Read tsotso YOHANA 1 Bible Online

YOHANA 1 - tsotso bible

YOHANA 1

¹Shivala nishishili khuloongwa, Likhuva liali nililiho; yali na Nyasaye, khandi yali khuli Nyasaye.

²Khurula muliraanga Likhuva liali na Nyasaye.

³Shia shindu shiosi shialoongwa khuvirila muye; shindu shivulakhuho khali shilala shialoongwa vuchila ye khuvaho.

⁴Likhuva nalio liali shirula shiu vulamu, ma vulamu vwenovo nu vulerela vandu vu mu shivala vulavu.

⁵Vulavu vwakhanga mu shisuundi; navutswa shisuundi shivula tsingulu tsiu khukuura vulavu.

⁶Nyasaye yaruma murumwa wewe, walaangwangwa Yohana.

⁷Neye witsa navoolela vandu makhuva khulondokhana khu vulavu, khu voosi nikanyalikha vasuuvili khuvirila mu likhuva.

⁸Ye mwene shiyali vulavu tawe; navutswa yitsa khuhaana vushiahidi khulondokhana khu vulavu.

⁹Yuvu navwo vwali vulavu vwatoto -- vulavu vwitsanga mu shivala khwashila shia mundu wosi.

¹⁰Likhuva liali mu shivala; khali niiva Nyasaye yalomba shivala khuvirila muye, navutswa vandu vu mu shivala shivali vamumanya tawe.

¹¹Yitsa mwene mu shivala shieshie; navutswa vandu veve mwene vamwambakhana khumwinjilitsa.

¹²Navutswa valala khuvo vamwinjilitsa, nivasuuvila muye. Yavaha vunyali vu khuva vaana va Nyasaye;

¹³Shikali vitsa khuva vaana va Nyasaye khuvirila mulivulwa liu mmbili, nakhwo khuvoola, khuvirila mulivulwa khuli vaana vu mundu musatsa tawe; navutswa Nyasaye mwene neye wali Tata wavo.

¹⁴Likhuva liakwa mundu, namenya na khutsi. Yitsula tsimbavasi nende katoto. Khwalola vukhumi vwevwe, vukhumi vwa yali nanyoli khuli Mwana mutelwa warula khu Tata.

¹⁵Yohana yalomoloma makhuva khulondokhana khuye. Yilwatsa navoola, “Uyu neye wa nalomoloma makhuva khulondokhana khuye, lwa navoola, ‘Mundu uliitsa khwitsa inyuma wanje, neye uli nu vunyali vunyishi khumbira, shichila yaliho nishili khwivulwa.’ ”

¹⁶Khulwa yako, khuvirila khu tsimbavasi tsietsie tsinyishi, wakhukasitsa khutsi voosi; khandi akhukasitsanga shia litukhu.

¹⁷Nyasaye yahaana Malako khuvirila khu Musa; navutswa tsimbavasi nende katoto kalolekha khuvirila mu Yesu Kristo.

¹⁸Mundu avulakhuho walola Nyasaye. Navutswa, Mwana wewe mutelwa, uli khuli Nyasaye khandi uli khuluveka lwa Tata, wamulomba khumanyikhana.

¹⁹Vimilili va Vayahudi mu Yerusalemi varuma vasalisi valala nende vandu vu lwivulu lwa Levi khu Yohana, khumureeva, “Uli viina?”

²⁰Yohana shiyali wambakhana khuvachipa tawe; navutswa yalomoloma havulavu vulahi vwene, navoola, “Shindi Masiha tawe.”

²¹Vamureeva, “Unyala khuva uli viina? Unyala khuva uli Eliya?” Yohana yachipa, “Shindi Eliya tawe.” Vareeva khandi, “Unyala khuva uli Muprofeti?” Yohana yachipa, “Shindi muprofeti tawe.”

²²Nalwo lwa vamureeva, “Khuvoolele uli viina? Khuhe shia khutsia khuchipa vandu vakhuruma. Ni shina shiunyala khuvoolakhu khulondokhana khu yivi mwene?”

²³Yohana yachipa narumishila makhuva ku Muprofeti Isaya yali niyavoola, “Ninzi mwoyo ku mundu ulaanjililanga mu shiangalangwi, ‘Lunjishitsi injila yu Mwami alondelakhu!’ ”

²⁴Varumwa va Vafarisayo vali nivaruma,

²⁵vareeva Yohana, “Niiva shiuli Masiha inoho Eliya inoho Muprofeti tawe, shichila shina ubatisanga vandu?”

²⁶Yohana yachipa, “Mbatisanga na matsi; navutswa mundu mulala wusinjile mu munyi wa mwakorwa.

²⁷Ye neye witsanga inyuma wanje, khandi mbulakhu vunyali vukhumuvoholola vilaaro vievie.”

