Read tsotso VAKORINZO 10 Bible Online

VAKORINZO 10 - tsotso bible

VAKORINZO 10

¹Inzi Paulu, wa vavoolanga nu muhoma khandi mwikhutsili lwa ndi na munyi, navutswa mululu lwa ndi ihale wene khurula khu munyi musayanga numuyaanza. Muvoolelanga numuyaanza khuvirila khu vuhoma khandi vulahi vwa Kristo,

²muvuli khunomba khuva mululu lwa nzitsa, shichila ndi ni lisuuvila nava mululu khu yavo vavoolanga khumenyanga khulondokhana khu tsinganakani tsia vandu vu mu shivala.

³Khali niiva khumenyanga mu shivala shinu, shikali khukwananga khuli vandu vu mu shivala shinu vakwananga tawe.

⁴Viuchi via khukwanilanga shivili navio viuchi via vandu vu mu shivala vakwanilanga tawe; navutswa viuchi virulanga khu tsingulu tsia Nyasaye viu khukwanila vatsiku, khwononyinyanga mahingani ku vuvehi;

⁵khwononyinyanga shisikaritsu shiukhwilola shihinganyinyanga vucheli vurulanga khu Nyasaye; khandi khukalukhanyinyanga vandu vakanakane khuli Kristo yenyanga.

⁶Lwa muliitsa khuva numumanyinyi mumusuuvilanga mu vwatoto, khuliitsa khusalilitsa mundu wambakhananga khusuuvila.

⁷Mulolanga likoondo li vindu ikulu wavio wonyene. Mundu alikhuho uli ni lisuuvila ndi ye ni wa Kristo? Nu vulahi, nakanakane khandi khulondokhana khuye mwene, shichila khutsi khuli vandu va Kristo khuli ali wa Kristo.

⁸Shindolakhu tsisoni, khali niiva namala khwichinjilila muno khulondokhana khu vunyali vu Mwami yakhuha -- vunyali vu khumbakha munyi, navutswa khumusambula tawe.

⁹Kavuli khulolekha ndi njelitsanga khumulomba khuria shichila tsibarwa tsianje.

¹⁰Mulala khu munyi avoolanga, “Tsibarwa tsia Paulu ni tsindulu khandi tsili ni tsingulu, navutswa lwa ali na khutsi, nu muteteshele, khandi makhuva kalomolomanga ni ka vutswa!”

¹¹Mundu khuli mweneyo khutukha amanye ndi vwavukhani vuvulakhuho mu ka khuvoolanga khuvirila mu tsibarwa tsieru; lwa khuvulaho khandi ka khuliitsa khukhola lwa khuliitsa khuvaho na munyi.

¹²Toto, shikali khunyala khwilekhanyinya inoho khwisasanyinya khu vandu vivukulanga vene ni vakali khuvira vandi tawe. Ni vandu vayingwa varina! Vilombelanga vene vindu viu khwipimila, khandi vikhalachila vene khulondokhana khu vindu viu khwipimila viavo vene!

¹³Navutswa shiukhunyala khwichinjilila khuvira shichelo tawe; khwichinjilila khweru khulava khulondokhana khu shichelo shiu muhinzilu kwa Nyasaye yakhuha; khali khumeetakhu muhinzilu kweru mu munyi.

¹⁴Lwa muli mu shichelo shienesho, shiukhwavirakhu shichelo shienesho lwa khwitsa nu khumwilwatsila Ivanjeli khulondokhana khu Kristo tawe.

¹⁵Shiukhunyala khwichinjilila khulondokhana khu muhinzilu kwa vandu valala vakhola khuvira shichelo shia Nyasaye yakhuha tawe. Nikhali, khuli ni lisuuvilitswa ndi lisuuvila lienyu liliitsa khuva linyishi, khandi ndi khukhole muhinzilu munyishi mu munyi, shia khase khosi khulondokhana khu shichelo shia Nyasaye yakhuha.

¹⁶Khulwa yako, khunyala khwilwatsa Ivanjeli mu vivala vindi vili ihale khu munyi, vuchila khwichinjilila khulondokhana khu muhinzilu kwakholwa khale nu mundu wundi havundu handi.

¹⁷Navutswa khuli Mahandiko Matakatifu kavoolanga, “Mundu wenyanga khwichinjilila yichinjilili khulondokhana khu ku Mwami Nyasaye yakhola.”

¹⁸Shikali mundu witsominyanga mwene ahuchililwanga tawe; navutswa mundu wu Mwami yitsominyanga neye uhuchililwangwa.