Read tsotso YOSHWA 17 Bible Online

YOSHWA 17 - tsotso bible

YOSHWA 17

¹Lusomo lwi shivala khuluveka luli imbo wu Muchela kwa Yorodani lwaheelwa vandu valala khurula mu inzu yu mwana mukhulundu wa Yosefu walaangwangwa Manaase. Makiri, wali niyivula Gileadi, neye wali mwana mukhulundu wa Manaase. Yali wamanya khukwana muliihe. Khulwa yako, yaheelwa Gileadi nende Bashani, tsisomo khuluveka luli imbo wu Muchela kwa Yorodani.

²Shivala khuluveka luli imbo wu Muchela kwa Yorodani shiaheelwa vandu vi inzu ya vandu vuluhia lwa Manaase vali nivarikale. Tsinzu tsienetso tsiali Abiezeri, Heleki, Asiriheli, Shekemu, Heferi, nende Shemida. Yava navo vali vitsukhulu vasatsa va vandu vuluhia lwa Manaase mwana wali wa Yosefu, khandi navo vali vimilili va shia inzu ya vandu vuluhia lwa Manaase.

³Zelofehadi, mwana wa Heferi, mwana wa Gileadi, mwana wa Manaase, shiyali wayivulakhu mwana wi shiyayi wosi tawe; navutswa yivula vaana vi shikhana vonyene vutswa. Mira ka vaana vi shikhana venavo ni Mahula, Noha, Hogula, Milika, nende Tiriza.

⁴Vaana vi shikhana venavo vatsia khu musalisi Eliazari khandi khu Yoshwa mwana wa Nuni khandi khu vimilili, nivavoola, “Mwami Nyasaye yavoolela Musa akhukavulilekhu, khutsi, halala na viikho veru vasatsa lusomo lulala lwi shivala yishi khuva shieru shia khumenyamu.” Khulwa yako, vaheelwa lusomo lulala lwi shivala shienesho halala na viikho vavo vasatsa, khuli Mwami Nyasaye yali niyavoola vakhole.

⁵Manaase nanyola tsimbeka likhomi khurula khuluveka lwi shivala shienesho, khumeeta khu tsisomo tsia Gileadi nende Bashani khuluveka luli ivukwi wu Muchela kwa Yorodani,

⁶shichila vitsukhulu vi shikhana nende vi shiyayi vali vakavulilwakhu shivala shienesho. Lusomo lwa Gileadi, lwaheelwa vitsukhulu vandi vali nivarikale va Manaase.

⁷Lusomo lwa Manaase lwraanjilanga mu litaala lia Asheri, khutsia khutukha mu litaala lia Mikimetsatsi, khuluveka luli ivukwi wi litaala lia Shekemu. Mupaka kwenoko kwakholomokha khuluveka luli ikuvanda, khuvukula vandu vamenyanga mu litaala lia Entapuha.

⁸Lusomo lwi shivala shi litaala lia Tapuha liali lia Manaase, navutswa litaala lia Tapuha, liali khu mupaka, liali lia vitsukhulu va Efurahimu.

⁹Mupaka kwenoko kwakholomokha nu kutsia khuluveka luli ikuvanda wu Muchela kwa Kana. Mataala kali nikali khuluveka luli ikuvanda wu muchela kwenoko kali ka Efurahimu, khali niiva kali mu lusomo lwa Manaase. Mupaka kwa Manaase kwatsililila khuvirila khuluveka luli ivuluka wu Muchela kwa Kana, nu kumalilishila mu Inyanza ya Meditarenia.

¹⁰Shivala shili khuluveka luli ikuvanda shiali shia Efurahimu; khuluveka luli ivuluka shiali shia Manaase. Lusomo lwa Manaase lwatukhanga khu Inyanza ya Meditarenia, khandi lwakanila khu mupaka ku lusomo lwa Asheri, khuluveka luli ivuluka nende lusomo lwa Isakari khuluveka luli ivukwi.

¹¹Mu tsisomo tsia vandu vi tsimbia tsia Isakari nende Asheri, vandu vuluhia lwa Manaase valimu na mataala ka Betsi-shani nende Ibulehamu, nende michitsi chiako chili himbi, khali Dori (lili khundulu khwi inyanza), Endori, Tanaki, Megido, nende michitsi chiako chili himbi.

¹²Navutswa vandu vuluhia lwa Manaase, shivakhungakhu vandu vamenyanga mu mataala kenako tawe. Khulwa yako, Vakanaani vatsililila khumenyayo.

¹³Khali lwa Vaisraeli vali ni tsingulu, vakhaywa khukhunga Vakanaani voosi; navutswa vavanika ni tsingulu khuvakholela muhinzilu.

¹⁴Vitsukhulu va Yosefu vareeva Yoshwa, “Shichila shina ukhuheele lusomo lulala lwonyene vutswa lwi shivala khuva lweru? Khwayivulana mu vunyishi, shichila Mwami Nyasaye wakhukasitsa.”

¹⁵Yoshwa yavavoolela, “Niiva mwayivulana mu vunyishi, khandi shivala shi vikulu shia Efurahimu shiamucheha, tikulushi mutsi mu muliru, muveere shivala shienyu vene mu shivala shia Vapeerizi nende Varefahimu vamenyamu.”

¹⁶Vavoolela Yoshwa, “Shivala shi vikulu shishinyala khukhutukha tawe, navutswa Vakanaani vamenyanga mu luhoongo, vali na makaare kiliihe kalombwa khu vivia, khali yavo vamenyanga mu litaala lia Betsi-shani halala ni michitsi chiliyo himbi, khandi yavo vamenyanga mu Luhoongo lwa Yezireli.”

¹⁷Navutswa Yoshwa yavoolela vandu vu luhia lwa Efurahimu nende luhia lwa Manaase khuluveka luli imbo, “Ni kilikali muli vandu vanyishi, khandi muli ni tsingulu tsinyishi. Muliitsa khunyola tsisomo tsinyishi khuvira lusomo lulala.

¹⁸Shivala shi vikulu shiliitsa khuva shienyu. Khali niiva nu muliru, muliitsa khushiveera khandi mushivukule shive shienyu vene, khurula khundulu khwi shivala shienesho khutukha khundulu khundi. Khali niiva Vakanaani vali na makaare kiliihe kalombwa khu vivia, khandi khali niiva vali ni tsingulu tsinyishi, muliitsa khuvakhunga khurula mu shivala shienesho.”