Read tsotso 1 TIMOTEO 1 Bible Online

1 TIMOTEO 1 - tsotso bible

1 TIMOTEO 1

¹Ninzi Paulu, murumwa wa Yesu Kristo khuvirila khu lilako lia Nyasaye, uli Muhonyinyi weru nende Yesu Kristo, uli lisuuvilitswa lieru.

²Mbandichilanga Timoteo, uli khuli mwana wanje watoto mu lisuuvila. Nyasaye, uli Tata nende Mwami weru Yesu Kristo vakhulolele tsimbavasi, vakhuvele tsimbavasi, khandi vakhuhe milembe.

³Khola nushitsililila khumenya mu litaala lia Efeso, khuli nakhusaya nuyaanza, lwa nali nindi khu luchendo lwanje lu khutsia Mekadonia. Valala khu vandu vamenyayo veechitsanga mechitso ku vuvehi. Uvakaye khwechitsa mechitso kenako.

⁴Uvavoolele valekhane ni tsinganu tsiali tsia khale tsivula vukhonyi vwosi yetso; khandi valeshe khulonda livaala liraambi khulondokhana khu mira ka vakuuka. Vindu khuli vienevo vileranga mahingani konyene. Shivinyala khukhonya mundu khukhola muhinzilu kwa Nyasaye, kukholeshelanga mu lisuuvila lionyene tawe.

⁵Shivune shichilanga nivakaya nu khwenya khuvalomba vave nu vuyaanzi vurulanga mu mwoyo munihu, mu tsinganakani tsiu mukari tsindahi nende lisuuvila liatoto.

⁶Valala khu vandu venavo vayambakhana khulonda kenako khandi vakorela mu tsimbakha tsia vutswa.

⁷Venyanga vave veechitsi va Malako ka Nyasaye; navutswa vashili khumanyakhu shindu shiosi khulondokhana khu makhuva kavo inoho makhuva ka valomolomakhu nu mwoyo kwosi.

⁸Khwamanya ni kilikali ndi malako ni malahi, niiva mundu aliitsa khukarumishila munjila indahi yene.

⁹Khwamanya khandi ndi malako shikalombwa shichila vandu vi likhola liu vulunji tawe; navutswa ni ka yavo vamenekanga malako nende vahingani, vandu vatamanu vakorwa Nyasaye nende vooni, vambakhananga khumenya mu vutakatifu nende vambakhana khulonda idini yosi; ni ka yavo viiranga vivuli vavo vene, nu khwiira vandi.

¹⁰Malako kalombwa shichila vandu vakholanga mwiima mutamanu kwi shifwavi inoho vandu vasatsa khukona na vasatsa vandi inoho vandu vakumilanga vandi ni tsingulu inoho vakaati inoho vakaatanga mushiina inoho vambakhananga khukhola shindu shiosi khulondokhana khu mechitso katoto.

¹¹Mechitso kenako kanyolekhanga mu Ivanjeli yu vukhumi ya naheelwa nzilwatse, nili Ivanjeli irulanga khu Nyasaye wakasitswa.

¹²Sanditsanga Mwami weru Yesu Kristo, wamba tsingulu tsiu khukhola muhinzilu kwanje. Musanditsanga shichila yambukula khuva musuuvilwa, khandi nandovola khuva murumishi wewe;

¹³khali niiva mumatukhu kavira, nalomoloma vindu vitamanu khulondokhana khuye, namutambitsa khandi nimunyeka; navutswa Nyasaye yambela tsimbavasi, shichila nakorwa shia nakholanga nimbula lisuuvila.

¹⁴Mwami weru yamba tsimbavasi tsietsie mu vunyishi, khandi namba lisuuvila nende vuyaanzi, viosi nivili mu Yesu Kristo.

¹⁵Livoola yili ni liatoto, litushili khuhuchililwa mu vwatoto: Yesu Kristo yalolekha mu shivala khuhonyinya vooni. Ninzi mwoni mutamanu khuvira vooni venavo voosi;

¹⁶navutswa Nyasaye yambela tsimbavasi, khu Yesu Kristo amanyinyi likhutsila lielie liatoto liali nalio mwinzi, uli mwoni mutamanu khuvira vandi voosi, khulu khuva shimanyilu khu yavo voosi valiitsa khusuuvila muye, khandi valinyola vulamu vwi mihika ni mihika.

¹⁷Luyali nende vukhumi viheelwi khu Mwami wi mihika ni mihika, uli mwoyo khandi unyala khuvula khulolekha, uli Nyasaye wonyene mihika ni mihika! Amina.

¹⁸Mwana wanje Timoteo, khuheele mivaalo yaka khulondokhana khu makhuva ku vuprofeti vwalomolomwa mumatukhu kavira khulondokhana khu yivi. Rumishila makhuva kenako khuli viuchi viu khukwanila vulahi vwene;

¹⁹khandi utsililile khulonda vulahi lisuuvila liolio nende tsinganakani tsiotsio tsindahi tsiu mukari. Vandu valala vayambakhana khulonda kali mu tsinganakani tsiavo tsindahi tsiu mukari; khandi vayononyinya lisuuvila liavo.

²⁰Valala khu vandu venavo ni Himenayo nende Alekisanda, va nahaana khu Shetani, khulu khwechitswa khulekha khunyeka Nyasaye.