Read tsotso YOHANA 7 Bible Online

YOHANA 7 - tsotso bible

YOHANA 7

¹Lwa Yesu yali namali khuvoola makhuva kenako, yachenda chenda mu lusomo lwa Galilaya. Shiyali ni lienya lu khutsia mu lusomo lwa Yudeya tawe, shichila vimilili va Vayahudi venyanga khumwiira.

²Navutswa lwa litukhu liu Mulukha kwa Matiili liali nilili himbi khutukha,

³vamwavo veve vamuvoolela, “Rula havundu hanu utsi mu lusomo lwa Yudeya, khu veechi vovo valole mihinzilu chia wu kholanga.

⁴Mundu avulakhuho wu kholanga muhinzilu muvwivisi, nikava yenyanga khumanyikhana shia havundu hosi. Lwa wu kholanga vindu yivi, nu vulahi numanyikhane khu vandu voosi mu shivala.”

⁵Khali vamwavo veve shivasuuvilakhu muye tawe.

⁶Yesu yavavoolela, “Isaa yanje ishili khutukha, navutswa isaa yenyu iliho shia khase khosi.

⁷Vandu vu mu shivala shivanyala khumuhima munyi tawe, navutswa vahimanga inzi, shichila nzilililanga khuvavoolela ndi vindu via vakholanga ni vitamanu.

⁸Munyi mutsi mu mulukha kwenoko; inzi shinyala khutsiamu tawe, shichila isaa yanje ishili khutukha.”

⁹Lwa Yesu yavoola makhuva kenako, yarikala mu lusomo lwa Galilaya.

¹⁰Lwa vamwavo va Yesu vali nivakhatsia mu mulukha kwa matili, Yesu yavalonda khandi. Shiyatsiayo havulavu tawe, navutswa muvwivisi.

¹¹Vimilili va Vayahudi varaanga khukhava Yesu mu mulukha kwenoko; nivareeva vandu vali nivaliyo, “Ni hena ha mundu mwenoyo ali?”

¹²Valala khu vandu vali nivali mu shituma varaanga khumoonyana vene khulondokhana khu Yesu. Valala khuvo vavoola, “Nu mundu mulahi,” na vandi nivavoola, “Nu mundu mutamanu, akoyanyinyanga vandu.”

¹³Navutswa mundu avulakhuho walomoloma havulavu makhuva khulondokhana khu Yesu, khulu khuria vimilili va Vayahudi.

¹⁴Lwa mulukha kwenoko kwali nu kuli himbi khutukha hakari, Yesu yinjila mu Litempeli naraanga khwechitsa vandu vali nivalimu.

¹⁵Vimilili va Vayahudi vali nilichenya, nivireevana vene khuvene, “Mundu uyu anyala khuva yeka hena vindu yivi, neye shiyasomakhu tawe?”

¹⁶Yesu yachipa, “Mechitso kaanje shikali kaanje mwene tawe; navutswa karulanga khu Nyasaye wanduma.

¹⁷Niiva mundu ali ni lienya liu khukhola ka Nyasaye yenyanga, alamanya nikava mechitso kaanje karulanga khu Nyasaye inoho nomolomanga khulondokhana khu vunyali vwanje mwene.

¹⁸Mundu ulomolomanga khulondokhana khu vunyali vwevwe mwene, achelitsanga khwihaanila vukhumi. Navutswa mundu wenyanga mundu wamuruma amuhe vukhumi nunundi nu watoto; khandi vuvehi vuvulakhu muye.

¹⁹Musa shiyamuha Malako? Navutswa khali ndio, mundu avulakhuho khu munyi ulondanga Malako! Khulwa yako, shichila shina mwenyanga khunziira?”

²⁰Shituma shia vandu vavoola, “Uli ni litimoni mu yivi! Ni viina ukhavanga khukhwiira?”

²¹Yesu yavachipa, “Kholi shiloleshitsu shilala, nashio shimali khumuchenyinya voosi.

²²Musa yahaana lilako khulondokhana khu shishevo (shikali shiarula khu Musa tawe, navutswa shiarula khu vakuuka venyu). Mushevanga vaana vi shiyayi khulitukhu li Lisabato.

²³Niiva mwana alashevwa khulitukhu li Lisabato, khu Lilako lia Musa livuli khumenekwa, shichila shina muli nu vurima shichila khwinzi, lwa mbonyinyi mundu khulitukhu li Lisabato?

²⁴Mukhakhalachi khuli lwa mulolanga vene tawe; navutswa leshi likhalaka lienyu live liu vulunji.”

²⁵Valala khu vandu va Yerusalemi vareeva, “Mundu uyu shianyala khuva wa vimilili va Vayahudi vakhavanga khwiira?

²⁶Loli! Alomolomanga mu vandu havulavu, khandi mundu avulakhuho ulomolomanga shindu shitamanu khulondokhana khuye. Musuuvilanga toto vanyala khuva vamumanyi neye Masiha?

