Read tsotso VAKORINZO 11 Bible Online

VAKORINZO 11 - tsotso bible

VAKORINZO 11

¹Nakhayaanzi muve vikhutsili shichila inzi, khali niiva ndikhu muyiingwa hatititi. Numuyaanza mukhole ndio!

²Ndi ni lishiendekha khulondokhana khu munyi, khali khuli Nyasaye ali nalio; muli manya khuli mwana wi shikhana muchima munihu wa nalaaka aselelwi khuhilwa nu musatsa mulala wonyene, nali Kristo wonyene.

³Navutswa ndi nu vuri ndi khuli inzukha yakaata Hawa khulondokhana khu vucheli vwevwe vu vupeele, khali munyi mulakaatilitswa muleshe khurumishila Kristo munjila yatoto.

⁴Niiva mundu wundi aliitsa khwitsa nu khumwilwatsila Yesu wundi lukanu khuvira Yesu wa khwamwilwatsila, inoho munyole roho ukhali wamwanyola, inoho Ivanjeli yindi lukanu ikhali ya mwanyola, muchilondanga vwangu nu mwoyo kwosi.

⁵Shinganakananga ninzi mutititi muno khu yavo vilanganga “Varumwa” valahi vene yavo tawe!

⁶Haundi shiekanga khulomoloma; navutswa shikali ni katoto mu vucheli tawe; khwamuvoolela yaka havulavu shia khase khosi khandi mu liiva liosi.

⁷Shikali namurunjitsakhu shindu shiosi lwa namwilwatsila Ivanjeli ya Nyasaye tawe; nichehitsa mwene khumulomba muve nu vukhonyi muno. Nyala khuva nakhola shindu shitamanu?

⁸Lwa nakholanga muhinzilu mu munyi, makanisa kandi nako kandunganga. Nyala khuvoola navahuuvilanga khukhonye munyi.

⁹Lwa nali na munyi manimba ni lienya, shinalikhu musiko mulitoho khu mundu wosi tawe; shichila vasuuvili varula mu lusomo lwa Mekadonia vanderela shia shindu shiosi shia nyenyanga. Khulwa yako, shinyala khuva musiko mulitoho khu munyi munjila yosi inoho khutsililila khukhola ndio tawe.

¹⁰Lwa katoto khulondokhana khu Kristo kali mwinzi, mundu avulakhuho shia havundu hosi mu lusomo lwa Akaya unyala khunzikalila khwichinjilila.

¹¹Nyala khuva mbolanga ndio shichila shinamuyaanza tawe? Nyasaye wamanya namuyaanza!

¹²Kakholanga nunundi nako ka nzitsanga khutsililila khukhola nunundi, khu mbe nzikalilanga vandu vichinjililanga nivavoola vakholanga muhinzilu mulala khuli kwa khukholanga.

¹³Vandu venavo shikali ni varumwa vatoto tawe -- ni vahinzili vu vuvehi, nivikhola khuva khuli varumwa vatoto va Kristo.

¹⁴Yaka shikali macheni tawe! Khali Shetani yikholanga khuva khuli injelosi ileranga vulavu!

¹⁵Shikali ku khuchenyinya, niiva varumishi veve vikholanga vene khuva khuli varumishi vakholanga ku vulunji tawe. Valiitsa khutivitswa khulondokhana khu vikholwa viavo via vakholanga.

¹⁶Ngalushilanga khuvoola yaka: mundu avuli khukanakanakhu ndi inzi nu mundu muyiingwa. Navutswa niiva mulakhola ndio, nu vulahi khumbukula khuli mundu muyiingwa, nikanyalikha nzililile khwichinjilila hatititi hene.

¹⁷Ni kilikali makhuva kambolanga nunundi shikali nako ku Mwami yakhayaanzi mbole tawe. Khulondokhana khu makhuva kukhwichinjilila yaka ni kilikali nomolomanga khuli mundu muyiingwa.

¹⁸Lwa vandu vanyishi vichinjililanga shichila vindu viu mu shivala, khali inzi mwene nyala khwichinjilila.

¹⁹Munyi vene muli nu vusitsa vunyishi; khandi musangalanga khwikhutsila khumenya na vandu vayiingwa!

²⁰Ni kilikali, mwikhutsilanga khali niiva mundu amukholanga khuva varukwa, inoho khumwihonela, inoho khumukaatilitsa, inoho khumulechelitsa inoho khumusamula lukhovi mu vweni.

²¹Ndi ni tsisoni khulola ndi khwali vateteshele shichila vindu vienevo! Navutswa niiva mundu yenyanga khwichinjilila khulondokhana khu shindu shiosi -- nomolomanga khuli mundu muyiingwa -- njelitsanga khandi khwichinjililakhu.

²²Vanyala khuva Vahebrania? Khali inzi ndi Muhebrania. Vanyala khuva Vaisraeli? Khali inzi ndi Muisraeli. Vanyala khuva vitsukhulu va Aburahamu? Khali inzi ndi mwitsukhulu wewe.

²³Vanyala khuva varumishi va Kristo? Ndolekhanga khuli mundu mulalu -- navutswa inzi ndi murumishi mulahi khuvavira! Nakhola muhinzilu ni tsingulu, navohwa mucheela hali khanyishi, nashiutwa hali khanyishi, khandi shia khase khosi nimba himbi khukhutsa.

²⁴Vimilili va Vayahudi vashiuta hali kharanu vivoko makhomi kavaka na tisa;

²⁵Varoma vashiuta hali khavaka; khandi nivandesa na machina lulala lwonyene vutswa. Nali khali khavaka mu imeli yatong'okhanamu mu inyanza, khandi nimenya khu tsisaa makhomi kavili na kane mu matsi.

²⁶Mutsinjendo tsianje tsinyishi navirila mu maraava mwichendanyama shichila matsi ki michelelo nende vanuuli, mu maraava khurula khu Vayahudi vashianje khandi khurula khu vandu vi tsimbia tsindi. Nanyola maraava mu mataala makali, maraava mu shiangalangwi, maraava mu inyanza, khandi maraava shichila valina vu vuvehi.

²⁷Nakhola muhinzilu ni tsingulu khandi ninyakhana khumatukhu manyishi vuchila khukonakhu tsindolo. Namenya inzala nimba nu vuluhu khumatukhu manyishi vuchila khuliakhu shiukhulia shiosi. Shinali na havundu hanyala khukona nende tsinguvu tsiu khwifwala tawe.

²⁸Vuchila khuvoolakhu vindu vindi viosi, shia khase khosi minikhanga nimbenda mwoyo shichila makanisa koosi.

²⁹Lwa mundu ali muteteshele, khali inzi ndolekhanga khuva muteteshele. Lwa mundu yisikaritswangwa khukhola vwoni, nyakhananga mu mwoyo.

³⁰Niiva nyala khwichinjilila, niitsa khwichinjilila khulondokhana khu vindu vimanyinyanga vuteteshele vwanje.

³¹Nyasaye, uli Tata wu Mwami Yesu, wenyekhanga khwitsominywa mihika ni mihika, wamanya ndi shingatanga tawe.

³²Lwa nali nindi mu litaala lia Damasika, gavana yamihanga hasi wu Mwami Aretasi yavikha vasikali khulinda ha vilivwa vi litaala likali vangumile.

³³Navutswa vanzishitsila mu shikabu khuvirila mu litirisha mu lisisi maninzihonolokha khurula khuye.