Read tsotso LITSUSHITSWA 5 Bible Online

LITSUSHITSWA 5 - tsotso bible

LITSUSHITSWA 5

¹Musa yalaanga halala Vaisraeli voosi navavoolela, “Munyi Vaisraeli, hulili malako koosi kamuheetsanga nunundi. Mweche khandi mukalonde munjila yenyekhanga.

²Mwami Nyasaye, uli Nyasaye weru yakhola lilakano na khutsi ha Shikulu shia Sinai.

³Mwami Nyasaye shiyakhola lilakano na vakuuka veru tawe; navutswa ni vanga khutsi va yakhola navo, vakhushili mwoyo navo va yakhola navo lilakano.

⁴Mwami Nyasaye yalomoloma na munyi mumoni na moni ha shikulu henaho khuvirila mu mulilu.

⁵Mumatukhu kenako, inzi nasinjila hakari henyu nu Mwami Nyasaye khumuvoolela ka yali navooli, shichila mwaria mulilu manumuvula khutikulukha khu shikulu. “Mwami Nyasaye yavoola,

⁶‘Ninzi Mwami Nyasaye, uli Nyasaye wenyu, wamurulitsa mu shivala shia Misri, wa mwamenyanga mu vurukwa.

⁷“‘Uvuli khusaalakhu khu nyasaye wundi khumeeta khwinzi.

⁸“‘Uvuli khwilombelakhu musambwa kwosi, khusasa shia shindu shiosi shili mwikulu inoho hasi khulilova inoho mu matsi hasi hi lilova.

⁹Uliitsa khuvula khuchinamila inoho khusaala khu misambwa chenecho; shichila ninzi Mwami Nyasaye, uli Nyasaye wenyu, nashila lishiendekha. Salilitsanga vaana shichila vwoni vwa vivuli vavo, khutukha khu likhula lia khavaka nende lia khane;

¹⁰Navutswa niitsa khumanyinya vuyaanzi vwanje vwi mihika ni mihika khu vandu va makhula tsiheelefu, yavo vanyanza khandi valondanga malako kaanje.

¹¹“‘Uvuli khurumishilakhu munjila indamanu lira liu Mwami Nyasaye; shichila ninzi Mwami Nyasaye, uli Nyasaye wowo. Niitsa khusalilitsa shia mundu wosi wurumishilanga munjila indamanu lira lianje.

¹²“‘Ukhole katushili khulitukhu li Lisabato, nu khulikhola khuva litakatifu, khuli inzi Mwami Nyasaye, uli Nyasaye wowo navoola ukhole.

¹³Uli na matukhu sita ku khukhola muhinzilu kwokwo kwosi khandi shia shindu shiosi;

¹⁴navutswa litukhu lia saba ni litukhu liu khuhulukha liahaanwa khwinzi Mwami Nyasaye. Uliitsa khuvula khukhola muhinzilu kwosi khulitukhu lienelo, yivi mwene inoho vaana vi shiyayi vovo inoho vaana vovo vi shikhana, inoho varukwa vovo vasatsa inoho vakhali inoho ichilishi yoyo inoho ipunda yoyo, inoho mulala khu miruku chiochio inoho mulala khu vacheni wumenyanga mu litaala lienyu. Khali varukwa vovo valiitsa khuhulukha khuli yivi mwene uhulukhanga.

¹⁵Uve numanyanga ndi khali yivi wali murukwa mu shivala shia Misri; khandi ndi inzi Mwami Nyasaye, uli Nyasaye wowo, nakhurulitsayo khuvirila khu vunyali vwanje nende tsingulu tsianje. Nashio shivune shichilanga nimbola ukhole katushili khulitukhu lia Lisabato.

¹⁶“‘Uhe tata wowo nende mama wowo luyali, uhindile mu shivala shiu Mwami Nyasaye, uli Nyasaye wowo atsitsanga khumuha.

¹⁷“‘Uvuli khwiirwakhu mundu.

¹⁸“‘Uvuli khuheeyakhu.

¹⁹“‘Uvuli khuhuuvakhu.

²⁰“‘Uvuli khwichishila mureende wowo.

²¹“‘Uvuli khwikombakhu inzu yu mureende wowo; inoho mukhali wewe, inoho murumishi wewe musatsa inoho murumishi wewe mukhali inoho ing'ombe yeye inoho ipunda yeye, inoho khali shindu shiosi, shiu mureende wowo ali nashio.’

²²“Yaka nako Malako ku Mwami Nyasaye yamuha munyi voosi, lwa mwali nu mwakhivunjelitsa ha shikulu. Lwa yalomoloma nu mwoyo ku vunyali khurula mu mulilu khandi mu malesi malitoho, yahaana malako yaka; navutswa kandi lukanu tawe. Khu, yakahandika khu machina kakhongwa kavili manamba.

²³“Lwa mwahulila mwoyo nu kurulanga mu shisuundi, lwa mulilu kwali nu kwakhanga khu shikulu, vimilili voosi vi tsimbia tsienyu nende vasakhulu venyu voosi vitsa himbi ha nali nindi.

²⁴Mwavoola, ‘Mwami Nyasaye, uli Nyasaye weru ukhumanyinyi vukhumi vwevwe nende tsingulu; nunundi khumali khuhulila nalomoloma khuvirila mu mulilu! Khumali khulola nunundi ndi mundu anyala khutsililila khuva mwoyo khali niiva Nyasaye walomoloma khuye.

²⁵Khulwa yako, shichila shina khwilakhuli khukhutsa? Mulilu mululu yuku kulakhumala; niiva khulatsililila khuhulila mwoyo ku Mwami Nyasaye, uli Nyasaye weru, khuliitsa khukhutsa.

²⁶Mundu alikhuho mu munyi wahulila mwoyo kwa Nyasaye uli mwoyo, khuli lwa khuhulile, nu khutsililila khuva mwoyo?

²⁷Musa, tsiayo himbi, uhulishitsi shiu Mwami Nyasaye, uli Nyasaye weru avoolanga. Ulakalukha khwitsa khukhuvoolela makhuva ku Mwami Nyasaye, uli Nyasaye weru akhuvoolele. Khulahulishitsa khandi khulakalonda.’

²⁸“Mwami Nyasaye yamuhulila lwa mwalomoloma khwinzi; nambolela, ‘Mali khuhulila ka vandu yava vakhuvoolele. Ni valunji mu shia shindu shiosi, shia vavooli.

²⁹Nakhikombi vavetsenje ndio shia khase khosi! Nakhikombi vambetsenje shia khase khosi luyali, khandi valonde malako kaanje koosi, khu vamenye limenya lilahi halala na vitsukhulu vavo mihika ni mihika.

³⁰Simukha utsi, uvavoolele vakalushi mu maheemo kavo.

³¹Navutswa yivi Musa, khola nurikala hanu ninzi, khuvoolele malako kaanje, mivaalo kaanje nende mechitso kaanje. Wenyekhanga wechitsi vandu malako kenako, khu valikalonda mu shivala, shia vaheetsanga.’

³²“Munyi Vaisraeli, muve vacheli mukhole shia shindu shiosi shiu Mwami Nyasaye, uli Nyasaye wenyu amuvoolele mukhole. Mulonde malako keke koosi.

³³Mulonde shia shindu shiosi shiu Mwami Nyasaye, uli Nyasaye wenyu yamuvoolela mukhole; khu mutsililile khuva mwoyo, mumenye limenya lilahi; khandi mutsililile khumenya khumatukhu manyishi mu shivala, shia mutsitsanga khumenyamu.