Read tsotso VIKHOLWA 5 Bible Online

VIKHOLWA 5 - tsotso bible

VIKHOLWA 5

¹Navutswa mundu mulala walaangwangwa Anania nende mukhali wewe Safira, vakuulitsa khandi mulimi kwavo.

²Mwene yahulishitsana nu mukhali wewe khuvisa tsisenti tsindala khu tsia vali nivanyoli. Yavukula tsisenti tsiali nitsirikale naha varumwa.

³Navutswa Petro yamuvoolela, “Anania, shichila shina nuhuchilila Shetani khukhwimilila khukaata Roho Mutakatifu, lwa wavisa tsisenti tsindala, tsia wali nunyoli nu wakhakuulitsa mulimi?

⁴Lwa wali nushili khukuulitsa mulimi kwenoko, ni kilikali, kwali nu kushili kwokwo. Navutswa lwa wakuulitsa, tsisenti tsiali tsiotsio tsiu khurumishila khuli wenyi. Shichila shina nukhola shindu khuli shienesho? Shikali ukaati vandu tawe, navutswa Nyasaye!”

⁵Lwa Anania yahulila makhuva kenako, yakwa hasi nakhutsa. Shia mundu wosi wahulila makhuva kikholekha yaria.

⁶Vasatsa vavukha vatukhaho, nivalinga mmbili kwekwe, nivakuhila ilwanyi, khutsia khukuyeveela mu shilindwa.

⁷Himbi tsisaa tsivaka nitsiakhavira, mukhali wewe yinjilamu, vuchila khumanyakhu shindu shiosi khu kali nikakholeshe.

⁸Petro yamureeva, “Mbolela niiva yitsi natsio tsisenti tsiosi tsia yivi nende Anania mwanyola, lwa mukuulitsa mulimi kwenyu?” Yamuvoolela, “Natsio tsiosi tsia khwanyola.”

⁹Navutswa Petro yavoolela Safira, “Shichila shina nuhulishitsana nu musatsa wowo khuchelitsa Roho wu Mwami Nyasaye? Lola! Vandu vasimukha nivatsia khuyeveela mu shilindwa mmbili ku musatsa wowo, vali ha muliango nunundi. Valavukula mmbili kwokwo khukuhila khandi ilwanyi!”

¹⁰Safira yakwa vwangu hasi ha vilenje via Petro, nakhutsa. Lwa vayayi vavukha vinjilamu, vanyola namali khukhutsa khale. Varulitsa mmbili kwekwe, nivakuyeveela mu shilindwa himbi ha shilindwa shiu musatsa wewe.

¹¹Vandu vi likanisa liosi nende vandi voosi vatechela, lwa vahulila makhuva khulondokhana khu vindu viali nivikholeshe vienevo.

¹²Varumwa vakhola viloleshitsu nende vindu vinyishi viu khuchenyinya mu vandu. Vasuuvili voosi vakanila halala mu Lusimbu lwa Solomoni.

¹³Mundu avulakhuho khuvo wachelitsa khwiyunga navo, navutswa vandu vali nivavaha luyali.

¹⁴Navutswa vandu vasatsa nende vakhali vanyishi vasuuvila mu Mwami, vameetekha mu vunyishi khu shituma shiavo.

¹⁵Khurulana khu ka varumwa vakholanga, vandu valwala valerwa mu tsinjila tsi litaala, nivalishitswi khu vitali nende viseelo, khu nikanyalikha shinini shia Petro shivirili khu valala khuvo lwa ava nachendanga naviraho.

¹⁶Vandu vanyishi valiho khandi khurula mu mataala kali himbi Yerusalemi, nivalera vandu valwala nende va matimoni kanyashitsanga; ma voosi nivahonyinywa.

¹⁷Navutswa Mukali wa vasalisi voosi, na veshie va yali navo, nu kuli mukaanda kwa Vasadukayo valolela varumwa imbotokha.

¹⁸Vakumila varumwa nivavavoha mucheela ya vandu voosi.

¹⁹Navutswa mu vutukhu vwenovo, injelosi yu Mwami Nyasaye yalaminya miliango chiu mucheela, nivarulitswa ilwanyi; nivoola,

²⁰“Simushi mutsi khusinjila mu Litempeli muvoolele vandu makhuva khulondokhana khu vulamu yuvu.”

²¹Lwa varumwa vahulila makhuva kenako, vinjila mu Litempeli nu kushili mu mavwevwe nivaraanga khwechitsa. Isaa yeneyo, Mukali wa vasalisi voosi na veshie va yali nali navo valaanga Shikhaalo nende mukaanda kwosi kwa vasakhulu Vayahudi. Varumana likhuva varumwa valerwi khuvo khurula mucheela.

