Read tsotso VAKOLOSAI 1 Bible Online

VAKOLOSAI 1 - tsotso bible

VAKOLOSAI 1

¹Ninzi Paulu, murumwa wa Yesu Kristo khuvirila khu lienya lia Nyasaye, nende musuuvili washieru Timoteo --

²Khuhandichilanga vandu va Nyasaye voosi vali mu litaala lia Kolosai, nivali vasuuvili vashieru mu Kristo. Khwikombanga ndi Nyasaye, uli Tata weru amulolele tsimbavasi khandi amuhe milembe.

³Shia khase khosi khusanditsanga Nyasaye, uli Tata wu Mwami weru Yesu Kristo lwa khumusaalilanga;

⁴shichila khwavoolelwa makhuva khulondokhana khu lisuuvila lienyu mu Yesu Kristo, khandi khuli mwayaanza vandu va Nyasaye voosi.

⁵Lwa mwilwatsilwa lukhuraanga likhuva liatoto, nili Ivanjeli, mwahulila lisuuvilitswa linyolekhanga khurula khuyo. Khulwa yako, lisuuvila lienyu nende vuyaanzi vwenyu vwosi via yumbakhwa khu ka mwasuuvilitswa, ka mwavishilwa vulahi vwene mwikulu.

⁶Ivanjeli itsilililanga khulera tsikhaavi nu khulanda shia havundu hosi mu shivala, khuli yali niyalanda mu munyi khurula khulitukhu liu khuraanga, lwa mwahulila likhuva khulondokhana khu tsimbavasi tsia Nyasaye khandi numuranga khumanya katoto khulondokhana khu tsimbavasi tsienetso.

⁷Mweka makhuva khulondokhana khu tsimbavasi tsia Nyasaye khurula khu Epafura, nali murumishi washieru wa khwayaanza, muhinzili musuuvilwa wa Kristo wu kholanga muhinzilu havukono heru.

⁸Epafura wakhuvoolela makhuva khurulana khu vuyaanzi vwa Roho yachila numunyola.

⁹Khulwa yako, khurula khulitukhu lia khwahulila makhuva kenako, khushili khumwivililakhu mu lisaala lieru. Khureevanga Nyasaye amuhe vucheli vunyishi khurulana khu lienya lielie, nu vusitsa vwosi nende limanya lia Roho ahaananga.

¹⁰Nalwo lwa muliitsa khumenya khuli Mwami yenyanga, khandi mukhole shia khase khosi ka muyaanzitsanga. Limenya lienyu lilachila mukhole vikholwa vilahi lukanu na lukanu; khandi muve nu vucheli vunyishi vu khumanya Nyasaye;

¹¹khutinyilitswa ni tsingulu tsiosi khurulana khu vunyali vwevwe vu vukhumi, khu muve nu vwitsumishitsi nende likhutsila; khandi muve nu vuyaanzi vunyishi muno

¹²numusanditsa Tata, wamulomba khusanga mu vindu via yavishila vandu veve mu vwami vu vulavu.

¹³Nyasaye ya khuhavina khurula mu tsingulu tsi shisuundi, nakhulera mu vwami vu Mwana wewe wayayaanza,

¹⁴uchilanga nu khuva vavoholole, nakhwo khuvoola khwasemehwa khurula mu vwoni vweru.

¹⁵Kristo ni likoondo lia khulolanga lia Nyasaye uvula khulolekha; neye mwana wi shiyayi mukhulundu khwivulwa mu vindu viosi vialoongwa.

¹⁶Nyasaye yalomba shia shindu shiosi khuvirila muye, shia shindu shiosi shiu mwikulu nende khulilova, vilolekhanga khandi vivulanga khulolekha; vu vwami, vwimilili, vamihi nende vu vunyali. Nyasaye yalomba likulu nende lilova khuvirila muye khandi shichila ye.

¹⁷Kristo yaliho shia shindu shiosi nishishili khuvaho; khuvirila muye shia shindu shiosi shiliho.

¹⁸Kristo neye uli murwi ku mmbili kwekwe, nilili likanisa. Neye shirula shiu vulamu vu mmbili kwenoko. Neye mwana wi shiyayi mukhulundu khwivulwa, wisimushitswa khurula mu vandu vakhutsa, alinyola wonyene vwiyangu vu khuraanga mu shia shindu shiosi;

¹⁹shichila Nyasaye neye waviritsa ndi Mwana ave ni liiva lielie liosi muye.

²⁰Khuvirila mu Mwana, Nyasaye yaviritsa khulera halala shia shindu shiosi shili mwikulu nende khulilova khuye mwene. Nyasaye yachila milembe nichivaho khuvirila mu musango kwi likhutsa liu Mwana wewe khu musalaba, khali nalera khuye shia shindu shiosi shili khulilova nende mwikulu.

²¹Matukhu kandi mwali mwayivalwa ihale wene khurula khu Nyasaye, khandi numukwa vatsiku veve, shichila mwakholanga vindu vitamanu.

²²Navutswa nunundi, khuvirila mu likhutsa liu Mwana wewe mu mmbili, Nyasaye umali khumukhola khuva valina veve, khulu khumulera imbeli wewe numuli vatakatifu, vanihu, khandi vandu vavula imbala yosi.

²³Mwenyekhanga mutsililile khuva vasuuvilwa khu musinji kwi tsingulu khandi kwatoto. Muvuli khuhuchililakhu khunuywa nuywa khurula khu lisuuvilitswa lia mwanyola, lwa mwahulila Ivanjeli. Ivanjeli ya mwahulila yeneyo, neyo yachila inzi Paulu ningwa murumishi -- Ivanjeli ya vilwatsila shia mundu wosi mu shivala.

²⁴Ndi nu vuyaanzi nunundi khunyakhana shichila munyi; khu, khuvirila mulinyakhana lianje mu mmbili khonyanile khurweshitsa shiarikalila mulinyakhana lia Kristo, havukono wu mmbili kwekwe, nilili likanisa.

²⁵Nyasaye neye wanomba khuva murumishi wi likanisa, khulu khumukhonya munyi. Yamba muhinzilu ku khwilwatsa likhuva lielie ni tsingulu tsiosi,

²⁶nilili likhuva lia yali niyavisa vandu voosi khurula mumatukhu ka khale; navutswa nunundi umali khumanyinya vandu veve.

²⁷Nyasaye yali ninganakani yu khulomba likhuva liaviswa yili, khumanyikhana khu vandu veve, likhuva liaviswa liu vuhinda, khandi liu vukhumi liali nalio khu vandu voosi. Likhuva liaviswa, nakhwo khuvoola Kristo ali mu munyi, khandi livoolanga ndi muliitsa khusanga mu vukhumi vwa Nyasaye.

²⁸Khulwa yako, khwilwatsanga Kristo khu shia mundu wosi. Khuchelihitsanga nu khwechitsa shia mundu wosi khuvirila mu vusitsa vwosi nikanyalikha, khulu khulera shia mundu wosi imbeli wa Nyasaye niyahindila mu Kristo.

²⁹Nunyola yaka kikholekha, kholanga muhinzilu kwanje ni tsingulu ninjemulila, nindumishila tsingulu tsiu vunyali tsia Kristo ambetsanga, khandi tsikholanga muhinzilu mwinzi.