²⁸Yaka koosi kikholekha mu litaala lia Betsania khuluveka luli ivukwi wu Muchela kwa Yorodani, wa Yohana yabatisanga vandu.

²⁹Litukhu lialondakhu, Yohana yalola Yesu niyitsanga himbi ha yali nali, navoola, “Loli, Shimeme shi Likondi shia Nyasaye, arulitsaho vwoni vwa vandu voosi mu shivala!

³⁰Uyu neye wa nalomoloma makhuva khulondokhana khuye, lwa navoola, ‘Mundu witsanga inyuma wanje, ali ni tsingulu tsinyishi khumbira, shichila yaliho nishili khwivulwa.’

³¹Inzi mwene nali namukorwa, navutswa niitsa nimbatisanga na matsi, khu amanyikhane khu Israeli.”

³²Yohana yahaana vushiahidi yuvu, “Nalola Roho niyikhanga khurula mwikulu khuli shituti nayeela khuye.

³³Inzi mwene khali nali namukorwa; navutswa Nyasaye, wanduma mbatisi na matsi, yambolela, ‘Mundu ulola Roho niyikhanga khuye khandi nayeelakhu, neye mundu ubatisanga na Roho Mutakatifu.’

³⁴Mali khulola khandi mbananga vushiahidi khu munyi ndi neye Mwana wa Nyasaye.”

³⁵Litukhu lialondakhu, Yohana yali nasinjile hawenaho khandi na veechi vavili khu veechi veve.

³⁶Lwa yalola Yesu nachendaho, yavoola, “Loli, shimeme shi Likondi shia Nyasaye!”

³⁷Lwa veechi vavili venavo vahulila navoolanga ndio, valonda Yesu.

³⁸Yesu yishevukha, nalola vamulondanga, navareeva, “Ni shina shia mukhavanga?” Vamuchipa, “Rabbi, (kavoolanga Mwechitsi) ni hena ha wumenyanga?”

³⁹Yesu yavavoolela, “Hambi mulole.” Vasimukha nivatsia khulola havundu wa yamenyanga; nivamenya naye khulitukhu lienelo, shichila tsiali nitsili tsisaa likhomi tsiu khulukolovo.

⁴⁰Mulala khu veechi vavili venavo wali niyahulila makhuva ka Yohana yalomoloma, namulonda, yalaangwangwa Andereya, amwavo wa Simoni Petro.

⁴¹Andereya yasimukha natsia khukhava vwangu amwavo wewe Simoni, namuvoolela, “Khunyoli Masiha” (kavoolanga “Kristo”).

⁴²Andereya yavukula Simoni namuhila khu Yesu. Yesu yamuheenza navoola, “Lira liolio ni Simoni mwana wa Yohana, navutswa utsitsanga khulaangwa Kefa, kavoolanga Petro.”[1]

⁴³Litukhu lialondakhu, Yesu yakanakana khutsia mu lusomo lwa Galilaya. Yakana na Filipu namuvoolela “Nonda!”

⁴⁴(Filipu yali naruli mu litaala lia Betsesaida, wa Andereya nende Petro vamenyanga.)

⁴⁵Filipu yanyola Natsanieli namuvoolela, “Khunyoli woyo wa Musa yahandika makhuva khulondokhanakhu mu shitabu shia Malako; khandi wa vaprofeti vahandika khandi makhuva khulondokhanakhu. Ye neye Yesu mwana wa Yosefu, khurula mu litaala lia Nazareti.”

⁴⁶Natsanieli yareeva, “Toto, shindu shilahi shinyala khurula mu litaala lia Nazareti?” Filipu yamuvoolela, “Hamba ulole.”

⁴⁷Lwa Yesu yalola Natsanieli niyitsanga himbi ha yali nali, yalomoloma makhuva khulondokhana khuye, navoola, “Uyu neye Muisraeli watoto; vuvehi vuvulakhu muye!”

⁴⁸Natsanieli yamureeva “Wamanya munjila shina?” Yesu yamuvoolela, “Nakhulola yivi Filipu nuli hasi wu musala ku mukhuyu, nishili khukhulaanga.”

⁴⁹Natsanieli yamuvoolela khandi, “Mwechitsi, uli Mwana wa Nyasaye! Uli Mwami wa Israeli!”

⁵⁰Yesu yavoola, “Unyala khuva usuuvili, lwa khuvoolele ndi khuloli nuli hasi wu musala ku mukhuyu? Uliitsa khulola vindu vindi vikali khuvira vienevo!”

⁵¹Yesu yavavoolela, “Muvoolelanga katoto ndi muliitsa khulola likulu nilikushi, khandi tsinjelosi tsia Nyasaye ni tsitsitsanga ikulu khandi nitsikhanga hasi khu Mwana wu Mundu.”