Read tsotso YAKOBO 2 Bible Online

YAKOBO 2 - tsotso bible

YAKOBO 2

¹Vasuuvili vashianje, muvuli khwihonela vandi, lwa mutsilililanga khuva ni lisuuvila mu Mwami weru Yesu Kristo, uli Mwami wu vukhumi.

²Khuvoole ndi mundu muhinda wifwala ipete yalombwa khu itsahabu, nafwali tsinguvu tsindahi tsiu vukuuli vululu aliitsa mu shikhaalo shienyu, khandi mundu mumanani niyifwali matasi yinjilimu khandi.

³Niiva mulavukula munjila indahi mundu wifwali tsinguvu tsindahi mwenoyo, mumuvoolele, “Hamba hanu wikhale khu shisoko shilahi yishi,” navutswa muvoolele mundu mumanani, “Sinjila yeyo,” inoho mumuvoolele, “Yikhala hasi ha vilenje heru,”

⁴munyi shiumunyala khuva muleri vwahukhanyinyi hakari henyu vene, lwa mukhalachilanga vandi khurulana khu tsinganakani tsindamanu?

⁵Vasuuvili vashianje va nayaanza, hulishitsi! Nyasaye yarovola vandu vamanani vamenyanga mu shivala shinu, khulu khwenya vave vahinda mu lisuuvila, khandi vanyole vwami vwa yalaaka aliitsa khuha yavo vamuyaanza.

⁶Navutswa munyi muchayanga vandu vamanani. Shikanyala khuva kilikali, ni vandu vahinda vamutambitsanga, nivamukhwesesa khumuhila mushiina khuyaalwa?

⁷Navo valala vele vanyekanga lira lilahi lia mwaheelwa.

⁸Niiva ni katoto murweshitsanga lilako khulondokhana khu Vwami, linyolekhanga mu Mahandiko Matakatifu, “Uyaanze mureende wowo khuli mwene wiyaanza,” muliitsa khuva numukholanga ku vulunji.

⁹Navutswa niiva muliitsa khwihonela vandi khulondokhana khu likoondo liavo, muliitsa khuva numukholanga vwoni, khandi Malako nako kaliitsa khumukhalachila, shichila mukameneche.

¹⁰Mundu ulondanga malako koosi, khali kaloleshe umeneche lilako lilala khu malako kenako, aliitsa khulolekha umeneche koosi.

¹¹Woyo wavoola, “Uvuli khuheeya,” neye wavoola khandi, “Uvuli khwiira.” Niiva shiunyala khuheeya tawe, navutswa wiiri mundu, uliitsa khuva numeneche malako.

¹²Khulwa yako, mwenyekhanga mulomolome, khandi mukhole vikholwa khuli vandu valiitsa khukhalachilwa khuvirila khu Malako, kachilanga nu khuva vavoholole.

¹³Nyasaye shialiitsa khuvela tsimbavasi mundu wakhavelakhu vandi tsimbavasi, lwa aliitsa khuva namukhalachilanga tawe. Navutswa livela tsimbavasi lili ni tsingulu tsinyishi khuvira likhalachilwa.

¹⁴Vasuuvili vashianje, nu vukhala shina vu mundu anyala khunyola, niiva anyala khuvoola ali ni lisuuvila, navutswa avula vikholwa muye? Lisuuvila lielie linyala khumuhonyinya toto?

¹⁵Niiva musuuvili musatsa inoho mukhali avula tsinguvu tsiu khwifwala nende shiukhulia,

¹⁶vukhala shina vwa munyolanga, lwa muvavoolelanga, “Nyasaye amukasitse? Nyoli luya, mamulii vulahi shiukhulia!” -- vuchila khuvaha vindu via vanyala khurumishila mu limenya liavo?

¹⁷Nindio khandi lisuuvila lienyekhanga live. Lisuuvila lionyene vutswa, vuchila vikholwa lili khuli liakhutsa.

¹⁸Mundu mulala aliitsa khuvoola, “Yivi uli ni lisuuvila, ninzi ndi ni vikholwa.” Manyinyakhu lisuuvila liolio vuchila vikholwa, ninzi khumanyinyi lisuuvila lianje khurulana khu vikholwa.

¹⁹Musuuvilanga ndi Nyasaye nu mulala wonyene. Mukholanga vulahi! Khali matimoni kasuuvilanga -- makatechela nikaria.

²⁰Munyi vandu vayiingwa! Mwenyanga khumanyinywa ndi lisuuvila, vuchila vikholwa livula vukhala vwosi?[1]

²¹Kuuka weru Aburahamu anyala khuva yakholwa munjila shina khuva wi likhola liu vulunji imbeli wa Nyasaye? Khwali khuvirila mu vikholwa vievie via yakhola, lwa yahaana mwana wewe Isaka khukholelwa khuli shihanwa shiu musango khu vwaali.

²²Shiumunyala khulolakhu tawe? Lisuuvila lielie nende vikholwa viakhola muhinzilu kwa halala. Lisuuvila lielie liakholwa khuva liatoto khuvirila mu vikholwa vievie.

²³Mahandiko Matakatifu karweshitswa kavoolanga, “Aburahamu yasuuvila Nyasaye, khandi shichila lisuuvila lielie, Nyasaye yamuhuchilila khuva wi likhola liu vulunji.” Khulwa yako, Aburahamu yamanya nalaangwa mulina wa Nyasaye.

²⁴Munyi vene mulolanga ndi mundu akholwangwa khuva wi likhola liu vulunji khuvirila mu vikholwa vievie, navutswa shikanyala khuva khuvirila mu lisuuvila lielie lionyene tawe.

²⁵Khali malala mele kakholekha khu mukhali wakholanga vulaaya walaangwangwa Rahabu. Yakholwa khuva wi likhola liu vulunji khuvirila mu vikholwa vievie, lwa yinjilitsa munjila indahi Vaisraeli vali nivitsi khurunishitsa shikholekhanga; khandi navamanyinya injila yindi ya vanyala khulondelakhu.

²⁶Khulwa yako, khuli mmbili kwa mwoyo kuvulamu kwakhutsa, nindio khandi lisuuvila vuchila vikholwa lilolekhanga khuli liakhutsa.