Read tsotso YOHANA 8 Bible Online

YOHANA 8 - tsotso bible

YOHANA 8

¹[ Khulwa yako, shia mundu wosi yasimukha natsia ingo wewe; navutswa Yesu yasimukha natsia khu Shikulu shia Misayituni.[3]

²Khulitukhu lialondakhu nu kushili mu mavwevwe, Yesu yakalukha mu Litempeli. Vandu voosi vivunjelitsa havundu ha yali nali, niyikhala hasi khuveechitsa.

³Vechitsi va Malako nende Vafarisayo vitsa nu mukhali wakumilwa naheeyanga. Vamusinjilitsa hakari ha vandu voosi;

⁴nivavoolela Yesu, “Mwechitsi, mukhali uyu umali khukumilwa naheeyanga.

⁵Khulondokhana khu Malako keru, Musa yavoola mukhali khuli uyu khutukha aleswi na machina khutukha lwakhutsa. Khulwa yako, ni shina shiunyala khuvoolakhu khulondokhana khuye?”

⁶Vareeva Yesu lireevo lienelo khumureeka, khu vanyole shivune shiu khumuyaala. Navutswa Yesu yinama hasi, naraanga khuhandika mu lukuushi ni shitere shieshie.

⁷Lwa vatsililila khureeva Yesu mareevo, yasinjila navavoolela, “Niiva mundu alikhu mu munyi ushili khukholakhu vwoni, nu vulahi naraanji khulesa mukhali uyu ni lichina.”

⁸Khulwa yako, Yesu yinama hasi khandi nahandika mulukuushi ni shitere shieshie.

⁹Navutswa lwa vahulila ndio, vandu voosi varulaho, shia mulala, khuraanjila khu vahindila vene. Yesu yarikala hawenaho wonyene, nu mukhali mwenoyo nashisinjiliho.

¹⁰Yesu yamuheenza namureeva, “Mukhali yivi, ni hena ha vandu venavo vali? Mundu alikhuho khuvo ukhukhalachili khwiirwa?”

¹¹Mukhali mwenoyo yavoola, “Mwami, mundu avulakhuho.” Yesu yavoola, “Khali inzi shinyala khukhukhalachila khwiirwa tawe; navutswa rula hanu utsi. Ukhakalushila khukhola vwoni tawe.”]

¹²Yesu yalomoloma khandi khu Vafarisayo. Yavavoolela, “Ninzi vulavu vu mu shivala. Mundu unondanga, shialiitsa khuchenda mu shisuundi tawe; navutswa aliitsa khunyola vulavu vuhaananga vulamu.”

¹³Nalwo lwa Vafarisayo vavoolela Yesu, “Yivi mwene wihaanilanga vushiahidi khulondokhana khu yivi; navutswa makhuva ka uvoolanga shikali katoto tawe.”

¹⁴Yesu yavoola, “Khali niiva inzi mwene nihaanilanga vushiahidi khulondokhana khwinzi, makhuva kambolanga ni katoto, shichila namanya wa narula khandi wa nzitsanga. Navutswa munyi muvulakhu shia mwamanyakhu khulondokhana khu wa narula inoho wa nzitsanga.

¹⁵Mukhalachilanga vandu khulondokhana khuli vandu vakanakananga vutswa; navutswa inzi shikhalachilanga mundu tawe.

¹⁶Khali ndio, niiva khalachilanga vandu, likhalaka lianje ni liatoto, shichila shikali ninzi wonyene ukhalachilanga vandu tawe; nikhali khali Tata wanje wanduma neye uvakhalachilanga.

¹⁷Kahandikwa mu Malako kenyu vene ndi lwa vashiahidi vavili vahuchilitsananga, khu ka vavoolanga ni kilikali.

¹⁸Inzi mwene mbananga vushiahidi khulondokhana khwinzi; khandi Tata wanduma neye uhaananga vushiahidi vundi khulondokhana khwinzi.”

¹⁹Khulwa yako, vamureeva, “Ni hena wa Tata wowo amenyanga?” Yesu yachipa, “Shiumwamanyakhu inzi inoho Tata wanje tawe. Niiva munyala khuva mwamanya, mwakhamanyi khandi Tata wanje.”

