Read tsotso YOHANA 19 Bible Online

YOHANA 19 - tsotso bible

YOHANA 19

¹Nalwo lwa Pilato yavukula Yesu, nahaana lilako ashiutwi shivoko.

²Vasikali valinga halala ingara khu tsisia tsia mavwa nivafwala Yesu khu murwi. Vamufwala ikaanzu ya sambarau,

³nivatsililila khutsia khuye, nivavoola, “Uhindile Mwami wa Vayahudi!” Manivamusamula tsikhovi.

⁴Pilato yakalukha ilwanyi khandi, navoolela vandu, “Loli, mulerelanga mundu uyu ilwanyi, khwenya mumanye ndi mbulakhu shindu shitamanu shiakholi shinyala khuchila akhalachilwi.”

⁵Yesu yarula ilwanyi, niyifwali ingara ya mavwa nende ikaanzu ya sambarau. Pilato yavavoolela, “Loli, mundu tsana neye uyu.”

⁶Lwa vasalisi vakali nende valindi vi litempeli vamulola, valaanjilila nivavoola, “Avambwi! Avambwi!” Navutswa Pilato yavavoolela, “Munyi vene muvukule mumuvambe; shichila mbulakhu shindu shitamanu shiakholi shinyala khuchila akhalachilwi.”

⁷Vayahudi vachipa khandi, “Khuli ni lilako lieru; khandi khulondokhana khu lilako lienelo khutukha mundu uyu yiirwi, shichila wayikhola khuva Mwana wa Nyasaye.”

⁸Lwa Pilato yahulila ndio, yatsililila khuria muno,

⁹nakalukha mu inzu yu vwami. Yareeva Yesu, “Ni hena ha urulanga?” Navutswa Yesu yahonjela vutswa.

¹⁰Pilato yamureeva, “Wambakhane khulomoloma khwinzi? Wakorwa khumanya ndi, ndi nu vunyali vu khukhuvoholola inoho khukhuvamba khu musalaba.”

¹¹Yesu yamuchipa, “Uvulakhu vunyali khwinzi nu wakhaheelwa khurula khu Nyasaye. Khulwa yako, mundu underi khu yivi ukholi vwoni vutamanu vunyishi muno.”

¹²Lwa Pilato yahulila ndio, yachelitsa khukhava khuli anyala khuvoholola Yesu. Navutswa Vayahudi valaanjilila nivavoola, “Niiva ulavoholola mundu uyu, shiunyala khuva mulina wu Mwami wa Roma tawe! Mundu wikholanga khuva mwami, ahinganyinyanga Mwami wa Roma.”

¹³Lwa Pilato yahulila ndio, yahila Yesu ilwanyi, niyikhala khu shisoko shiu mukhalachi havundu halaangwangwa, “Injila ya Machina.” (Muluhebrania kavoolanga “Gabatsa.”)

¹⁴Liali nilili litukhu Liukhwirecheshela Lisitsa liu Mulukha kwa Pasaka, himbi tsisaa sita; lwa Pilato yavoolela Vayahudi, “Vukuli Mwami wenyu!”

¹⁵Valaanjilila khandi nivavoola, “Mwiiri! Mwiiri! Avambwi!” Pilato yavareeva, “Mwenyanga mbambe mwami wenyu?” Vasalisi vakali vamuchipa, “Khuvulakhu mwami wundi, navutswa Mwami wa khuli neye wonyene nu Mwami wa Roma!”

¹⁶Nalwo lwa Pilato yahaana Yesu khuvo vamuvambe. Khulwa yako, vasikali vavukula Yesu.

¹⁷Yesu yitiukha musalaba kwekwe narulaho. Yatukha havundu halaangwangwa “Havundu hi Shihanga.” Halaangwangwa lira lindi Muluhebrania “Golokotsa.”

¹⁸Vavambila Yesu havundu henaho. Vamuvambilaho halala na vandu vandi vavili, mulala khuluveka lu mukhono musatsa kwa Yesu na wundi khuluveka lu mukhono kwekwe mukhali, Yesu nali hakari havo.

¹⁹Pilato yahandika mahandiko nivakhonyela khu musalaba kwa Yesu kavoolanga, “Yesu wa Nazareti, Mwami wa Vayahudi.”

²⁰Vayahudi vanyishi vasoma mahandiko kenako, shichila havundu ha Yesu yavambwa hali nali himbi mu litaala likali. Mahandiko kenako kali kahandikwa Muluhebrania, Mululatini nende Muluguriki.

²¹Vasalisi vakali vavoolela Pilato, “Ukhahandika, ‘Mwami wa Vayahudi’ tawe, navutswa uhandichi ku mundu uyu mwene avoolanga, ‘Ninzi Mwami wa Vayahudi.’ ”

²²Pilato yachipa, “Kambandichi, nako kamali khuhandika.”

