Read tsotso VAKHALACHI 1 Bible Online

VAKHALACHI 1 - tsotso bible

VAKHALACHI 1

¹Lwa Yoshwa yali niyakhutsa, Vaisraeli vareeva Mwami Nyasaye, “Ni vandu vuluhia shina mu vandu vi tsimbia tsieru, valiitsa khuva vu khuraanga khutikulukha khutsia khukwana Vakanaani?”

²Mwami Nyasaye yavoola, “Vandu vuluhia lwa Yuda, valiitsa khuva vu khuraanga khutsia. Mali khuvaha shivala shienesho khuva shiavo.”

³Vandu vuluhia lwa Yuda vavoolela vamwavo vavo, nivali vandu vuluhia lwa Simioni, “Hambi khutsi na munyi mu lusomo lwa khwaheelwa, nikanyalikha khukwane Vakanaani. Nikamali khwikholekha kario, khali khutsi khuliitsa khutsia khumukhonya khukwana mu lusomo lwenyu lwa mwaheelwa.” Nalwo lwa vandu vuluhia lwa Simioni vasimukha nivatsia navo.

⁴Lwa vandu vuluhia lwa Yuda vakwana, Mwami Nyasaye yavaha tsingulu tsiu khukwana Vakanaani nende Vapeerizi; khali viira vandu tsiheelefu likhomi mu litaala lia Bezeki.

⁵Vanyola mundu walaangwangwa Adoni-bezeki mu litaala lia Bezeki nivamukwana; nivakuura Vakanaani nende Vapeerizi.

⁶Adoni-bezeki yilukha; navutswa vamuhitsanyinya nivamukumila. Vakutuula vitere vievie nende mitere chiechie mikali khu vilenje.

⁷Adoni-bezeki yavoola, “Vami makhomi saba va vitere vikali via makhono kavo nende mitere chiavo chiareemwa vatooli matonye hasi hi imesa yanje. Nyasaye umali khuvanzila makhuva ka navakhola.” Adoni-bezeki yahilwa Yerusalemi, nakhutsilayo.

⁸Vandu vuluhia lwa Yuda vakwana litaala likali lia Yerusalemi, khandi nivalivukula. Viira shia mundu wosi mu litaala likali lienelo, khali nivalisamba nu mulilu.

⁹Nivamali khukhola kenako, vandu vuluhia lwa Yuda vakholomokha nivatsia khukwana Vakanaani vamenyanga mu shivala shi vikulu, ikuvanda wi shivala shia Kanaani, khandi mu shivala shiumakana khuluveka luli ikuvanda.

¹⁰Vandu vuluhia lwa Yuda vakwana Vakanaani vi litaala lia Heburoni, (litaala lienelo lialaangwangwa khale Kiriatsi Aruba). Vakuura Sheshahi, Ahimani, nende Tulumahi.

¹¹Vandu vuluhia lwa Yuda varulayo nivatsia khukwana vandu vi litaala lia Debiri, (litaala lienelo lialaangwangwa khale Kiriatsi-seferi).

¹²Nalwo lwa Kalebu yavoola, “Niitsa khuveshela mundu uliitsa khukwana litaala lia Kiriatsi-seferi, nu khulivukula ni tsingulu, mwana wi shikhana wanje ulaangwangwa Akusahi.”

¹³Otsienieli mwana wa Kenazi, wali nali amwavo mushie wa Kalebu, yavukula litaala lienelo. Kalebu yamuveshela mwana wi shikhana wewe walaangwangwa Akusahi khuva mukhali wewe.

¹⁴Akusahi yasimukha natsia khulola Otsienieli. Akusahi yamuvoolela nayaanza areeve kuuka wewe amuhe mulimi. Lwa Akusahi yikha khu ipunda yeye, Kalebu yamureeva, “Ni shina shia wenyanga khukholele?”

¹⁵Akusahi yavoolela tata wewe, “Nyenyanga umbe shihanwa; shichila mulimi kwa wakhuha kuli mu shivala shiumakana. Umbe khandi lusomo khuluveka luli ivuluka nende ikuvanda.” Kalebu yamuha tsisieveye tsiali nitsili ivuluka nende ikuvanda.

¹⁶Vitsukhulu va Vakeni, nivali vakhwasi va Musa, vatikulukha nivarula mu litaala lia mashindu nivatsia na vandu vuluhia lwa Yuda mwichendanyama himbi khuluveka luli ikuvanda wi litaala lia Aradi mu lusomo lwa Yuda. Vasimukha nivatsia khumenya na Vaamaleki.

