Read tsotso VAHEBRANIA 5 Bible Online

VAHEBRANIA 5 - tsotso bible

VAHEBRANIA 5

¹Shia Mukali wa vasalisi voosi arovolwangwa khurula mu vandu veve mwene, khandi aheelwa muhinzilu kukhurumishila Nyasaye havukono ha vandu, khuhaana vihanwa khandi khukhola misango chiu khurulitsaho vwoni.

²Lwa ye mwene ali muteteshele mu shia shindu shiosi, ali nu vunyali vu khuva muhoma na yavo vakhamanyakhu shindu shiosi khandi vakholanga vindu vitamanu.

³Khulondokhana khu shivune yishi, khali ye yenyekhanga akhole musango, shikanyala khuva shichila vwoni vwevwe vwonyene tawe, navutswa shichila vwoni vwa vandu.

⁴Mundu avulakhuho unyala khwivukulila luyali lu khuva Mukali wa vasalisi voosi. Khutukha ave niyalaangwa na Nyasaye, khuli Haruni yali niyalaangwa.

⁵Khulwa yako, khali Kristo shikanyala khuva yivukulila luyali lu khuva Mukali wa vasalisi voosi tawe. Navutswa yarovolwa na Nyasaye wamuvoolela, “Nivi neye Mwana wanje; nunundi ninzi Tata wowo.”

⁶Nyasaye avoolanga khandi havundu handi, “Uliitsa khuva musalisi mihika ni mihika, munjila indala yene khuli Melikizedeki.”

⁷Lwa Yesu yali nashili mwoyo, yasaala khandi nalila nu mwoyo mukali khu Nyasaye, wali nu vunyali vukhumuhonyinya khurula mu likhutsa. Nyasaye yamuhulila shichila yichehitsa khandi namuha luyali.

⁸Navutswa khali niiva yali Mwana wa Nyasaye, yeka khulonda malako ka Nyasaye khuvirila mulinyakhana lielie.

⁹Lwa Yesu yakholwa museletse, yamanya nakwa shirula shiu vuhonyinyi vwi mihika ni mihika khu vandu voosi valondanga malako keke.

¹⁰Nyasaye yamurovola khuva mukali wa vasalisi voosi, munjila indala yene khuli Melikizedeki.

¹¹Khuli na makhuva manyishi ka khunyala khuvoola khulondokhana khu yaka; navutswa shikanyala khuva nu vutoro khumuvoolela koosi tawe; shichila mwasuluhala mu limanya.

¹²Khali niiva nunundi mwenyekhanga muve nu muli veechitsi, nu vulahi mundu namwechitsikhu makhuva ku khuraanga ka mwenyekhanga muve numwamanya khulondokhana khu likhuva lia Nyasaye. Vukhala vu khulia shiukhulia shitinyu, mushienyanga khung'wa maveele.

¹³Mundu ung'wetsanga maveele ashili mwana mutoro, vuchila khumanyakhu shindu shiosi khulondokhana khu likhola liu vulunji inoho vindu vitamanu.

¹⁴Navutswa shiukhulia shitinyu, khuluveka lundi ni shia vandu vahindila, vamanya munjila indahi vwavukhani vuliho hakari hi shindu shilahi nende shitamanu.