Read tsotso VIKHOLWA 9 Bible Online

VIKHOLWA 9 - tsotso bible

VIKHOLWA 9

¹Navutswa Saulu, nashitsilililanga khusioma nu vululu khuli anyala khwiira valondi vu Mwami, yasimukha natsia khu Mukali wa vasalisi voosi.

²Yamureeva tsibarwa tsiu khwilavushitsa mu masinagogi ki litaala lia Damasika, khu nikava anyala khunyolamu valondi voosi, vave vandu vasatsa inoho vakhali valondanga Injila yu Mwami yamanyinya, avakumile, nu khuvakalushitsa Yerusalemi.

³Lwa Saulu yali nali khu luchendo lwelwe himbi khutukha mu litaala lia Damasika, nonoho lwa vulavu khurula mwikulu vwamwashila shia havundu hosi.

⁴Saulu yakwa hasi, nahulila mwoyo nu kumuvoolela, “Saulu, Saulu, shichila shina undambitsanga?”

⁵Saulu yareeva, “Mwami, uli viina?” Yamuvoolela, “Ninzi Yesu, nindi woyo wa utambitsanga.

⁶Navutswa sinjila utsi mu litaala likali, wa uliitsa khuvoolelwa ka ukhola.”

⁷Vandu vali nivali khu luchendo halala na Saulu vasinjilaho, vuchila khulomolomakhu shindu shiosi. Vahulila mwoyo nu kulomolomanga, navutswa mundu avulakhuho wa valolakhu.

⁸Saulu yasinjila khurula hasi. Navutswa lwa yatemula tsimoni tsietsie, shiyalolakhu shindu shiosi tawe. Khulwa yako, vamukumila mukhono nivamuhila mu litaala lia Damasika.

⁹Saulu yamala matukhu kavaka vuchila khulolakhu; khandi yakhaywa khulia inoho khung'wakhu shindu shiosi khumatukhu kenako.

¹⁰Mumatukhu kenako, khwali nu mwechi mu litaala lia Damasika walaangwangwa Anania. Mwami yamulaanga khuvirila mu malolo “Anania!” Anania yamuchipa, “Mwami, ndi hanu.”

¹¹Mwami yamuvoolela, “Simukha utsi ha Injila Yalunjikha, ureeve nuli mu inzu ya Yuda, mundu wi litaala lia Tarisa ulaangwangwa Saulu. Saulu yali nasaalanga isaa yeneyo.

¹²Saulu yali uloli mundu ulaangwangwa Anania mu malolo witsi khumuvikhakhu makhono, nikanyalikha khandi alole.”

¹³Navutswa Anania yamuchipa, “Mwami, vandu vanyishi vambolele makhuva khulondokhana khu mundu uyu; khandi khulondokhana khu vindu vitamanu viosi via yakhola vandu vovo mu Yerusalemi.

¹⁴Witsi hanu nu vunyali khurula khu vasalisi vakali, khukumila vandu voosi vasaalanga khu yivi.”

¹⁵Navutswa Mwami yamuvoolela, “Simukha utsi, shichila murovole khundumishila, khulomba lira lianje limanyikhane khu vandu vi tsimbia tsindi nende vami, khandi khu Vaisraeli.

¹⁶Inzi mwene niitsa khumumanyinya khuli aliitsa khunyakhana vululu muno shichila lira lianje.”

¹⁷Khulwa yako, Anania yarulaho natsia khwinjila munzu. Yavikha makhono keke khu Saulu, namuvoolela, “Musuuvili washianje Saulu, Mwami Yesu wakhuloleshela nuli khunjila ya walondelakhu nuwitsa hanu, undumi khu yivi, nikanyalikha ulole nu khwitsula Roho Mutakatifu.”

¹⁸Vindu viasasanga khuli vivakaya vi tsisutsi viarula vwangu mu tsimoni tsia Saulu, nakwa hasi, naraanga khandi khulola. Saulu yasinjila; manabatiswa.

¹⁹Yalia shiukhulia nanyola tsingulu. Saulu yamenya halala na veechi khumatukhu mati mu litaala lia Damasika.

²⁰Lwa yali nali mu masinagogi, yaraanga vwangu khwilwatsa ndi Yesu nu Mwana wa Nyasaye.

²¹Vandu voosi vamuhulila vali nilichenya; nivareevana vene, “Uyu shianyala khuva neye mundu wiiranga yavo vasaalanga khuvirila khu lira Yesu? Shishili shio shivune shimukholi khwitsa hanu, khukumila vandu nu khuvakalushitsa khu vasalisi vakali?”

²²Navutswa Saulu yatsililila khwilwatsa ni tsingulu tsinyishi khushila muno, namanyinya Vayahudi vi litaala lia Damasika, ni kilikali ndi Yesu ni Masiha.

