Read tsotso 2 PETRO 1 Bible Online

2 PETRO 1 - tsotso bible

2 PETRO 1

¹Ninzi Simoni Petro, murumishi khandi murumwa wa Yesu Kristo. Mbandichilanga munyi vamuli ni lisuuvila lilahi lilala liene, khuli lia khuli nalio khuvirila mu likhola liu vulunji vurulanga khu Nyasaye weru nende Muhonyinyi Yesu Kristo.

²Tsimbavasi nende milembe vive na munyi mu vunyishi khuvirila mu vucheli vwenyu vwa muli navwo khulondokhana khu Nyasaye nende Mwami weru Yesu.

³Tsingulu tsiu vutakatifu vwa Nyasaye tsia khuha shia shindu shiosi, shia khwenyanga mu limenya lieru, khulu khumenya khuli Nyasaye yenyanga, khuvirila mu vucheli vwevwe shichila neye wakhulaanga khusanje naye mu vukhumi vwevwe nende mu vulahi vwevwe mwene.

⁴Munjila iyi, Nyasaye wa khuha vihanwa vi tsingulu, khandi viu vukuuli vululu khuli mwene yali niyalaaka, khu khuvirila mu vihanwa vienevo mulihonolokha khurula mu vukoyanu vwa vandu vu mu shivala; khandi musanje mu liiva lia Nyasaye liu vutakatifu.

⁵Khulondokhana khu shivune yishi, mwenyekhanga muchelitsi khuli munyala mumeete khu lisuuvila lienyu malahi; khandi khu malahi, mwenyekhanga mumeetekhu vucheli;

⁶khandi khu vucheli, mumeetekhu khwilinda vene vulahi; khandi khu khwilinda vene vulahi, mumeetekhu likhutsila; khandi khu likhutsila, mumeetekhu liiva liu vutakatifu vwa Nyasaye;

⁷khandi khu liiva liu vutakatifu lia Nyasaye, mwenyekhanga mumeetekhu khulolela vasuuvili veshie mwoyo mulahi; khandi khu khulolela vasuuvili veshie mwoyo mulahi, mwenyekhanga mumeetekhu vuyaanzi.

⁸Mwenyekhanga muve numuli ni vindu yivi. Niiva muliitsa khuva navio mu vunyishi, viliitsa khumuha tsingulu, khandi viliitsa khuchila muve ni vikholwa vilahi mu vucheli vwenyu khulondokhana khu Mwami weru Yesu Kristo.

⁹Navutswa niiva mundu avula vindu yivi, mundu mwenoyo nu muvekhu, khandi wakhaywa khulola ihale wene, khandi wayivilila ndi wasemehwa khurula mu vwoni vwevwe vwa khale.

¹⁰Khulwa yako, vasuuvili vashianje, muchelitsi ni tsingulu khuli munyala khutsililila mu limenya lienyu khumanyinya ndi ni kilikali Nyasaye neye wamulaanga, khandi namurovola munjila yatoto. Niiva muliitsa khukhola kenako, shiumuliitsa khukwa mu vwoni tawe;

¹¹shichila muliitsa khunyola vunyali vwatoto vu khwinjila mu Vwami vwi mihika ni mihika vu Mwami weru, uli Muhonyinyi Yesu Kristo.

¹²Khulwa yako, shia khase khosi nakhayaanzi khumwitsushitsa makhuva khulondokhana khu vindu vienevo, khali niiva mwavimanya khandi mwayumbakhwa mu katoto ka mwechitswa.

¹³Nganakananga nu vulahi nikholi ndio, lwa shili mwoyo mu shivala shinu, khulu khwenya khumuha tsingulu tsiu khwitsushitsa vindu vienevo.

¹⁴Manyi ndi nzitsanga khukhutsa vwangu yuvu, khuli Mwami weru Yesu Kristo yambolela havulavu.

¹⁵Niitsa khuchelitsa khukhola koosi kanyala khulola ndi lwa niitsa khuva ninakhutsa, mulinyola tsingulu tsiu khwitsushitsa vindu vienevo.

¹⁶Lwa khwamwechitsa makhuva khulondokhana khuli Yesu Kristo aliitsa khukalukha khuvirila mu vunyali vwevwe, khwalekhana ni tsinganu tsiu vucheli vwa vandu vali nivalomba; navutswa khutsi vene khwalola ni tsimoni tsieru vukhumi vwevwe.

¹⁷Lwa yanyola luyali nende vukhumi khurula khu Nyasaye, uli Tata, lwa mwoyo kwitsa khuye khurula mu Vukhumi vwi Tsingulu, nu kuvoola, “Uyu neye Mwana wanje wa nayaanza, nyanzitswangwa naye,”

¹⁸khwahulila mwoyo kwenoko nu kurulanga mwikulu, lwa khwali nu khuli naye khu shikulu shitakatifu.

¹⁹Khali khuli ni lisuuvilitsa liatoto khulondokhana khu likhuva lia vaprofeti valomoloma. Muliitsa khuva nu mukholanga vulahi, niiva muliitsa khulilonda, shichila lili khuli itaaha yakhanga vulavu mu shisuundi, khutukha khulitukhu lilondakhu mu mavwevwe, lwa vulavu vwakhanga nu vurula khu Inyining'ini yu mu mavwevwe vwakhanga mu mioyo chienyu.

²⁰Navutswa khushila muno, mwenyekhanga mumanye ndi mundu avulakhuho, unyala khwivoolela mwene makhuva ku vuprofeti vuli mu Mahandiko Matakatifu kavoolanga;

²¹shichila likhuva liu vuprofeti, shilinyala khuva liarula khulondokhana khu lienya liu mundu tawe; navutswa tsingulu tsia Roho Mutakatifu tsimilila vandu, lwa valomoloma likhuva khurula khu Nyasaye.