Read tsotso VAROMA 15 Bible Online

VAROMA 15 - tsotso bible

VAROMA 15

¹Khutsi va khuli ni tsingulu mu lisuuvila khutukha khukhonye vandu vateteshele mu matiinyu kavo. Khuvuli khwiyaanzitsa vene.

²Shia mulala khu khutsi khutukha ayaanzitsi mureende wewe khumukholela malahi, khandi khumumbakha mu lisuuvila.

³Shikali Kristo yali wayiyaanzitsa mwene tawe. Navutswa khuli Mahandiko Matakatifu kavoolanga, “Manyeko ka mwanyekwa nako khandi ka nanyekwa.”

⁴Shia shindu shiosi shiahandikwa mu Mahandiko Matakatifu, shiahandikwa khulu khwechitsa khutsi, khu khuve ni lisuuvilitswa khuvirila mulikhutsila nende litinyilitswa lia Mahandiko Matakatifu ka khuheetsanga.

⁵Nyasaye uli khuli shirula shiu vwikhutsili nende litinyilitswa, amuhe mwoyo ku khumukhola muhambane mu limenya lienyu, khulondokhana khuli Yesu Kristo yakholanga,

⁶khu munyi voosi khuvirila mu mwoyo mulala mulikhuminya Nyasaye, uli Tata wu Mwami weru Yesu Kristo.

⁷Khulwa yako, mwinjilitsane vene khuvene, khuli Kristo yamwinjilitsa, khwenya khuhaana vukhumi khu Nyasaye.

⁸Muvoolelanga ndi Kristo yali murumishi wa Vayahudi, khumanyinya ndi Nyasaye nu musuuvilwa, khandi khurweshitsa lilaaka lia yali ni yalaaka vakuuka vavo;

⁹khulwa yako, vandu vi tsimbia tsindi valikhuminya Nyasaye, shichila tsimbavasi tsietsie. Khuli Mahandiko Matakatifu kavoolanga, “Khulwa yako, niitsa khukhwitsominyila mu vandu vi tsimbia tsindi; khandi khwimbile tsinyimbo tsiu khukhwitsominya.”

¹⁰Mahandiko Matakatifu kavoolanga khandi, “Munyi vandu vi tsimbia tsindi, muve nu vuyaanzi, halala na vandu va Nyasaye!”

¹¹Kavoolanga khandi, “Munyi vandu vi tsimbia tsindi tsiosi, mwitsominye Mwami; mumwitsominye, munyi vandu voosi!”

¹²Muprofeti Isaya atsilililanga khuvoola, “Mwitsukhulu wa Yese aliitsa khulolekha; neye uliitsa khwamiha vandu vi tsimbia tsindi, neye wa valiitsa khuvikhamu lisuuvilitswa.”

¹³Nyasaye, uli shirula shi lisuuvilitswa, amukhole khuva nu vuyaanzi vwosi nende milembe khurulana khu lisuuvila lienyu, khu mutsililile khuva ni lisuuvilitswa linyishi khuvirila mu Roho Mutakatifu.

¹⁴Vasuuvili vashianje, ndi ni lisuuvilitsa liatoto shichila munyi, lwa mukholanga vindu vilahi mu vunyishi, mwayitsula vucheli khulondokhana khu shia shindu shiosi, khandi munyala khwechitsana vene khuvene.

¹⁵Navutswa muhandichilikhu shindu vuchila khuria, khwenya khumwitsushitsa mumanyekhu shindu, shichila tsimbavasi tsia Nyasaye yamba

¹⁶khu mbe murumishi wa Yesu Kristo khu vandu vi tsimbia tsindi. Kholanga muhinzilu khuli musalisi, lwa nzilwatsanga Ivanjeli ya Nyasaye, khu shihanwa shia vandu vi tsimbia tsindi valihaana shilihuchililwa, nishili shihanwa shiatakaswa khuye, khuvirila mu Roho Mutakatifu.

¹⁷Khulwa yako, nzilolelanga muhinzilu kwakholelanga Nyasaye khuvirila mu Kristo.

