Read tsotso VAKHALACHI 10 Bible Online

VAKHALACHI 10 - tsotso bible

VAKHALACHI 10

¹Lwa Abimeleki yali niyakhutsa, Tola mwana wa Puha, wali mukuuka wa Dodo, yalolekha khwitsa khuhonyinya Vaisraeli. Tola yarulanga mu vandu vuluhia lwa Isakari. Yamenyanga mu litaala lia Shamiri mu shivala shi vikulu shia Efurahimu.

²Tola yamiha Israeli khumihika makhomi kavili na chivaka. Yakhutsa, mmbili kwekwe nukuyeveelwa mu shilindwa mu litaala lia Shamiri.

³Lwa Tola yali niyakhutsa, Yahiru warulanga mu lusomo lwa Gileadi yamiha havukono hehe. Yahiru yamiha Israeli khumihika makhomi kavili na chivili.

⁴Yahiru yali wayivula vaana vi shiyayi makhomi kavaka, vahilanga tsipunda makhomi kavaka. Vasinjililanga mataala makhomi kavaka mu lusomo lwa Gileadi, kalaangwangwa nunundi Michitsi chia Yahiru.

⁵Yahiru yakhutsa, mmbili kwekwe nukuyeveelwa havundu halaangwangwa Kamoni.

⁶Vaisraeli vakhola khandi vwoni imbeli wu Mwami Nyasaye. Vasaalanga khu Mabaali nende Mashitarotsi, halala na vanyasaye va Vasiria, Vasidoni, Vamoabu, Vaamoni nende Vafilisti. Vambakhana khuva vasuuvilwa mu Mwami Nyasaye khali nivalekha khusaala khuye.

⁷Mwami Nyasaye yalolela Vaisraeli vurima, nalekha Vafilisti nende Vaamoni khuvakwana.

⁸Vatambitsa khali nivasalilitsa Vaisraeli vamenyanga mu shivala shia Vaamori khuluveka luli ivukwi wu Muchela kwa Yorodani mu lusomo lwa Gileadi khumihika likhomi na munane.

⁹Vaamoni vambukha khali Muchela kwa Yorodani nivatsia khukwana vandu vi tsimbia tsia Yuda, Benyamini nende Efurahimu. Vaisraeli vaheenda mwoyo muno.

¹⁰Nalwo lwa Vaisraeli vililila khu Mwami nivavoola, “Khukholi vwoni imbeli wowo, shichila khumali khukhwambakhana yivi Nyasaye weru, khali khusaalanga khu Mabaali.”

¹¹Mwami Nyasaye yavavoolela, “Lwa Vamisri, Vaamori, Vaamoni, Vafilisti,

¹²Vasidoni, Vaamaleki, Vamahoni vamunyashitsa mumatukhu kakhale, mwandilila. Shiali ninzi wamuhonyinya khurula khuvo?

¹³Navutswa mwatsililila khunyambakhana, khali numusaala khu vanyasaye vandi. Shinzitsanga khumuhonyinya khandi tawe.

¹⁴Tsi mulilile vanyasaye va munyi vene mwarovola khale. Leshi vamuhonyinyi numuli mu vutiinyu vwenyu!”

¹⁵Navutswa Vaisraeli vavoolela Mwami Nyasaye, “Khukholi vwoni imbeli wowo. Ukhukhole makhuva koosi ka ulolanga ni malahi; navutswa khukhusayanga nuyaanza ukhuhonyinye nunundi.”

¹⁶Valekhana na vanyasaye vavo vacheni, nivaraanga khusaala khu Mwami Nyasaye; khali Mwami Nyasaye yaheendela Vaisraeli mwoyo.

¹⁷Vaamoni virechekha khutsia khukwana nivamenya mu maheemo kavo mu lusomo lwa Gileadi. Vaisraeli vakanila halala nivamenya mu maheemo mu litaala lia Mizipa lili mu lusomo lwa Gileadi.

¹⁸Vaisraeli nende vimilili vavo vireevana vene khuvene havundu henaho, nivavoola, “Ni viina utsitsanga khukhwimilila khutsia khukwana Vaamoni? Mundu uliitsa khukhwimilila neye uliitsa khuva mwimilili wa shia mundu wosi mu lusomo lwa Gileadi.”