Read tsotso VAGALATIA 2 Bible Online

VAGALATIA 2 - tsotso bible

VAGALATIA 2

¹Lwa mihika likhomi na chine chiavira, natikulukha ningalukha Yerusalemi, halala na Baranaba. Navukula khandi Tito ninzia naye.

²Nasimukha ninzia shichila Nyasaye yali umali khumanyinya malolo ku khutsia. Ninzi wavoolela vimilili vi shikhaalo shiu muvwivisi makhuva khulondokhana khu Ivanjeli ya nzilwatsanga khu vandu vi tsimbia tsindi. Nakhola ndio, nindi ni lienya ndi muhinzilu kwanje kwa nali ninakhola mumatukhu kavira, inoho mumatukhu kanu kuvuli khuva kwi shikhaya.

³Khali ndio, murumishi washianje Tito, khali niiva yali Muguriki, shiyanikwa khushevwa tawe;

⁴khali niiva khwaliho na vasuuvili valala vu vuvehi venyanga ashevwi. Vandu venavo vinjila mu mukaanda kweru, khuli vandu vu khwenya khurunishitsa kakholekhanga, manivikhola khola khuva khuli ni vandu vakhusanganga navo mu lisuuvila, khurunishitsa khwenya khumanya vuvoholole vwa khuli navwo mu Yesu Kristo; khali ni lienya liu khwenya khukhukhola khuva varukwa.

⁵Khwambakhana khuvaha vwiyangu khali hatititi hene, khu katoto karulanga khu Ivanjeli katsililile khuhindila mu munyi.

⁶Navutswa yavo vali nivavukulwa khuva vimilili -- mbolanga ndio, shichila ka vakhola shikanyala khumbenditsa mwoyo tawe. Nyasaye avulakhu mundu wa yihonelanga -- mbolanga ndi vimilili venavo vashili khumbolelakhu, khali shindu shiosi shinyala khukhonya.

⁷Khuluveka lundi, valola ndi Nyasaye yali umbeele muhinzilu ku khwilwatsa Ivanjeli khu vandu vi tsimbia tsindi, khuli Petro yali niyaheelwa muhinzilu ku khwilwatsa Ivanjeli khu Vayahudi.

⁸Nakholwa khuva murumwa wa vandu vi tsimbia tsindi khuvirila mu tsingulu tsia Nyasaye, khuli lwa Petro yakholwa khuva murumwa khu Vayahudi.

⁹Yakobo, Petro nende Yohana vali nivamanyikhana khuva vimilili, vamanya vulahi vwene ndi Nyasaye neye wali nambele muhinzilu mulahi kwene yuku. Khulwa yako, vakhukumila mu makhono keru inzi nende Baranaba, khumanyinya ndi voosi khukholanga muhinzilu mulala. Khwahuchilitsana ndi inzi nende Baranaba khulatsia khukhola mihinzilu mu vandu vi tsimbia tsindi, navo vatsi khukhola mihinzilu mu Vayahudi.

¹⁰Shindu shilala shionyene shia vakhureeva khukhole, nishili khwitsushitsa vamanani, shindu shia nikombanga khukhola nu mwoyo kwosi.

¹¹Navutswa lwa Petro yatukha mu litaala lia Antiokia, namuhinjitsa havulavu, shichila ni kilikali, yali ukholi shindu shitamanu.

¹²Valala khu vandu va Yakobo yali niyaruma, nivashili khutukhaho, Petro yali naliilenje shiukhulia na vasuuvili vi tsimbia tsindi. Navutswa lwa vandu venavo vali nivakhatukha, yiyahula haluveka, niyambakhana khutsililila khulia navo, shichila yaria vandu vali ni tsinganakani tsiu khwenya ndi vandu vi tsimbia tsindi khushevwa.

¹³Vasuuvili Vayahudi vandi viyunga mu vwikhola kholitsi vwa Petro vu khuva wi likhola liu vulunji; khali kachila Baranaba nakoyanyinywa nu mwiima kwavo ku khwikhola kholitsa khuva valunji.

¹⁴Navutswa lwa nalola shindu shivulakhuho shiatoto shia vakholanga mu likhola liavo khulondokhana khu Ivanjeli, navoolela Petro imbeli wavo voosi, “Niiva yivi uli Muyahudi, khandi wumenyanga khuli mundu urulanga mu vandu vi tsimbia tsindi, navutswa khuli Vayahudi tawe; shichila shina unikanga vandu vi tsimbia tsindi khumenya khuli Vayahudi?”

¹⁵Ni kilikali, khutsi vene khuli Vayahudi khuvirila khu lwivulu, navutswa shiukhuli khuli vandu vi tsimbia tsindi vakholanga vwoni tawe.

¹⁶Navutswa khwamanya ndi mundu akholwangwa khuva wi likhola liu vulunji imbeli wa Nyasaye khuvirila mu lisuuvila mu Yesu Kristo; shikanyala khuva khukhola ka Malako kenyanga tawe. Khali khutsi khandi, khwasuuvila mu Yesu Kristo, khu khukholwi khuva valunji imbeli wa Nyasaye khuvirila mu lisuuvila lieru mu Kristo; shikanyala khuva nu khukhola ka Malako kenyanga tawe. Mundu avulakhuho unyala khukholwa khuva wi likhola liu vulunji imbeli wa Nyasaye, shichila akholanga ka Malako kenyanga.

¹⁷Navutswa niiva khuchelitsanga khukholwi khuva valunji imbeli wa Nyasaye khuvirila mu Kristo, khunyolekhanga khuva vooni, khuli vandu vi tsimbia tsindi vali -- yaka kanyala khuva kamanyinyanga ndi Kristo neye uchilanga vwoni nu vuvaho? Shikali kario tawe!

¹⁸Navutswa niiva ngalushilanga khumbakha vindu via nali ninasambula, kanyala khuva kamanyinyanga ni kilikali ndi ninzi mundu umenekanga Malako.

¹⁹Ndi khuli mundu wakhutsila Malako, khu khuvirila mu Malako nzililile khuva mwoyo shichila Nyasaye.

²⁰Namala khuvambwa khu musalaba na Kristo; shikali ninzi uli mwoyo tawe, navutswa Kristo neye uli mwoyo mwinzi; limenya lia menyanga nunundi mu mmbili, menyanga khuvirila khu lisuuvila mu Mwana wa Nyasaye, wanyanza khandi nakhutsa shichila inzi.

²¹Shinyala khwambakhana tsimbavasi tsia Nyasaye tawe. Navutswa niiva mundu anyala khukholwa khuva wi likhola liu vulunji imbeli wa Nyasaye khuvirila mu malako, kamanyinyanga ndi khuvulakhuho shivune shiachila Kristo nakhutsa!