²⁰Yesu yavoola makhuva kenako koosi, lwa yechitsanga vandu mu Litempeli, havundu ha vavikhanga masanduku ki vihanwa. Mundu avulakhuho wamukumila, shichila isaa yeye yali nishili khutukha.

²¹Yesu yavavoolela khandi, “Narulaho; muliitsa khukhava inzi, navutswa muliitsa khukhutsa shichila vwoni vwenyu vwa mukholanga. Shiumunyala khwitsa wanzitsanga tawe.”

²²Nalwo lwa vimilili va Vayahudi vareeva, “Anyala khwiyiira mwene, lwa avoolanga, ‘Shiumunyala khwitsa wanzitsanga tawe.’ ”

²³Yesu yavachipa, “Munyi muli vandu vu khulilova khunu; navutswa inzi narula mwikulu. Muli vandu vu khulilova khunu, navutswa shindi mundu wu khulilova khunu tawe.

²⁴Nashio shivune shichilanga nimuvoolela muliitsa khukhutsa shichila vwoni vwenyu vwa mukholanga, muliitsa khukhutsa shichila vwoni vwenyu niiva mulambakhana khusuuvila ninzi Ye.”

²⁵Vareeva Yesu, “Uli viina?” Yesu yavachipa, “Mbele nimuvoolele khurula muliraanga.

²⁶Ndi na makhuva manyishi ku khumuvoolela, khandi kanyala khuchila mukhalachilwi. Woyo wanduma nu watoto; khandi ka yambolela, nako kambolelanga vandu vu mu shivala shinu.”

²⁷Khali shivamanyakhu ndi Yesu yalomolomanga khulondokhana khu Tata wewe tawe.

²⁸Yesu yavavoolela, “Lwa muliitsa khuva nu mwakhavamba Mwana wu Mundu khu musalaba, nalwo lwa muliitsa khumanya ‘Ninzi Ye’; khandi ndi mbulakhu shindu shianyala khukhola khuvirila khu vunyali vwanje mwene; navutswa mbolanga ka Tata anzechitsanga mbole.

²⁹Woyo wanduma ali ninzi; shikali wanzivalakhu wonyene tawe; shichila kholanga shia khase khosi ka muyaanzitsanga.”

³⁰Vandu vanyishi vasuuvila mu Yesu, lwa vahulila navoolanga ndio.

³¹Yesu yavoolela Vayahudi vali nivasuuvila muye, “Niiva mulatsililila khulonda mechitso kaanje, katoto muli veechi vaanje.

³²Nalwo lwa muliitsa khumanya katoto, khandi katoto kaliitsa khumukhola khuva vavoholole.”

³³Vamuchipa, “Khutsi khuli vitsukhulu va Aburahamu; khandi mundu ashili khukhukholakhu varukwa veve. Ni shina shiumanyinyanga luvoolanga, ‘Khulakholwa khuva vavoholole’?”

³⁴Yesu yavavoolela, “Muvoolelanga toto ndi shia mundu wu kholanga vwoni, nu murukwa wu vwoni.

³⁵Murukwa shianyala khutsililila khuva mulala khu vandu vi inzu khumatukhu koosi tawe; navutswa mwana atsilililanga khuva mulala khu vandu vi inzu yeneyo mihika ni mihika.

³⁶Niiva Mwana wa Nyasaye aliitsa khumukhola khuva vavoholole, katoto mulakholwa khuva vavoholole.

³⁷Manyi ndi muli vitsukhulu va Aburahamu; navutswa khali ndio, muchelitsanga khunziira, shichila likhuva lianje shilili mu mioyo chienyu tawe.

³⁸Muvoolelanga ka nalola Tata wanje nakholanga; navutswa munyi mukholanga ka tata wenyu yamuvoolela mukhole.”

³⁹Vachipa Yesu, “Aburahamu neye tata weru.” Yesu yavavoolela, “Niiva ni kilikali, mwakhavele vitsukhulu va Aburahamu, mwakhakholi vindu via Aburahamu yakholanga;

⁴⁰navutswa nunundi muchelitsanga khuli munyala khunziira, shichila muvoolele katoto ka nahulila khurula khu Nyasaye. Aburahamu shiyakholakhu vindu khuli vienevo tawe.