²³Lwa vasikali vali nivakhavamba Yesu, vavukula tsinguvu tsietsie, nivakavula mu vitonye vine, shia mulala shitonye shilala. Vavukula khandi ikaanzu yeye, yali niyanaavwa vuchila vunganyilu vwosi.

²⁴Vasikali vavoolelana vene, “Khuvuli khurandula ikaanzu yeye; navutswa leshi khukhuvi ikura khulole ni viina unyala khuchinyola.” Yaka kikholekha khurweshitsa ka Mahandiko Matakatifu kavoola, “Vakavulana tsinguvu tsianje vene, nivakhuva ikura khu ikaanzu yanje.” Nako ka vasikali venavo vakhola.

²⁵Vandu vali nivasinjile himbi ha musalaba kwa Yesu ni mama wa Yesu, mwana wi shikhana wanga Mariya nali mama wa Yesu, mukhali wa Kiliopa walaangwangwa Mariya nende Mariya Magadalena.

²⁶Lwa Yesu yalola mama wewe nende mwechi wa yali niyayaanza nivasinjileho himbi, yavoolela mama wewe, “Mukhali yivi! Lolakhu mwana wowo uyu!”

²⁷Yesu yavoolela mwechi wa yali niyayaanza mwenoyo, “Uyu neye mama wowo!” Khuraanjila lwenolo, mwechi mwenoyo yamuvukula namuhila ingo wewe.

²⁸Matukhu mati nikakhavira, Yesu niyamanya ndi umali khurweshitsa muhinzilu kwekwe kwosi; khandi khu Mahandiko Matakatifu karweshitswi, yavoola, “Mbulilanga vuluhu.”

²⁹Ibakuli yali niyitsule idivai indulu yali niliho; vinikha shitasi mu idivai yeneyo, nivavikha khu shisala shi hisopu, nivashichinguula khukhombitsa Yesu.

³⁰Lwa Yesu yali namali khuchikhomba yavoola, “Luvwele!” Yinaminya murwi kwekwe hasi nakhutsa.

³¹Nalwo lwa vimilili va Vayahudi vareeva Pilato avahuchilile vatsi khumeneka vilenje via vandu vali nivavambilwi; nu khurulitsa mivili chienecho khu musalaba. Vareeva vakhole ndio, shichila liali litukhu liu mulwakharanu; khandi shivenyanga mivili chienecho chive khu musalaba khulitukhu li Lisabato tawe; shichila litukhu li Lisabato lilondakhu liali litakatifu.

³²Khulwa yako, vasikali vasimukha nivatsia khumeneka vilenje viu mundu wu khuraanga khandi viu mundu wa khavili, vali nivavambwa na Yesu.

³³Navutswa lwa vatukha khu Yesu, nivanyola umali khukhutsa khale; shivameneka vilenje vievie tawe.

³⁴Mulala khu vasikali venavo, yalivira Yesu mumbalu ni lirimu; ma masahi nende matsi nikarulamu.

³⁵Mundu walola yaka nikakholekhanga alomolomanga khulondokhana khuko, khu khali munyi musuuvile. Ka yavoola ni katoto; khandi wamanya ndi alomolomanga katoto.

³⁶Yaka kikholekha khu Mahandiko Matakatifu karweshitswi, “Khali shilala khu vikuumba vievie shishiliitsa khumenekwa tawe.”

³⁷Mahandiko Matakatifu kandi kaliho kavoolanga, “Vandu valiitsa khuheenza khu woyo wa valivira mumbalu.”

³⁸Vindu yivi nivimali khwikholekha, Yosefu wi litaala lia Arimatseya nali mulala khu veechi va Yesu, navutswa muvwivisi, shichila wali waria Vayahudi, yareeva Pilato ndi nikanyalikha avukule mmbili kwa Yesu atsi khukuyeveela mu shilindwa. Pilato yamuhuchilila khuvukula mmbili kwenoko.

³⁹Nikodemo wali niyatsiakhu khale khulola Yesu vutukhu vundi, yasimukha natsia na Yosefu. Nikodemo yali uchinji himbi tsikilo makhomi kavaka ki vinzali, manemane nitsukanyinywi ni vindu vihuunyanga mwayu mulahi.

⁴⁰Vavukula mmbili kwa Yesu nivakulinjila mu tsinguvu tsindavu ni vindu viahunyanga mwayu mulahi, khulondokhana khuli mwiima kukhura mivili chia vandu vakhutsa kwa Vayahudi kwa kholekhanga.

⁴¹Khwali nu mulimi havundu ha Yesu yavambilwa; khandi mu mulimi kwenoko khwalimu ni shilindwa shiyia shiu mundu yali nashili khuyeveelwamu.

⁴²Shilindwa shialiho himbi; khandi kali nikali matukhu ku khwirecheshela litukhu li Lisabato. Khulwa yako, vayeveela mmbili kwa Yesu mu shilindwa shienesho.