Read tsotso 1 VAKORINZO 2 Bible Online

1 VAKORINZO 2 - tsotso bible

1 VAKORINZO 2

¹Vasuuvili vashianje, lwa niitsa khumwilwatsila makhuva khulondokhana khu katoto kaviswa ka Nyasaye, shinarumishila makhuva matiinyu inoho ku vusitsa vwa vandu vasoma varumishilanga tawe.

²Lwa nali nishili na munyi, shinali ni lienya liu khwenya khumanya shindu shindi shiosi tawe. Nali vutswa ni lienya liu khwenya khumanya shindu khulondokhana khu Yesu Kristo, khushila muno khuli yavambwa khu musalaba.

³Niitsa khu munyi nindi nu vuteteshele, ninaria khandi natechelanga.

⁴Khwechitsa khwanje nende khwilwatsa khwanje shikhwarulanga khu makhuva ku vusitsa inoho lilomoloma lilahi liu khuyaanzitsa vandu tawe; navutswa khwenya vandu vamanye havulavu likhuva khurulana khu Roho nende tsingulu tsietsie.

⁵Namanya nikhola ndio, khu lisuuvila lienyu limanyikhane lirulanga khu tsingulu tsia Nyasaye; navutswa khu vusitsa vwa vandu tawe.

⁶Khali ndio, khwilwatsanga likhuva khulondokhana khu vusitsa khu vandu vahindila; navutswa shikali nu vusitsa vwa vandu vu mu shivala shinu inoho vwa vamihi va matukhu kanu, vuvwetsanga tsingulu tawe.

⁷Navutswa khwilwatsanga vusitsa vwaviswa khandi vushilli khumanyakhana vwa Nyasaye, vwa yali niyaviritsa vulilolekha matukhu ku khuheelwa vukhumi nikashili khutukha.

⁸Mwamihi avulakhuho mumatukhu kanu wamanya vusitsa vwenovo. Niiva vakhavele nivamanya vusitsa vwenovo, shivakhavambi Mwami wu vukhumi khu musalaba tawe.

⁹Navutswa, kali khuli Mahandiko Matakatifu kavoolanga, “Ku mundu ashili khulolakhu, inoho khuhulilakhu, ku mundu ashili khukanakanakhu kanyala khwikholekha, nako ka Nyasaye yirecheshitsila vandu vamuyaanza.”

¹⁰Navutswa Nyasaye wakhumanyinya makhuva kenako khuvirila khu Roho wewe. Roho akhavilitsanga shia shindu shiosi, khali shindu shiaviswa shia Nyasaye ali ni lienya liu khukhola.

¹¹Mwoyo ku mundu, nakwo kwonyene kwamanya kali mu tsinganakani tsiu mundu. Mundu avulakhuho wamanya ka Nyasaye yenyanga khukhola. Ni Roho wa Nyasaye wonyene wamanya shia shindu shiosi khulondokhana khu ka Nyasaye yenyanga khukhola.

¹²Shikanyala khuva khwanyola roho wamihanga vandu vu mu shivala shinu tawe; navutswa khwanyola Roho urulanga khu Nyasaye, khu akhukhonye khumanya shia shihanwa shiosi shia Nyasaye yakhuha.

¹³Khulwa yako, shikanyala khuva khwechitsanga kenako khuvirila khu vusitsa vwa khwechitswa na vandu tawe; navutswa vwa Roho yechitsanga, lwa khuvoolanga katoto khulondokhana khu Roho khu vandu vali na Roho.

¹⁴Mundu ukhali na Roho shianyala khuhuchilila vihanwa virulanga khu Roho wa Nyasaye tawe; shichila vilolekhanga khuli nu vusilo khuye. Shianyala khuvimanya tawe; shichila ni Roho wonyene wamanya vihanwa vienevo.

¹⁵Mundu uli na Roho wamanya shia shindu shiosi shikholekhanga; navutswa mundu avulakhuho unyala khumurunishitsa.

¹⁶Mahandiko Matakatifu kavoolanga, “Ni viina uli nu vunyali vu khumanya khuli Mwami Nyasaye akanakananga? Ni viina unyala khumukhonya ninganakani yu khulonda?” Navutswa khutsi navo vakhukanakananga khuli Kristo.