²²Navutswa, lwa vandu venavo vatukha mucheela, vanyola varumwa nivarulimu. Navutswa vakalukha khu shikhaalo, nivavavoolela,

²³“Lwa khwatukha hacheela, khuchinyoli niyikalwi vutinyu, khandi valindi nivasinjile ha miliango; navutswa lwa khwikula miliango, mundu avulakhuho wa khunyola mukari mwenomo.”

²⁴Lwa vasalisi vakali nende mwimilili wa valindi vi litempeli vahulila ndio, vali ni lichenya linyishi, nivavula khumanyakhu shindu shiosi khulondokhana khu varumwa.

²⁵Khulwa yako, mundu wundi yinjilamu navavoolela, “Hulishitsi! Vandu va mwavoha mucheela vali mu Litempeli, veechitsanga vandu!”

²⁶Nalwo lwa mwimilili wa valindi mwenoyo halala na vandu veve vasimukha nivatsia khulera varumwa, vuchila khurumishila tsingulu; shichila varia vandu vanyala khuvalesa na machina.

²⁷Lwa valera varumwa, va vasinjilitsa imbeli wi Shikhaalo. Mukali wa vasalisi voosi yavareeva mareevo.

²⁸Yavoola, “Khwamukaya nu vululu khuvula khwechitsa khuvirila khu lira liu mundu uyu; navutswa lolikhu kamukholi! Mulanditsi mechitso kenyu shia havundu hosi mu Yerusalemi; khandi muli ninganakani yu khwenya vandu vakhuvukule khuva nu khutsi khwachila mundu uyu niyiirwa.”

²⁹Petro nende varumwa vandi vachipa, “Khutukha khulonde malako ka Nyasaye khuvira khulonda vandu.

³⁰Nyasaye wa vakuuka veru neye wisimushitsa Yesu khurula mu likhutsa, wa mwiira lwa mwamuvamba khu musalaba.

³¹Nyasaye yamuchinguula namwikhalitsa khuluveka lu mukhono kwekwe musatsa, khumukhola khuva Mwimilili khandi Muhonyinyi, khukhola Vaisraeli khwikanila nu khusemehwa khurula mu vwoni.

³²Khuli vashiahidi vi vindu vienevo, khali Roho Mutakatifu, wa Nyasaye yahaana khu yavo valondanga malako keke nu mushiahidi.”

³³Lwa vandu vi Shikhaalo shienesho vahulila ndio, vali nu vurima, khali nivenya khwiira varumwa.

³⁴Navutswa mulala khu vandu vi Shikhaalo shienesho, wali Mufarisayo walaangwangwa Gamalieli, wali mwechitsi wa Malako, khandi wa vandu voosi vaheetsanga luyali, yasinjila mu Shikhaalo. Yahaana lilako varumwa vahilwi ilwanyi hatititi.

³⁵Gamalieli yavavoolela, “Vaisraeli vashianje, muve vacheli khulondokhana khu ka mwenyanga khukhola vandu yava.

³⁶Mumatukhu kavira, khwali nu mundu mulala walaangwangwa Tsehudasi, wali niyikhola khuva mundu wi tsingulu; khandi himbi vandu tsimia tsine viyunga naye. Navutswa yiirwa, valondi veve voosi nivasalana, khandi mukaanda kwekwe nu kuva kwi shikhaya.

³⁷Matukhu mati nikakhavira, Yudasi wali Mugalilaya yalolekha mumatukhu ki livalitswa lia vandu; khandi vandu vanyishi nivamulonda. Navutswa khali ye mwene yiirwa, ma valondi veve voosi nivasalana shia havundu hosi.

³⁸Khulwa yako, khulondokhana khu kaliho nunundi, nu vulahi khulekhana na vandu yava! Leshi vatsi! Niiva ka venyanga khuloshitsa inoho khukhola karulanga khu vandu, kaliitsa khuvula khurweshitswa.

³⁹Navutswa niiva karulanga khu Nyasaye, shiumunyala khuvikalila tawe. Munyala khunyolekha numukwananga Nyasaye.” Vandu vi Shikhaalo valonda inganakani ya Gamalieli yali navavoolele.

⁴⁰Valaangamu varumwa, nivavashuta shivoko nivavakaya vavuli khulomolomakhu khandi khuvirila khu lira lia Yesu. Nivavavoholola.

⁴¹Lwa Varumwa varula imbeli wi Shikhaalo, vali nu vuyaanzi, shichila vali vatushili khunyakhana nu khukholelwa tsisoni, shichila lira lia Yesu.

⁴²Varumwa vatsililila khwechitsa nu khwilwatsa Ivanjeli shia litukhu mu Litempeli nende mu tsingo tsia vandu, nivavoolela vandu ndi Yesu ni Masiha.