Read tsotso 1 VATESALONIKE 5 Bible Online

1 VATESALONIKE 5 - tsotso bible

1 VATESALONIKE 5

¹Vasuuvili vashieru, muvulakhu shivune shiosi, shinyala khuchila muhandichilwi makhuva khulondokhana khu tsisaa nende matukhu ki vindu yivi viliitsa khwikholekha.

²Munyi vene mwamanya vulahi ndi Litukhu liu Mwami aliitsa khukalukha liliitsa khuva khuli shihuuvi mu vutukhu.

³Lwa vandu valiitsa khuva nivavoolanga, “Khumenyi mu milembe khandi mu vulindi vulahi” nonoho lwa valiitsa khutivitswa! Khutivitswa khwenokho, khuliitsa khuvanyolishitsa vwangu khuli mukhali ahulilanga isalila niyenyanga khwivula mwana. Mundu avulakhuho uliitsa khwihonolokha.

⁴Navutswa munyi, vasuuvili vashieru, shikali mumenyanga mu shisuundi khulitukhu lienelo lilimunyoleshitsa khuli shihuuvi tawe.

⁵Munyi voosi muli vandu vamumenyanga mu vulavu, khandi vandu vamenyanga mbasu. Shimunyala khuva khuli vandu vamenyanga mu vutukhu inoho mu shisuundi tawe.

⁶Khulwa yako, khuleshe khukona tsindolo khuli vandi vakholanga; navutswa chendi khuve vacheli nu khwilinda vene vulahi.

⁷Vandu vakonanga tsindolo vutukhu. Vandu vang'wetsanga idivai nivatanda vutukhu.

⁸Navutswa lwa khuli vandu va khumenyanga mbasu, chendi khwilinde vene vulahi. Khwifwale lisuuvila nende vuyaanzi khuli inguvu yu mu shiliru, khandi lisuuvilitswa liu vuhonyinyi khuli ikofia yu mukasa.

⁹Shikanyala khuva Nyasaye ya khurovola khulisalilitswa tawe; navutswa khuhonyinywa khuvirila mu Mwami weru Yesu Kristo,

¹⁰wakhutsa shichila khutsi khu khumenye naye, kave khushili mwoyo inoho khwakhutsa, lwa aliitsa khukalukha.

¹¹Khulwa yako, mutinyilitsane khandi mukhonyane vene khuvene, khuli lwa mukholanga nunundi.

¹²Vasuuvili vashieru, khumuvoolelanga numuyaanza muhaane luyali khu yavo vakholanga muhinzilu kwavo ni tsingulu mu munyi, vamusinjililanga mu Mwami, nivamwechitsa makhuva khulondokhana khu limenya liu Vukristayo.

¹³Vavukuli nu luyali muno mu vuyaanzi, shichila muhinzilu kwavo. Muchelitsi mumenye mu milembe vene khuvene.

¹⁴Vasuuvili vashieru, khumuvoolelanga numuyaanza muchelihitsi vandu vakaara vikhalanga vutswa, vuchila muhinzilu kwosi, mutinyilitsi vandu valolanga valechelitswa, mukhonye vandu vateteshele, khandi muve ni likhutsila khu shia mulala.

¹⁵Muchelitsi khulola ndi mundu avulakhuho uvanzilanga vutamanu khu vutamanu; navutswa shia khase khosi muchelitsi khulola mukholanga kali malahi khuvene khuvene, khandi khu vandu voosi.

¹⁶Muve nu vuyaanzi shia khase khosi.

¹⁷Mutsililile khusaala khumatukhu koosi;

¹⁸muve nilisanditsa mu liiva lia muvirilamu liosi; shichila nako ka Nyasaye yenyanga mukhole mu limenya lienyu mu Yesu Kristo.

¹⁹Muvuli khwikalila muhinzilu kwa Roho Mutakatifu;

²⁰muvuli khulechelitsa makhuva ku vuprofeti.

²¹Navutswa muchelitsi khureeveshitsa shia shindu shiosi. Mutsililile khukhola malahi.

²²Mulekhane ni shindu shitamanu shiosi.

²³Khusaalanga ndi Nyasaye ukhuheetsanga milembe, amukhole khuva vatakatifu mu shia shindu shiosi; khandi atsililile khulinda liiva lienyu liosi -- mwoyo, murima, nende mmbili -- khurula khu vutamanu vwosi, lwa Mwami weru Yesu Kristo aliitsa khukalukha.

²⁴Woyo wamulaanga aliitsa khukhola kenako, shichila nu musuuvilwa.

²⁵Vasuuvili vashieru, mukhusaalilikhu.

²⁶Muhaane milembe chieru chi shimanyilu shiu vuyaanzi khu vasuuvili voosi.

²⁷Muvoolelanga numuyaanza khuvirila mu vunyali vu Mwami musomele vasuuvili voosi ibarwa iyi.

²⁸Tsimbavasi tsiu Mwami Yesu Kristo tsive na munyi.