²⁷Navutswa khali ndio, khwamanya wa mundu uyu arulanga. Lwa Masiha aliitsa khwitsa, mundu avulakhuho uliitsa khumanya warulanga.”

²⁸Khulwa yako, Yesu yalaanjilila, lwa yechitsanga mu Litempeli, navoola, “Mwamanya inzi; khandi mwamanya wandulanga toto? Shikali niitsa khuvirila khu vunyali vwanje mwene tawe. Woyo wanduma nu watoto. Shikali mwamumanya tawe;

²⁹navutswa inzi namumanya, shichila narula khuye, khandi neye wanduma.”

³⁰Valala khu vandu vali nivaliho vachelitsa khukumila Yesu, navutswa shivali vanyala tawe; shichila isaa yeye yali nishili khutukha.

³¹Navutswa vandu vanyishi mu shituma vamusuuvila; nivavoola, “Lwa Masiha aliitsa khwitsa, aliitsa khukhola viloleshitsu vinyishi viene khuvira viu mundu uyu akholanga?”

³²Valala khu Vafarisayo vahulila shituma shia vandu nivamoonyanga vindu yivi khulondokhana khu Yesu. Vo nende vasalisi vakali varuma valindi vi Litempeli khutsia khumukumila.

³³Nalwo lwa Yesu yavoola, “Nzitsanga khumenyakhu na munyi khumatukhu mati konyene, manzi khu woyo wanduma.

³⁴Muliitsa khukhava inzi; navutswa muliitsa khuvula khunyola, shichila shiumunyala khutsia wa nzitsanga tawe.”

³⁵Vimilili va Vayahudi vireevana vene khuvene, “Ni hena wa mundu uyu akanakananga khutsia, wa khunyala khuvula khumunyola? Akanakananga khutsia mu mataala kali mu shivala shia Vaguriki, wa vandu veru vasalana, nu khwechitsa Vaguriki?

³⁶Ni shina shiachelitsanga khumanyinya lwa avooli, ‘Muliitsa khukhava, navutswa muliitsa khuvula khunyola,’ khandi ‘Havundu hamba nindi shiumunyala khutsiayo tawe.’ ”

³⁷Khulitukhu liukhumalilikha khandi likali liene liu mulukha, Yesu yasinjila navoola nu mwoyo mukali, “Niiva mundu ahulilanga vuluhu, leshi yitsi khwinzi khandi ang'wi.

³⁸Khuli Mahandiko Matakatifu kavoolanga, ‘Mundu usuuvilanga mwinzi, neye wa virula via matsi kahaananga vulamu virundukha mu mwoyo kwekwe.’ ”

³⁹Yesu yalomoloma makhuva yaka khulondokhana khu Roho, wa yavo voosi vasuuvila muye valiitsa khuva nivanyolanga. Mumatukhu kenako, Roho yali nashili khuhaanwa, shichila Yesu yali nashili khuheelwa vukhumi.

⁴⁰Lwa valala khu vandu mu shituma vahulila Yesu navoolanga ndio, vavoola, “Ni kilikali, mundu uyu nu muprofeti!”

⁴¹Vandi vavoola, “Neye Masiha.” Navutswa vandi nivavoola, “Masiha shialiitsa khurula mu lusomo lwa Galilaya tawe!

⁴²Mahandiko Matakatifu kavoolanga ndi Masiha aliitsa khuva mulala khu vitsukhulu vu Mwami Daudi; khandi aliitsa khwivulwa mu litaala lia Betselehemu, lia Daudi yamenyamu.”

⁴³Khulwa yako, valala khu vandu venavo vavukhana mu tsinganakani shichila Yesu.

⁴⁴Valala khuvo venyanga khumukumila, navutswa mundu avulakhuho khuvo watiila khuye.

⁴⁵Lwa valindi vi Litempeli vakalukha, vasalisi vakali nende Vafarisayo vavareeva, “Shichila shina numuvula khumulera hanu?”

⁴⁶Valindi venavo vavoola, “Mundu avulakhuho walomoloma vulahi vwene khuli mundu mwenoyo!”

⁴⁷Vafarisayo vavareeva, “Kanyala khuva wakaata khali munyi khandi?

⁴⁸Munyala khuva mwamanyakhu mwimilili inoho Mufarisayo usuuvili muye?

⁴⁹Navutswa shituma shia vandu yishi vali vakorwa Malako ka Musa; khulwa yako, ni valaame!”

⁵⁰Mulala khu Vafarisayo, wali naliho walaangwangwa Nikodemo, wali niyatsiakhu khale khulola Yesu, yavavoolela,

⁵¹“Khulondokhana khu Malako keru, shiukhunyala khukhalachila mundu nu khushili khuhulila makhuva keke khumanye shindu shitamanu shiakholi tawe.”

⁵²Khulwa yako, vachipa Nikodemo, “Nu vulahi, khali yivi urulanga mu lusomo lwa Galilaya? Khali nusoma vulahi vwene mu Mahandiko Matakatifu, unyala khunyola ndi muprofeti shianyala khurula mu lusomo lwenolo tawe.”