaye wi mihika ni mihika neye shivisilu shienyu, tsingulu tsietsie tsiamanyikhana khulilova. Neye wakhunga vatsiku khurula imbeli wenyu; namuvoolela, ‘Vativitsi!’

²⁸Vaisraeli vamenyanga mu vulindi vulahi; vitsukhulu va Yakobo vonyene vutswa mu shivala shilimu ni imu nende idivai inyishi, toto, havundu hi liime lirulanga mu malesi nilishinditsa malova.

²⁹Munyi Vaisraeli, muli ni ikhaavi muno! Ni viina uli khuli munyi, vandu vu Mwami Nyasaye yahonyinya? Mwami Nyasaye mwene neye uli khuli ingavo yenyu yu khumulinda, shivavi shienyu shiu khumulerela likuura! Vatsiku venyu valiitsa khumusaya muvalolele tsimbavasi, navutswa muliitsa khuvatuvachila hasi.”