¹⁷Vandu vuluhia lwa Yuda vasimukha nivatsia na vamwavo vavo, nivali vandu vuluhia lwa Simioni. Vakuura Vakanaani vamenyanga havundu halaangwangwa Zefatsi; nivativitsa havundu henaho. Nalwo lwa vakulikha havundu henaho lira Horuma.

¹⁸Vandu vuluhia lwa Yuda vavukula khandi mataala ka Gaza, Ashikeloni, nende Ekuroni -- shia litaala nu lusomo lwalio.

¹⁹Mwami Nyasaye yali halala na vandu vuluhia lwa Yuda. Vavukula shivala shi Vikulu; navutswa vakhaywa khukhunga vandu vene shivala shienesho; shichila vandu venavo vali na makaare kiliihe kali nikalombwa khu shivia.

²⁰Kalebu yaheelwa litaala lia Heburoni khuli Musa yali niyavoola. Kalebu yakhunga mu litaala lienelo vitsukhulu vavaka khurula mu vandu vu lwivulu lwa Anaka.

²¹Navutswa vandu vuluhia lwa Benyamini vakhaywa khukhunga Vayeebusi, vamenyanga mu litaala likali lia Yerusalemi. Khali Vayeebusi vashimenyanga Yerusalemi mu vandu vuluhia lwa Benyamini nunundi.

²²Vandu vi inzu ya Yosefu vakwana litaala lia Betseli; Mwami Nyasaye yali halala navo.

²³Vandu vi inzu ya Yosefu varuma vandu khutsia khurunishitsa litaala lia Betseli (lialaangwangwa mumatukhu kakhale Luzi).

²⁴Lwa vandu vukhurunishitsa venavo valola mundu narulanga mu litaala likali; vamuvoolela, “Khumanyinye khuli khunyala khwinjila mu litaala likali. Khutsitsanga khukhukholela malahi.”

²⁵Mundu mwenoyo yavamanyinya injila yu khwinjila mu litaala likali. Nalwo lwa vandu vi tsimbia tsia Efurahimu nende Manaase viira shia mundu wosi, wali niyamenya mu litaala lienelo; nivavula khwiira mundu mwenoyo nende vandu vi inzu yeye.

²⁶Mundu mwenoyo yasimukha natsia mu shivala shia Vaahitse, wayumbakha litaala, lia yakulikha lira Luzi; khali litaala lienelo lishilaangwangwa ndio nunundi.

²⁷Navutswa vandu vuluhia lwa Manaase vakhaywa khukhunga vandu va mataala ka Betsi Shani, Tanaki, Dori, Ibulehamu, Megido, halala ni michitsi chiali khuko himbi. Navutswa Vakanaani vatsililila khumenya mu shivala shienesho.

²⁸Lwa Vaisraeli vanyola tsingulu, vanika Vakanaani khukhola muhinzilu mutiinyu; navutswa khali vakhaywa khuvakhunga voosi khurula mu shivala shienesho.

²⁹Vandu vuluhia lwa Efurahimu vakhaywa khukhunga Vakanaani vi litaala lia Gezeri; ma Vakanaani nivatsililila khumenya navo mu shivala shienesho.

³⁰Vandu vuluhia lwa Zabuloni vakhaywa khukhunga Vakanaani vi litaala lia Kituroni inoho lia Nahaloli, vamenyanga muvo; navutswa vavanika ni tsingulu khuvakholela muhinzilu.

³¹Vandu vuluhia lwa Asheri vakhaywa khukhunga Vakanaani vamenyanga mu mataala ka Ako, Sidoni, Ahulabu, Akuzibu, Helubaha, Afeki, nende Rehobu.

³²Vandu vuluhia lwa Asheri vatsililila khumenya na Vakanaani, shichila vakhaywa khukhunga Vakanaani mu mataala kenako.

³³Vandu vuluhia lwa Nafutali vakhaywa khukhunga vandu mu mataala ka Betsi-shemeshi nende Betsi-anatsi. Vandu vuluhia lwa Nafutali vatsililila khumenya na Vakanaani; navutswa vavanika ni tsingulu khuvakholela mihinzilu.

³⁴Vaamori vanika vandu vuluhia lwa Dani khumenya mu shivala shi vikulu, nivavikalila khukholomokha hasi khwitsa mu lwomera.

³⁵Vaamori vatsililila khumenya mu mataala ka Ahiyaloni, Shahalibimu, khandi mu shikulu shia Heresi, navutswa vandu vi tsimbia tsia Efurahimu nende Manaase vavamiha, khali nivavanika ni tsingulu khuvakholela mihinzilu.

³⁶Mupaka kwa Vaamori kwraanjilanga khuluveka luli ivuluka wi litaala lia Sela khuvirila mu Injila ya Akurabimu nu kutsililila khutukha injelekha.