Read tsotso VIKHOLWA 10 Bible Online

VIKHOLWA 10 - tsotso bible

VIKHOLWA 10

¹Khwali nu mundu mu litaala lia Kaisaria walaangwangwa Koronelia, wali mwimilili wu mukaanda kwa vasikali imia indala kwa Varoma, kwalaangwangwa “Mukaanda kwa Vataliani.”

²Koronelia yali mundu mulahi. Ye mwene nende vandu vi inzu yeye voosi vaheetsanga Nyasaye luyali. Yachelitsa khandi khukhonya Vayahudi vamanani. Yali wamenya nasaalanga khandi shia khase khosi khu Nyasaye.

³Himbi tsisaa tisa tsiu mbasu, Koronelia yalola mu malolo injelosi ya Nyasaye. Injelosi yeneyo yinjila havundu ha yali nali nimulaanga, “Koronelia!”

⁴Koronelia yaheenza injelosi naria. Yareeva, “Mwami, ni shina?” Injelosi yamuchipa, “Nyasaye uyaanzitswi ni lisaala liolio nende vikholwa viovio viu khukhonya vamanani, khandi wirecheshe khukhuchipa.

⁵Ruma nunundi vandu khutsia mu litaala lia Yopa, khulaanga mundu ulaangwangwa Simoni Petro.

⁶Amenyanga mu inzu yu mulombi wa maseelo ulaangwangwa Simoni, uli na hango hehe himbi khu inyanza.”

⁷Lwa injelosi yali nilomolome khuye yarulaho. Koronelia yalaanga varumishi vavili khu varumishi veve nende musikali, wali niyasuuvila mu idini khurula mu vasikali vamulindanga.

⁸Koronelia yavavoolela kali nikakholeshe, navaruma khutsia mu litaala lia Yopa.

⁹Litukhu lialondakhu, lwa vali nivali khu luchendo lwavo, nivali himbi khutukha mu litaala lia Yopa, Petro yanina khu shisechese shi inzu himbi tsisaa sita tsiu mbasu khutsia khusaala.

¹⁰Petro yahulila inzala nimulumanga, niyenya shiukhulia shialia; navutswa lwa vali nivashiteekhanga shiukhulia, yalola malolo

¹¹nalola likulu nilikushi; khandi shindu nishikhanga hasi khuli luvaala lukali nu lwishitswangwa khulilova mu tsikona tsialwo tsine.

¹²Khwalimu ni tsinyama tsiosi lukanu, vilombe vimolanga hasi, nende manyonyi.

¹³Mwoyo kwamuvoolela, “Petro, vukha; sinza nulia!”

¹⁴Navutswa Petro yavoola, “Mwami, ni kilikali, shinyala khukhola kenako tawe! Shili khuliakhu shindu shiosi shioneshe inoho shiononyinywa.”

¹⁵Mwoyo kwalomoloma khuye lwa khavili, nu kuvoola, “Shia Nyasaye amali khutakasa, uvuli khukanakana ndi shioneshe.”

¹⁶Yaka kikholekha hali khavaka; ma luvaala lwenolo nu lukalushitswa vwangu mwikulu.

¹⁷Lwa Petro yali nashichenyanga khulondokhana khu ka malolo kenako kavoolanga, vandu va Koronelia yali narumi vatukha havundu ha inzu ya Simoni yali nili; nivasinjila ha shilivwa.

¹⁸Valaanga nivareeva, “Khulikhu nu mucheni hanu ulaangwangwa Simoni Petro?”

¹⁹Lwa Petro yali nashikanakananga makhuva khulondokhana khu malolo kenako, Roho yamuvoolela, “Simoni, vandu vavaka vali hanu vakhukhavanga.

²⁰Sinjila ukholomoshe hasi; uvalonde vwangu vuchila khuhaya haya, shichila inzi varumi.”

²¹Petro yakholomokha hasi, navavoolela, “Ninzi mundu wamukhavanga. Shichila shina numwitsa?”

²²Vamuchipa, “Mwimilili wa vasikali imia indala imia indala va Varoma, nali Koronelia, ukhurumi. Nu mundu mulahi usaalanga khu Nyasaye; khandi Vayahudi voosi vamuha luyali. Injelosi ya Nyasaye yamuvoolela akhwinjilitsi munzu mwemwe, khu ahulili makhuva ka uvoola.”

²³Khulwa yako, Petro yavinjilitsa munzu mwenomo navavoolela vakonemu. Litukhu lialondakhu, yirechekha nasimukha natsia navo; vasimukha nivatsia khandi na vasuuvili vi litaala lia Yopa.

²⁴Litukhu lialondakhu, vatukha mu litaala lia Kaisaria. Koronelia yali navalindililanga khandi yali ulaanji viikho veve nende valina veve vahimbi.

²⁵Lwa Petro yali nali himbi khwinjila munzu, Koronelia yamwakanila, nasikama imbeli wewe khandi namwinamila.

²⁶Navutswa Petro yamukumila mukhono; namuvoolela, “Sinjila; inzi nu mundu vutswa.”

