Read tsotso VIKHOLWA 23 Bible Online

VIKHOLWA 23 - tsotso bible

VIKHOLWA 23

¹Paulu yaheenza vulunji mu vandu vi Shikhaalo navoola, “Vaisraeli vashianje! Tsinganakani tsianje tsiu mukari ni tsindahi khulondokhana khuli namenyanga imbeli wa Nyasaye khutukha nunundi.”

²Mukali wa vasalisi voosi Anania yavoolela vandu vali nivasinjile himbi khu Paulu, vamusamuli khuluseye.

³Paulu yamuvoolela, “Yivi usasanga khuli lisisi liavekhwa ilaanji indavu, Nyasaye alakhurumula! Ni kilikali, wikhale yaho khukhalachila khulondokhana na malako; navutswa yivi umenekanga Malako, lwa uhaananga lilako samulwi?”

⁴Vandu vali nivasinjile himbi khu Paulu vavoola, “Toto, unyala khunyeka Mukali wa vasalisi voosi wa Nyasaye?”

⁵Paulu yachipa, “Munyi Vaisraeli vashianje, shimbele nimanyi nu Mukali wa vasalisi voosi tawe; shichila Mahandiko Matakatifu kavoolanga, ‘Ukhalomolomakhu shindu shitamanu khulondokhana khu mwamihi wa vandu venyu tawe.’ ”

⁶Navutswa lwa Paulu yamanya ndi valala khu vandu vi shituma ni Vasadukayo na vandi ni Vafarisayo, yalaanjilila mu Shikhaalo navoola, “Munyi Vaisraeli vashianje! Inzi nu Mufarisayo, mwana wa Vafarisayo. Vanzalanga hanu, shichila lisuuvilitswa liandi nalio ndi vandu vakhutsa valiitsa khwisimukha khurula mu likhutsa!”

⁷Lwa yali niyakhavoola ndio, Vafarisayo nende Vasadukayo varaanga khuhingalitsana mulilomoloma; ma shituma shia vandu ni shiavukhanamu hali khavili.

⁸Vasadukayo vavoolanga ndi khwisimukha khwa vandu khurula mu likhutsa, tsinjelosi inoho roho vivulaho; navutswa Vafarisayo vasuuvila mu vindu vivaka vienevo viosi.

⁹Vandu vatsililila khulaanjilila; ma valala khu veechitsi va Malako nivali vu mukaanda kwa Vafarisayo vasinjila nivahangalitsana mulilomoloma vululu, nivavoola, “Mundu uyu avulakhu shindu shitamanu shianyala khuva nakholi. Haundi ni kilikali, roho inoho injelosi yalomolome khuye!”

¹⁰Mahangalitsani kali nu vululu, nikalomba mwimilili wa vasikali va Varoma khuria ndi Paulu yakhavulanyinywi mu vitonye. Khulwa yako, yavoolela vasikali veve vakholomoshe vatsi khurulitsa Paulu muvo, vamuhile havundu ha vasikali vamenyanga.

¹¹Vutukhu vwalondakhu, Mwami yasinjila himbi na Paulu; navoola, “Uve ni ikholo! Lwa uhaani vushiahidi vwovwo khulondokhana khwinzi hanu mu Yerusalemi, nindio khandi utsitsanga khuhaana vushiahidi vwovwo khulondokhana khwinzi mu litaala lia Roma.”

¹²Khulitukhu lialondakhu mu mavwevwe, Vayahudi valala vakana nivaloshitsa ka vakhola. Visuhitsana vene khuvene ndi shivanyala khuliakhu inoho khung'wakhu, nivashili khwiira Paulu tawe.

¹³Vandu valoshitsa khukhola ndio vali vanyishi khuvira makhomi kane.

¹⁴Vasimukha nivatsia khu vasalisi vakali nende vasakhulu; nivavoola, “Voosi khwisuuhitsane ndi shiukhunyala khuliakhu, nu khushili khwiira Paulu tawe.

¹⁵Mwenyekhanga munyi halala na vandu vi Shikhaalo mutsi khu mwimilili wa vasikali, nu khwikhola mwenyanga khumanya katoto kachilanga Paulu nayaalwa. Muvooleli amulerele Paulu mushiina shienyu. Navutswa khuliitsa khuva nu khwirecheshe khumwiira, nashili khali khutukha hanu.”

