Read tsotso VAHEBRANIA 13 Bible Online

VAHEBRANIA 13 - tsotso bible

VAHEBRANIA 13

¹Mutsililile khuyaanzana vene khuvene, khuli vasuuvili veshie venyekhanga vakhole.

²Mukhivilili khwinjilitsa vandu vacheni mu tsingo tsienyu tawe. Khwaliho na vandu valala vakhola ndio, manivinjilitsa tsinjelosi, vuchila khumanya ni tsinjelosi.

³Mwitsushitse yavo vavohwa mucheela, khuli mwavohwa mucheela navo. Mwitsushitse yavo vanyashitswangwa, khuli munyakhananga khuli vo vanyakhananga.

⁴Khutukha lihilana liu mundu musatsa nu mukhali liheelwi luyali na vandu voosi; khandi vandu vahilana vasuuvilane vene khuvene, shichila Nyasaye aliitsa khukhalachila vandu vakholanga mwiima mutamanu kwi shifwavi khandi yavo vakholanga vuheeyi.

⁵Muvuli khuyaanzilila tsisenti mu limenya lienyu; musuuvilile mu shia muli nashio. Nyasaye wavoola, “Shinyala khumulekha munyi inoho khumwivala tawe.”

⁶Khali ndio, khunyala khuva ni lisuuvilitsa nu khuvoola, “Mwami Nyasaye neye mukhonyi wanje, shinyala khuria tawe. Ni shina shiu mundu anyala khukhola?”

⁷Mwitsushitse vimilili venyu, nivali yavo va mwilwatsila likhuva lia Nyasaye. Kanakanikhu khuli vamenyanga, khandi khuli vakhutsa, ma mulonde lisuuvila liavo.

⁸Yesu Kristo neye mulala mwele mukolovo, nunundi khandi mihika ni mihika.

⁹Muvuli khukoyanyinywa na mechitso macheni ka mwakhamanya tawe. Nu vulahi, nu khunyoli tsingulu mu mioyo khurula khu tsimbavasi tsia Nyasaye; shikali khurula khu shiukhulia, shivula vukhonyi vwosi khu vandu vakalondanga tawe.

¹⁰Vasalisi vakholelanga mihinzilu havundu ha Vayahudi vasaalilanga vavula vunyali vu khulia shindu shiosi shiu musango khu vwaali vweru.

¹¹Mukali wa vasalisi voosi wa Vayahudi, aleranga masahi ki miruku Havundu Hatakatifu Hene khukholela musango ku khurulitsaho vwoni; navutswa mivili chi miruku chienecho chisambilwa ihale wene khurula mu maheemo ka vandu vamenyamu.

¹²Khulwa yako, Yesu yakhutsila khandi ihale wene khurula mu litaala likali, khunihitsa vandu khuvirila mu masahi keke mwene.

¹³Leshi khutsi khuye ihale wene khurula mu maheemo ka vandu vamenyamu, khandi khusanje naye tsisoni tsia yavirilamu.

¹⁴Litaala likali lia khunyala khumenyamu khumatukhu koosi livulakhuho khulilova khunu; navutswa khulindililanga khulola litaala likali lia khulindililanga khwitsa.

¹⁵Leshi khutsililile khwitsominya Nyasaye shia khase khosi khuli musango kweru khuvirila mu Yesu -- nishili shihanwa shia makhuva kachilanga nu khwiyema neye Mwami.

¹⁶Muvuli khwivilila khukhola malahi nu khukhonyana via muli navio vene khuvene; shichila misango khuli chienecho nachio chiyaanzitsanga Nyasaye.

¹⁷Mulonde malako ka vimilili venyu khandi mukhole ka venyanga mukhole. Valindanga mioyo chienyu, vuchila khuhulukha, shichila navo valiitsa khuvoolela Nyasaye khuli vakholanga muhinzilu kwavo. Niiva mulalonda malako kavo, valiitsa khukhola muhinzilu kwavo nivasangalanga; navutswa vuchila khuvelelitswa; shichila shiukunyala khumukhonya tawe.

¹⁸Mutsililile khukhusaalilakhu. Khwamanya ndi tsinganakani tsieru tsiu mukari ni tsindahi, shichila khwikombanga khumatukhu koosi khukhola kali malahi.

¹⁹Muvoolelanga numuyaanza musaalilikhu nu mwoyo mulala, nikanyalikha Nyasaye nayaanza angalushitsi khu munyi vwangu yuvu.

²⁰Nyasaye uchilanga milembe nichivaho, wisimushitsa khurula mu likhutsa Mwami weru Yesu Kristo, Mwayi mukali wa makondi, khuvirila mu masahi kahambanyinyanga lilakano li mihika ni mihika,

²¹amuhe shia shindu shiosi shilahi, khu mukhole lienya lielie; khandi akhole mwene mu khutsi ka muyaanzitsanga khuvirila mu Yesu Kristo; utushili khuheelwa vukhumi mihika ni mihika! Amina.

²²Vasuuvili vashianje, musayanga numuyaanza muhulishitsi mu vwikhutsili likhuva liu khutinyilitswa yili; shichila muhandichili makhuva muvwimbi.

²³Mwenyekhanga mumanye ndi musuuvili washieru Timoteo umali khuvohololwa khurula mucheela. Niiva anyala khutukha hanu vwangu yuvu, nyala khwitsa naye khumulola.

²⁴Muhaane milembe chieru khu vimilili venyu voosi, halala na vandu va Nyasaye voosi. Vasuuvili varulanga mu shivala shia Italia, vamuheele milembe chiavo.

²⁵Tsimbavasi tsia Nyasaye tsive na munyi voosi. Amina.