Read tsotso YOHANA 20 Bible Online

YOHANA 20 - tsotso bible

YOHANA 20

¹Khulitukhu lia Jumapili mu mavwevwe, shivala nishimwami, Mariya Magadalena yasimukha natsia khu shilindwa, nanyola lichina nilimali khusuundiwa haluveka khurula mu vwinjililu.

²Yilukhaka natsia khu Simoni Petro khandi khu mwechi wundi, wa Yesu yali niyayaanza, navavoolela, “Varulitse Mwami mu shilindwa. Shiukhunyala khuva nu khumanyi havundu ha vamuvishi tawe.”

³Khulwa yako, Petro nende mwechi wundi mwenoyo vilukhaka nivatsia khu shilindwa.

⁴Petro nende mwechi wundi mwenoyo vilukhakanga voosi; navutswa mwechi wundi mwenoyo yaraanga khutukha khu shilindwa, Petro nashili khutukha khushio.

⁵Mwechi wundi mwenoyo yinama nalolamu tsinguvu tsia machoro malahi nitsilinjilwi, navutswa shiyinjilamu tawe.

⁶Simoni Petro wali namulondanga inyuma yatukhaho, niyinjila mu shilindwa. Yalola tsinguvu tsienetso nitsilimu

⁷nende shilaka shiali nishivoheelwi khu murwi kwa Yesu. Shilaka shienesho shiali nishilinji shiene, khandi shishialikhu mu tsinguvu tsindi tawe.

⁸Mwechi wundi mwenoyo, shichila yali wu khuraanga khutukha khu shilindwa shia Yesu, yinjila khandi mu shilindwa shienesho. Yalola nasuuvila.

⁹Mumatukhu kenako, vali nivashili khumanya ka Mahandiko Matakatifu kavoolanga khulondokhana khu Yesu khuli aliitsa khwisimukha khurula mu likhutsa.

¹⁰Khulwa yako, veechi vavili venavo vakalukha ingo wavo.

¹¹Mariya yasinjila ilwanyi wi shilindwa nalilanga. Lwa yali nashililanga, yinama naheenzela mu shilindwa

¹²nalolamu tsinjelosi tsivili nitsifwali tsinguvu tsindavu, nitsikhale havundu ha mmbili kwa Yesu kwali nu kuli; injelosi indala ha murwi kwekwe, na yindi ha vilenje hehe.

¹³Tsinjelosi tsienetso tsiamureeva, “Mukhali yivi, ni shina shichilanga nulila?” Mariya yachipa, “Varulitse Mwami wanje hanu, khandi shimanyikhu havundu ha vamuvishi tawe.”

¹⁴Lwa Mariya yaheenza iyi neyo, yalola Yesu nasinjileho; navutswa shiyali namanyikhu ni Yesu tawe.

¹⁵Yesu yamureeva, “Mukhali yivi, ni shina shichilanga nulila? Ni viina wa ukhavanga?” Mariya yakanakana ndi nu mwene mulimi. Nalwo lwa Mariya yamuvoolela, “Mwami, niiva umali khumurulitsa hanu, mbolela havundu ha umuvishi khu nzi khumulera.”

¹⁶Yesu yamulaanga, “Mariya!” Yishevukha wa Yesu yali nali, navoola Muluhebrania, “Rabboni!” (Nakhwo khuvoola “Mwechitsi.”)

¹⁷Yesu yamuvoolela, “Ukhangumilakhu tawe, shichila shili khukalukha khu Tata. Navutswa simukha utsi khu vamwavo vaanje uvavoolele ndi ngalukhanga khu woyo uli Tata wanje khandi Tata wavo, Nyasaye wanje khandi Nyasaye wavo.”

¹⁸Khulwa yako, Mariya Magadalena yasimukha natsia navoolela veechi ndi uloli Mwami. Yavavoolela makhuva ka yali namuvoolele avavoolele.

¹⁹Lwa shivala shiali nishimwamanga khulitukhu liu khuraanga khu lisitsa, veechi viyikalila munzu, shichila varia vimilili va Vayahudi. Khulwa yako, Yesu yitsa nasinjila hakari havo, navoola, “Nyoli milembe voosi.”

²⁰Lwa Yesu yavoola ndio, yavamanyinya makhono keke khandi luvalu lwelwe. Veechi vali nu vuyaanzi vunyishi lwa valola Mwami Yesu.

²¹Yesu yavavoolela khandi, “Nyoli milembe voosi. Khuli lwa Tata yanduma, khali inzi murumanga khandi.”

²²Lwa yali niyakhamala khuvoola khandi ndio, yavesela muya navavoolela, “Nyoli Roho Mutakatifu.

²³Niiva mulasemeha vandu vwoni vwavo, nalwo lwa valiitsa khusemehelwa; navutswa niiva mulambakhana khusemeha, shivanyala khusemehelwa tawe.”

²⁴Khali ndio, Tomasi (wali ni lira lindi Likhwane), mulala khu veechi likhomi na vavili, shiyali navo lwa Yesu yalolekha khuvo tawe.

²⁵Khulwa yako, veechi vandi vamuvoolela, “Khuloli Mwami.” Navutswa Tomasi yavavoolela, “Nikhaloli tsimbala tsili mu makhono keke khandi ndili shitere shianje mu tsimbala tsienetso; ngumili mumbalu mwemwe, mbulakhu khuli lwa nyala khusuuvila.”

²⁶Matukhu munane nikakhavira, veechi va Yesu vali munzu khandi halala na Tomasi. Khali niiva vali nivikale miliango, Yesu yitsa nasinjila hakari havo navoola, “Nyoli milembe voosi!”

²⁷Yesu yavoolela Tomasi, “Tiila shitere shioshio hanu; khandi uheenze mu makhono kaanje; kololoshitsa mukhono kwokwo khandi ungumili mumbalu mwanje. Lekha khuhaya haya usuuvile!”

²⁸Tomasi yamuchipa, “Mwami wanje khandi Nyasaye wanje!”

²⁹Yesu yamuvoolela, “Wakhasuuvila lwa wakhalola ninzi? Vali ni ikhaavi yavo vasuuvilanga vuchila khulolakhu inzi!”

³⁰Yesu yakhola viloleshitsu vindi vinyishi imbeli wa veechi veve, viakhahandikwa mu shitabu yishi.

³¹Navutswa yivi viahandikwa khu musuuvile ndi Yesu neye Masiha, Mwana wa Nyasaye, khandi ndi nu musuuvile muye munyole vulamu.