Read tsotso VAGALATIA 4 Bible Online

VAGALATIA 4 - tsotso bible

VAGALATIA 4

¹Mbolanga ndi mwana uliitsa khunyola miandu chia tata wewe akholwangwa vutswa khuli murukwa nashili mutititi, khali niiva ni kilikali miandu chiosi chiliitsa khuva ni chiechie.

²Mwana mwenoyo nashili mutititi, avetsanga mu makhono ka valeli nende vandu vu khumulinda khutukha khulitukhu lia tata wewe yaviritsa aliheelwa miandu.

³Khali khutsi nindio khuli. Lwa khwali nu khuli khuli vaana mu lisuuvila, khwali mu vurukwa vu vwimilili vwi miroho chiamihanga shivala shinu.

⁴Navutswa lwa litukhu liatoto liali ni liaviritswa liatukha, Nyasaye yaruma Mwana wewe, wu mukhali yivula, wamenya khulondokhana khu Malako,

⁵khuvoholola yavo vamenyanga khulondokhana khu Malako, khulu khukholwa khuva vaana va Nyasaye.

⁶Lwa muli vaana va Nyasaye, Nyasaye waruma Roho wu Mwana wewe mu mioyo chieru, Roho ulilanga nalaanga, “Aba! Tata!”

⁷Khulwa yako, shiumunyala khuva khuli murukwa tawe; navutswa muli khuli Mwana. Lwa muli khuli Mwana wewe, Nyasaye wamukhola khuva vandu valiitsa khunyola miandu chiechie, chia yavishila vaana veve.

⁸Mumatukhu kavira, lwa mwali numushili khumanya Nyasaye, mwamenyanga mu vurukwa vu khusaala khu vindu via munyala khuvula khuvukula mu shivala shinu khuva khuli vanyasaye.

⁹Navutswa nunundi, lwa mwamanya Nyasaye -- inoho, mbole Nyasaye wamumanya -- shichila shina mwenyanga khukalukha khu vwimilili vuteteshele khandi vukhatukhane vwi miroho chiamihanga shivala shinu? Mwenyanga khukholwa khandi khuva varukwa vu vwimilili vwenovo?

¹⁰Mukholanga milukha khumatukhu malala, mieli milala, tsinyinga tsindala nende mihika milala.

¹¹Muheendelanga mwoyo! Kanyala khuva namalila vwiyangu vwanje khu munyi!

¹²Vasuuvili vashianje, musayanga numuyaanza muve nu mwiima khuli kwanje; shichila namala khukwa khuli munyi. Mushili khukholelakhu shindu shitamanu.

¹³Khuli mwamanya, vulwale vwa nalwala, navwo vwachila nindanga khwilwatsa khu munyi Ivanjeli.

¹⁴Navutswa khali niiva vulwale vwanje, vwa nalwala vwali khuli machelitso khu munyi, shiumwanjaya inoho mwanzambakhana tawe. Nikhali, mwanzinjilitsa khuli mwinjilitsanga injelosi khurula mwikulu; mwanzinjilitsa khuli mwakhinjilitsi Yesu Kristo.

¹⁵Mwali nu vuyaanzi vunyishi muno! Ni shina shinyala khuva shia yikholekha khu munyi? Inzi mwene mbolanga ndi mwakhasomole khali tsimoni tsienyu, niiva kanyala khunyalikha mumbe.

¹⁶Nyala khuva ngwili mutsiku wenyu, lwa muvoolele katoto?

¹⁷Vandu yavo vali nu vuha vu khumuluva; navutswa vali ni tsinganakani tsindamanu. Vali ni lienyu liu khumuvikha haluveka khurula khu khutsi, khu muve nu vuha vu khuvarumishila.

¹⁸Nu vulahi khuva nu vuha vu khurumishila vandi, niiva khuliho ni shivune shilahi; khandi mutsililile khukhola ndio shia khase khosi; khali nikhaliho na munyi.

¹⁹Munyi vaana vaanje va nayaanza! Khuli mukhali ahulilanga isalila niyenya khwivula mwana, mbulilanga isalila indala yeneyo shichila munyi, khutukha lwa muliitsa khuva ni liiva khuli lia Kristo mu munyi vene.

²⁰Nakhikombi khuva na munyi nunundi, khu muvoolele makhuva kali mu mwoyo kwanje, shichila mbendelanga munyi mwoyo.

²¹Mbolelikhu shindu, munyi vamwikombanga malako khumwimilila. Munyala khuva mwamanyakhu ka Malako kavoolanga?

²²Mahandiko Matakatifu kavoolanga ndi Aburahamu yali na vaana vi shiyayi vavili; mulala wayivula khu mukhali murukwa, navutswa wa khavili khu mukhali wali muvoholole.

²³Mwana wivulwa khu mukhali murukwa, yivulwa khuli vaana vandi vivulwangwa; navutswa mwana wa khavili khu mukhali wali muvoholole, yivulwa khulondokhana khu lilaaka lia Nyasaye.

²⁴Makhuva kavili yaka, kanyala khumanyinywa khuli shimanyilu: Vakhali vavili yava, vasinjililanga Malakano kavili. Lilakano liu khuraanga, ni yelo liakholwa ha Shikulu shia Sinai; musinjilili walio ni Hagari. Vaana veve valiitsa khwivulwa, valiitsa khuva varukwa.

²⁵Hagari neye musinjilili wi Shikulu shia Sinai shili Arebia; khandi neye shimanyilu shi litaala likali lia Yerusalemi, lia matukhu kanu, lili mu vurukwa na vandu vamenyanga mulio.

²⁶Navutswa litaala likali lia Yerusalemi liu mwikulu lili mu vuvoholole; khandi nalio lili khuli mama weru.

²⁷Mahandiko Matakatifu kavoolanga, “Yivi mukhali mukuumba, sangala! Yivi wakhahulilakhu isalila yu khwivula, laanjilila nu vuyaanzi vunyishi muno! Shichila mukhali wu musatsa yamwilukha, aliitsa khwivula vaana vanyishi khuvira vaana vu mukhali uli nu musatsa.”

²⁸Munyi vasuuvili vashianje, muli vandu va Nyasaye khurulana khu lilaaka lielie, khuli Isaka yali.

²⁹Mumatukhu kenako, mwana wivulwa khuli vaana vandi vivulwangwa yatambitsa mwana wivulwa khuvirila khu tsingulu tsia Roho wa Nyasaye; malala mele kashikholekhanga ndio mumatukhu kanu.

³⁰Navutswa ni shina shia Mahandiko Matakatifu kavoolanga? Kavoolanga, “Khunganyinya mukhali murukwa nende mwana wewe; shichila mwana wu mukhali murukwa nende mwana wu mukhali muvoholole, shivaliitsa khukavana miandu chia tata wavo namali khukhutsa tawe.”

³¹Khulwa yako, vasuuvili vashianje, shiukhunyala khuva khuli vaana vu mukhali murukwa tawe; navutswa khuli vaana vu mukhali wali muvoholole.