Read tsotso VAHEBRANIA 12 Bible Online

VAHEBRANIA 12 - tsotso bible

VAHEBRANIA 12

¹Khulwa yako, lwa shituma shikali shia vashiahidi shikhuvotokhane, leshi khulekhane ni shindu shiosi shinyala khukhulitohitsa, khali vwoni vwa khukwitsamu. Leshi khwilukhache khuvirila mu likhutsila mu maliviri kali imbeli weru.

²Leshi khuheenze vulunji vwene khu Yesu, woyo wi lisuuvila lieru lirulakhu khurula muliraanga khutukha mulimalilikha. Yesu, shiyambakhana khukhutsila khu musalaba tawe! Navutswa shichila vuyaanzi vwa yali nalindililanga khunyola; shiyalolakhu ni tsisoni khukhutsila khu musalaba tawe. Yesu wayikhala nunundi khuluveka lu mukhono musatsa khu shisoko shiu vwami shia Nyasaye.

³Kanakanikhu ka Yesu yavirilamu; khuli yatsililila khwikhutsila vuhimwa khurula khu vandu vwoni! Muvuli khuvwa tsingulu inoho khukhutsa mwoyo.

⁴Lwa muchelitsanga khuli mukuura vwoni mushili khutukhakhu khu shikha shiu khwiirwa.

⁵Mwayivilila makhuva ku khutinyilitswa ka Nyasaye yalomoloma, shichila munyi khuli vaana veve? “Mwana wanje, uvuli khulechelitsa lwa Mwami Nyasaye akhuchelihitsanga, inoho khukhutsa mwoyo lwa akhusalilitsanga.

⁶Mwami Nyasaye achelihitsanga mundu wayayaanza, khandi asalilitsanga shia mundu wosi wahuchililanga khuva mwana wewe.”

⁷Mutsililile khwikhutsila mulinyakhana lia muvirilamu khuli ni tata umusalilitsanga. Linyakhana lienyu, limanyinyanga ndi Nyasaye amukholanga khuva vaana veve. Mwana anyala khuva alikhuho wa tata wewe ashili khusalilitsakhu?

⁸Niiva munyala khuvula khusalilitswa, khuli vaana veve voosi vasalilitswangwa, kamanyinyanga ndi shiumuli vaana veve vatoto tawe; navutswa vaana vaheeywa.

⁹Khumeeta khu kenako, vatata veru va khwivula va khusalilitsanga, nivakhuchelihitsa, nu khuvaha luyali shichila kenako. Ni hali khanga khanyishi kha khwenyekhanga khuve vichehitsi khu Nyasaye weru, uchilanga nu khunyola Roho khandi khuva mwoyo?

¹⁰Vatata veru va khwivula vakhusalilitsa khumatukhu mati, khulondokhana khuli valolanga nu vulahi; navutswa Nyasaye akholanga ndio khwenya khukhukhonya, khu khusanje mu vutakatifu vwevwe.

¹¹Lwa khusalilitswangwa, isaa yeneyo khuhulilanga vululu khuvira khuva nu vuyaanzi. Navutswa matukhu nikakhavira, nu khumali khusalilitswa munjila khuli yeneyo, voosi khunyolanga shihanwa shi milembe, khurulana khu limenya li likhola liu vulunji.

¹²Khulwa yako, chinji ikulu makhono kenyu, khandi musinjile vulunji!

¹³Mutsililile khuchendela khu injila inunji, khu khali shilenje shialema shivuli khulemela likali, navutswa shihone.

¹⁴Muchelitsi khumenya mu milembe na vandu voosi, khandi mumenye limenya litakatifu; shichila mundu avulakhuho uliitsa khulola Mwami vuchila khuva mutakatifu.

¹⁵Muchelitsi khulola ndi mundu avulakhuho unyala khuvula khunyola tsimbavasi tsia Nyasaye. Muvuli khuhaakhu mundu vwiyangu vu khuva mululu, khukhola vandi vanyakhane shichila vululu vwevwe.

¹⁶Muvuli khuhaakhu mundu vwiyangu vu khukhola mwiima mutamanu kwi shifwavi inoho khuvula khukhola ku vulunji khuli Esau, lwa yakuulitsa vunyali vwevwe vu mwana mukhulundu yali niyaheelwa, khulu khwenya khunyola shiukhulia isahani indala.

¹⁷Nikamali khwikholekha, mwamanya ndi Esau yenyanga tata wewe amukasitse; navutswa tata wewe yambakhana khumukasitsa, shichila yali navula vwiyangu vu khwikanila, khali niiva yalila niyenyanga akasitswi.

¹⁸Mushili khutukha khu Shikulu shia Sinai, shia munyala khutiilakhu khuli Vaisraeli vakhola. Mushili khutukha khu mulilu kwakhanga, havundu hi shisuundi, malesi mamwamu nende imbuutsa,

¹⁹ha shisiliva shihulilikhananga, khandi ha mwoyo kwahulilikhana. Lwa vandu vahulila mwoyo kwenoko nu kulomoloma, vakhuvoolela nu khuyaanza vavuli khuhulila likhuva lindi;

²⁰shichila shivali vanyala khulonda lilako liaheelwa livoolanga, “Khali niiva muruku kulatiila khu shikulu, kuleswi na machina khutukha lwa kukhutsa.”

²¹Ni kilikali, vindu viakholekha havundu henaho viali viu khurishitsa, khali Musa navoola, “Ndechelanga nindia.”

²²Navutswa mumali khutukha khu Shikulu shia Sayoni, khandi mu litaala likali lia Nyasaye uli mwoyo, nilili litaala likali lia Yerusalemi liu mwikulu, ha tsinjelosi tsinyishi tsiakanilanga.

²³Mumali khutukha mu shikhaalo shiu vuyaanzi vunyishi, shia vaana va Nyasaye vakhulundu khwivulwa, va mira kavo kahandikwa mwikulu. Mumali khutukha khu Nyasaye, mukhalachi wa vandu voosi mu shivala, khandi khu mioyo chia vandu valahi vakholwa khuva vaseletse.

²⁴Mumali khutukha khu Yesu, wachila lilakano liyia nilivaho; khandi khu masahi kamitswa ka khulaakanga vindu vilahi muno khuvira masahi ka Abili.

²⁵Khulwa yako, muvuli khwambakhana khuhulishitsakhu woyo ulomolomanga. Yavo vambakhana khuhulishitsa woyo wahaana likhuva lielie litakatifu khu vandu khulilova, shivali vihonolokha tawe. Khunyala khwihonolokha hatititi munjila shina, niiva khulambakhana khuhulishitsa woyo ulomolomanga khurula mwikulu!

²⁶Mwoyo kwekwe kwatechelitsa shivala mumatukhu kenako; navutswa nunundi walaaka, “Shinyala khutechelitsa khandi shivala shionyene tawe; navutswa khali likulu.”

²⁷Makhuva “Khali” kamanyinyanga havulavu ndi vindu vialoongwa viliitsa khunuyanyinywa nu khurulitswaho, khu vindu vikhanyala khuvula khunuyanyinywa vitsililile khuvaho.

²⁸Khulwa yako, chendi khusanditsi, shichila khunyoli vwami vukhanyala khunuyanyinywa tawe. Chendi khusaale khu Nyasaye munjila inyala khumuyaanzitsa, khumuhe luyali nu khuria.

²⁹Nyasaye weru ali khuli mulilu kusambanga nu kulaalitsa shia shindu shiosi.