¹⁶Navutswa khootsa wa Paulu yahulila ka vali nivaloshitsi kenako. Khulwa yako, yasimukha natsia khwinjila havundu ha vasikali vamenyanga; navoolela Paulu.

¹⁷Nalwo lwa Paulu yalaanga musikali mulala khu vimilili va vasikali imia indala; namuvoolela, “Hila musatsa muvukha uyu khu mwimilili wa vasikali; ali na makhuva ka yenyanga khumuvoolela.”

¹⁸Mwimilili wasinjililanga vasikali mwenoyo yamuvukula namuhila khu mwimilili wa vasikali. Yavoola, “Muvohe ulaangwangwa Paulu, ambolele khulerele musatsa muvukha uyu, shichila ali na makhuva ka yenyanga khukhuvoolela.”

¹⁹Mwimilili wa vasikali yamukumila mukhono, namusuunda haluveka namureeva, “Ni shina shia wenyanga khumbolela?”

²⁰Yavoola, “Vimilili va Vayahudi vahuchilitsane vakhureeve uhili Paulu imbeli wi Shikhaalo mukamba, nu khwikhola ndi Shikhaalo shienyanga khumanya katoto khulondokhana khu Paulu.

²¹Navutswa uvuli khuvahulishitsa; shichila khuliitsa khuvaho na vandu vanyishi khuvira makhomi kane, nivivisi nivamulindililanga. Visuhitsane vene shivanyala khuliakhu shiukhulia inoho khung'wakhu shindu shiosi, nivashili khwiira Paulu tawe. Virecheshe nunundi khukhola ndio, khandi valindililanga uvavoolele ka vakhola.”

²²Mwimilili wa vasikali yamuseevula, namuvoolela, “Ukhavoolelakhu mundu wosi makhuva kumbolele tawe.”

²³Mwimilili wa vasikali yalaanga vavili khu vasikali veve navavoolela, “Murecheshitsi vasikali tsimia tsivili khandi vi tsifarasi makhomi saba nende vandi tsimia tsivili va marimu, mavirecheshe khutsia mu litaala lia Kaisaria tsisaa tsivaka tsiu vutukhu khutsia.

²⁴Muhe Paulu tsifarasi tsianinakhu, khandi mumuchenditsi vulahi khutukha khu gavana Felikisi.”

²⁵Khulwa yako, mwimilili wa vasikali mwenoyo yahandika ibarwa ilimu na makhuva yaka:

²⁶“Inzi Kilaudia Lusiha, mbandikanga khu yivi gavana Felikisi waheelwa luyali: Nyola milembe.

²⁷Vayahudi vakumila mundu uyu, nivava himbi khumwiira. Nanyola ndi nu Muroma, ninzia na vasikali vaanje, manimuhonyinya.

²⁸Nyenyanga manye shivune shichilanga nivamuyaala, nimuhila mu Shikhaalo shiavo.

²⁹Nanyola ndi shikali yali niyakholakhu shindu shitamanu shinyala khuchila yiirwi inoho avohwi mucheela tawe; navutswa vamuyaalanga khulondokhana khu mareevo shichila malako kavo.

³⁰Lwa navoolelwa valoshitsi khuli vamwiira, namuruma khu yivi vwangu. Navoolela vandu vamuyaalanga vakhulerele imbeli wowo vindu vichilanga nivamuyaala.”

³¹Vasikali vakhola khuli vavoolelwa. Vavukula Paulu mu vutukhu vwenovo, nivatukha mu litaala lia Antipaturi.

³²Litukhu lialondakhu, vasikali vali nivachendi khu vilenje vakomokha nivakalukha havundu ha vasikali vamenyanga; manivalekha vasikali vi tsifarasi vatsililile nu luchendo naye.

³³Lwa vatukha mu litaala lia Kaisaria, vavukula ibarwa ya vali nivali nayo, nivaha gavana Felikisi; khandi nivalavushitsa Paulu khuye.

³⁴Gavana Felikisi yasoma ibarwa yeneyo, nareeva Paulu amuvoolele lusomo lwarulamu. Lwa yanyola likhuva ndi Paulu arulanga mu lusomo lwa Kilikia,

³⁵gavana yavoola, “Nzitsanga khuhulila makhuva koko, lwa vandu vakhuyaalanga valiitsa khuva nivatukha hanu.” Khulwa yako, yahaana lilako Paulu alindwi mu inzu yu Mwami Herode.