²³Lwa matukhu manyishi kavira, Vayahudi valoshitsa khuli vanyala khwiira Saulu,

²⁴navutswa Saulu yavoolelwa ka vali nivaloshitsi khumukhola. Vutukhu nu mbasu vaheenzelelanga khu vilivwa vi litaala likali, khumwiira;

²⁵navutswa veechi veve vamuvukula mu vutukhu, nivamwishitsila mu shikabu khuvirila munduhu yali nili mu lisisi.

²⁶Lwa Saulu yatukha Yerusalemi, yachelitsa khwiyunga na veechi; navutswa voosi vamuria, shichila shivamusuuvila khuva mulala khu veechi tawe.

²⁷Navutswa Baranaba yavukula Saulu, namuhila khu varumwa. Yavavoolela havulavu khuli Saulu yalola Mwami, nali khu muhaanda; khandi khuli Mwami yalomoloma khuye; khandi khulondokhana khuli yilwatsa mu litaala lia Damasika, vuchila khuria khuvirila mu lira lia Yesu.

²⁸Khulwa yako, Saulu yamenya navo, nachenda navo shia havundu hosi mu Yerusalemi; khandi niyilwatsa vuchila khuria khuvirila mu lira liu Mwami.

²⁹Saulu yalomoloma nahangalitsana mulilomoloma na Vayahudi valomolomanga Luguriki; navutswa vachelitsa khumwiira.

³⁰Lwa vasuuvili vahulila ndio, vahila Saulu mu litaala lia Kaisaria; nivamuruma khutsia mu litaala lia Tarisa.

³¹Mumatukhu kenako, likanisa liali ni milembe, khandi liatsililila khuva na vasuuvili vanyishi shia havundu hosi mu tsisomo tsia Yudeya, Galilaya, nende Samaria. Liali ni isavu inyishi ya vasuuvili, shichila liaheetsanga Mwami luyali khandi shichila Roho Mutakatifu neye walikhonya.

³²Litukhu lindi, lwa Petro yali nachenda chendanga shia havundu hosi, yatukha khali havundu ha vandu va Nyasaye vamenyanga mu litaala lia Luda.

³³Petro yanyolayo mundu walaangwangwa Aineya. Aineya yali wafwokoya khandi yali wamenya khu shitali khumihika munane, vuchila khuvukhakhu khurula mu tsindolo.

³⁴Petro yamuvoolela, “Aineya, Yesu Kristo umali khukhuhonyinya. Sinjila ulombe shitali shioshio.” Aineya yasinjila vwangu.

³⁵Vandu voosi vamenyanga mu mataala ka Luda nende Sharoni valola Aineya, nivaraanga khusuuvila mu Mwami.

³⁶Mumatukhu kenako, khwali nu mweechi wundi mu litaala lia Yopa walaangwangwa Tabitsa. (Muluguriki lira lielie ni Dolika, livoolanga “impongo.”). Yali wamenya nakholanga vikholwa vilahi, khandi yali nu mwoyo ku khukhonya vamanani.

³⁷Mumatukhu kenako, Tabitsa yalwala, nakhutsa. Nivakhasinga mmbili kwekwe, vakuvikha munzu yikolofa.

³⁸Litaala lia Yopa liali himbi mu litaala lia Luda. Navutswa lwa veechi vahulila ndi Petro ali mu litaala lia Luda, varuma vandu vavili khutsia khumuvoolela, “Nuyaanza hamba vwangu ukhulole vuchila khucheleva.”

³⁹Khulwa yako, Petro yasimukha natsia navo. Lwa yatukhaho, vamuhila munzu yikolofa. Vakhutsukhali voosi vasinjila himbi khu Petro, nivalilanga; khandi nivamumanyinya tsikaanzu nende tsinguvu tsindi, tsia Dolika yali niyanava nashili mwoyo.

⁴⁰Navutswa Petro yavakhunga khurulamu, nasikama hasi khusaala. Lwa yakalukhana naheenza mmbili ku mukhutsu, yavoola, “Tabitsa, vukha.” Yatemula tsimoni tsietsie; niyakhalola Petro, nalwo lwa yikhala hasi.

⁴¹Petro yamukumila mukhono, namusinjilitsa. Yalaanga vasuuvili voosi nende vakhutsakhali, navaha Dolika nali mwoyo.

⁴²Makhuva kenako kalanda shia havundu hosi mu litaala lia Yopa; ma vandu vanyishi nivasuuvila mu Mwami.

⁴³Petro yatsililila khumenya khumatukhu manyishi mu litaala lia Yopa, halala nu mulombi wa maseelo walaangwangwa Simoni.