⁴¹Mukholanga vindu via tata wenyu mwene akholanga.” Vamuhinjitsa nivavoola, “Shiukhuli vaana vuluswa tawe; navutswa Nyasaye neye Tata weru wa khuli naye wonyene.”

⁴²Yesu yavavoolela, “Niiva toto Nyasaye yakhavele Tata wenyu, mwakhanyanzi, shichila narula khu Nyasaye khandi ndi hanu nunundi. Shikali niitsa khulondokhana khu vunyali vwanje mwene tawe; navutswa Tata wanje neye wanduma.

⁴³Khulwa yako, shichila shina mukhahulilanga vwangu kambolanga tawe? Kanyala khuva mukhayilwi khuhulila likhuva lianje.

⁴⁴Muli vaana va Ibilisi, nali tata wenyu; khandi mukholanga ka tata wenyu akholanga. Yali mwiiri khurula muliraanga, niyambakhana khulonda katoto; shichila katoto kavula muye. Lwa avehanga, alomolomanga lulomolomo lwa mwene amanyi, shichila nu muvehi khandi ni tata wa vavehi voosi.

⁴⁵Navutswa khali ndio, shichila mbolanga katoto, shiumunyala khusuuvila mwinzi tawe.

⁴⁶Ni viina khu munyi unyala khumanyinya ndi inzi nu mwoni? Niiva mbolanga katoto, shichila shina mwambakhananga khusuuvila mwinzi?

⁴⁷Mundu warula khu Nyasaye, ahulilanga makhuva ka Nyasaye avoolanga. Shivune shichilanga numuvula khuhulila shili ndi shiumuli vandu va Nyasaye tawe.”

⁴⁸Vandu venavo vareeva Yesu, “Khunyala khuva khuvoolanga vuvehi lwa khuvoolanga uli Musamaria, khandi litimoni lili mu yivi?”

⁴⁹Yesu yavavoolela, “Litimoni shikali lili mwinzi tawe; navutswa mbetsanga Tata wanje luyali; na munyi mwambakhananga khumba luyali.

⁵⁰Khali ndio, shikali khavanga vukhumi vwanje mwene tawe; navutswa khuliho nu mulala wenyanga khuheelwa vukhumi, khandi neye mukhalachi.

⁵¹Muvoolelanga toto ndi niiva mundu alalonda makhuva kaanje, shianyala khukhutsa tawe.”

⁵²Vayahudi vamuvoolela, “Khwakhamanya nunundi ndi litimoni lili mu yivi! Aburahamu yakhutsa, khali vaprofeti nivakhutsa; nikhali uvoolanga, ‘Niiva mundu alalonda makhuva kaanje, shianyala khukhutsa tawe.’

⁵³Unyala khuva wavira kuuka weru Aburahamu wakhutsa khale? Khali vaprofeti vakhutsa. Ulolanga uli viina?”

⁵⁴Yesu yachipa, “Niiva nyala khwihaanila vukhumi mwene, vukhumi vwanje vuvula vukhonyi vwosi. Tata wanje, wamulaanganga Nyasaye wenyu, neye ukhuminyanga.

⁵⁵Munyi mwakorwa Tata wanje, navutswa inzi namumanya. Niiva nakhavooli namukorwa, nyala khuva muvehi khuli munyi. Navutswa namumanya khandi nondanga likhuva lielie.

⁵⁶Kuuka wenyu Aburahamu yikhoya, lwa yahulila litukhu liu khwitsa khwanje; yalilola nasangala.”

⁵⁷Vayahudi vareeva Yesu, “Ushili khali khutukha mihika makhomi karanu! Uvoolanga walolakhu Aburahamu?”

⁵⁸Yesu yachipa, “Muvoolelanga toto ndi Aburahamu nashili khwivulwa, ‘Nali nindiho.’ ”

⁵⁹Khulwa yako, vatola machina nivenya khulesa Yesu; navutswa Yesu yivisa narula mu Litempeli lienelo.