¹⁸Shinyala khuria khuvoolakhu shindu shiosi tawe. Navutswa navoola vutswa makhuva khulondokhana khu ka Kristo yarweshitsa khuvirila mwinzi, khulomba vandu vi tsimbia tsindi khusuuvila mu Nyasaye, khuvirila mu ka navoola nende vikholwa,

¹⁹khuvirila mu tsingulu tsi viloleshitsu nende vindu viu khuchenyinya; khandi khuvirila mu tsingulu tsia Roho wa Nyasaye. Khulwa yako, lwa narula Yerusalemi nimbotokhana khutsia khutukha mu litaala lia Ilurikumu, ni kilikali, nayilwatsa Ivanjeli khulondokhana khu Kristo.

²⁰Nzikombanga shia khase khosi khwilwatsa Ivanjeli havundu ha Kristo ashili khumanyikhanakhu khali hati hene, khu mbuli khuva nzilwatsanga havundu ha vandu vandi vilwatsa khale.

²¹Khuli Mahandiko Matakatifu kavoolanga, “Vandu vali nivashili khuvoolelwakhu shindu khulondokhana khuye, valiitsa khulola, khandi yavo vashili khuhulilakhu shindu khulondokhana khuye, valiitsa khuva ni limanya.”

²²Nashio shivune shinzikalilanga shia khase khosi nimbula khwitsa khumuchendelela.

²³Navutswa nunundi, lwa mali khukhola muhinzilu kwanje mu tsisomo tsinu; khandi shichila nali na mahulu khumihika minyishi khwitsa khumulolakhu,

²⁴ndi ni lisuuvilitswa liu khwitsa khumulolakhu lwa mba ninzitsanga mu shivala shia Sipania. Ndi ninganakani yu khumuchendelela, lwa niitsa khuva nimbiranga khandi nakhayaanzi mukhonye khu luchendo lwanje lu khutsia iweneyo, nimenyikhu na munyi khumatukhu mati.

²⁵Navutswa nunundi, ndi khu luchendo lu khutsia Yerusalemi khu muhinzilu ku khukhonya vandu va Nyasaye vamenyayo.

²⁶Makanisa mu tsisomo tsia Mekadonia nende Akaya kayirulitsa nu mwoyo mulala khuhaana vukhonyi khu vandu vamanani mu vandu va Nyasaye vali Yerusalemi.

²⁷Kayaanzitswa khukhola ndio; khandi toto ni likoovi khuko. Navutswa khuli kuli mwiima, khutukha ka vakhonye. Niiva Vayahudi vasanganga mu tsikhaavi tsia Nyasaye, halala na vandu vi tsimbia tsindi, khutukha vandu vi tsimbia tsindi varumishile miandu chiavo khukhonya Vayahudi.

²⁸Lwa mba ninakhamala muhinzilu yuku, khandi ninakhavaha tsisenti tsiosi tsiasololwa khuvakhonya, niitsa khutsia mu shivala shia Sipania; niitsa khumuchendelela lwa mba nindi khu luchendo lwanje.

²⁹Lwa muchendelela, manyi ndi niitsa khumulerela mu vunyishi tsikhaavi tsia Kristo.

³⁰Vasuuvili vashianje, musayanga numuyaanza khuvirila mu Mwami weru Yesu Kristo, khandi khuvirila mu vuyaanzi vwa Roho ahaananga, ndi musanje ninzi khusaala nu mwoyo kwosi khu Nyasaye.

³¹Musaalilikhu ndi nzihonoloshe khurula mu vandu vambakhana khusuuvila mu lusomo lwa Yudeya; khandi ndi muhinzilu kwanje kulihuchililwa na vandu va Nyasaye vamenyanga mu Yerusalemi.

³²Khulwa yako, niiva ni lienya lia Nyasaye, niitsa khumuchendelela nindi nu vuyaanzi khandi nilihulukha na munyi.

³³Nyasaye uhaananga milembe ave na munyi voosi. Amina.