²⁷Petro yatsililila khulomoloma khu Koronelia, lwa yali niyinjilanga munzu, wa yanyola vandu vanyishi nivakanile halala.

²⁸Petro yavavoolela, “Munyi vene mwamanya ndi khulondokhana na malako keru nu vutamanu Muyahudi khuhaambana nu mundu urulanga mu vandu vi tsimbia tsindi inoho khumucheniha. Navutswa Nyasaye umali khumanyinya mbuli khuvukulakhu mundu wosi khuva woneshe inoho wayononyinywa.

²⁹Lwa warumana wenyanga khulola inzi, niitsa vuchila khwambakhana. Khureevanga, umbolele shivune shiachila nurumana wenyanga khulola inzi?”

³⁰Koronelia yachipa, “Matukhu kane kaviri yako, himbi isaa khuli yinu, nali nisaalanga mu inzu yanje tsisaa tisa tsia halukolovo. Nonoho lwa mundu niyifwali tsinguvu tsindavu tsiang'ang'anga, yasinjila imbeli wanje

³¹nalaanga, ‘Koronelia! Nyasaye umali khuhulila lisaala liolio khandi witsushitse vihanwa viovio viu khukhonya vamanani.

³²Ruma mundu atsi mu litaala lia Yopa khulaanga mundu ulaangwangwa Simoni Petro. Nu mucheni mu inzu yu mulombi wa maseelo ulaangwangwa Simoni, uli na hango hehe himbi khu inyanza.’

³³Khulwa yako, narumana witsi vwangu; khandi ukholi vulahi khwitsa. Khuli hanu voosi nunundi imbeli wa Nyasaye, ninindililanga khuhulishitsakhu shindu shiosi shiu Mwami akhuvoolele uvoole.”

³⁴Nalwo lwa Petro yaraanga khulomoloma navoola, “Ni kilikali, nakhamanya nunundi ndi Nyasaye shianyala khwihonelakhu mundu wosi tawe.

³⁵Shia mundu wosi, ave arulanga mu vandu vuluhia shina, umuheetsanga luyali nu khukhola vikholwa viu vulunji neye wa ahuchililanga.

³⁶Mwamanya likhuva lia yaruma khu Vaisraeli, nilili liu khwilwatsa Ivanjeli ileranga milembe khuvirila mu Yesu Kristo, uli Mwami wamihanga shia shindu shiosi.

³⁷Mwamanyakhu kakholekha shia havundu hosi mu lusomo lwa Yudeya, khuraanjila mu Galilaya, lwa Yohana yilwatsa makhuva khulondokhana khuli ye mwene yabatiswa.

³⁸Mwamanya Yesu wa Nazareti, khandi khuli Nyasaye yamurovola namuha Roho Mutakatifu nende tsingulu. Mwamanyakhu khuli yachenda chenda shia havundu hosi, nakholanga malahi khandi nahonyinyanga vandu voosi vatambitswangwa ni Ibilisi, shichila Nyasaye yali naye.

³⁹Khuli vashiahidi va shia shindu shiosi shia yakhola mu shivala shia Vayahudi nende mu Yerusalemi. Vamwiira lwa vamuvamba khu musalaba.

⁴⁰Navutswa Nyasaye yamwisimushitsa khurula mu likhutsa khulitukhu lia khavaka, namukhola khulolekha khu vandu;

⁴¹shikali vandu voosi vamulolakhu tawe; navutswa yalolwa na khutsi va Nyasaye yali niyarovola khuva vashiahidi; nakhwo khuvoola, khutsi va khwalia nu khung'wa naye ni yakhisimukha khurula mu likhutsa.

⁴²Yesu yakhuha lilako liu khwilwatsa Ivanjeli khu vandu, nu khuhaana vushiahidi khulondokhana khuye ndi neye wa Nyasaye yarovola khuva mukhalachi wa vandu vashili mwoyo nende yavo vakhutsa.

⁴³Vaprofeti voosi valomoloma makhuva khulondokhana khuye, nivavoola ndi mundu uliitsa khusuuvila muye, aliitsa khusemehwa khurula mu vwoni vwevwe khuvirila khu lira lielie.”

⁴⁴Lwa Petro yali nashilomolomanga makhuva kenako, vandu voosi vamuhulishitsa niyilwatsanga likhuva, vanyola Roho Mutakatifu.

⁴⁵Vayahudi vasuuvili vali nivitsi halala na Petro khurula mu litaala lia Yopa vali ni lichenya; shichila Nyasaye yahaana khandi shihanwa shieshie shia Roho Mutakatifu khu vandu vi tsimbia tsindi;

⁴⁶shichila va vahulila nivalomolomanga mu tsinomonomo tsindi, ni vitsominya vukhumi vwa Nyasaye. Petro yalomoloma navoola,

⁴⁷“Vandu yava vanyoli Roho Mutakatifu, khuli khwanyola khandi. Khuliho nu mundu unyala khuvikalila khubatiswa na matsi?”

⁴⁸Khulwa yako, Petro yahaana lilako ndi vabatiswi khuvirila mu lira lia Yesu Kristo. Vareeva Petro amenye navo khumatukhu mati.