Read tsotso VAKHALACHI 11 Bible Online

VAKHALACHI 11 - tsotso bible

VAKHALACHI 11

¹Yefutsa wamenyanga mu lusomo lwa Gileadi yali musikali wechela khukwana muliihe. Tata wewe yalaangwangwa lira Gileadi; navutswa mama wewe yali mukhali wakholanga vulaaya.

²Mukhali wa Gileadi yamwivulila vaana vandi vi shiyayi. Lwa vali nivakhahindila, vaana venavo vakhunga Yefutsa ingo wavo. Vamuvoolela, “Shindu shivulakhuho shiutsitsanga khunyolakhu khurula khu miandu chia tata weru namali khukhutsa; shichila uli mwana wa tata weru yivula khu mukhali wundi.”

³Yefutsa yilukha vamwavo veve natsia khumenya mu litaala lia Tobu. Vandu vavula vukhonyi vwosi viyunga naye havundu henaho, khali nivachenda naye shia havundu hosi.

⁴Matukhu mati nikakhavira, lwa Vaamoni vakwana Vaisraeli,

⁵vimilili va vandu mu lusomo lwa Gileadi vasimukha nivatsia khuvukula Yefutsa khurula mu litaala lia Tobu.

⁶Vamuvoolela, “Hamba, uve mwimilili weru, khutsia khukwana Vaamoni.”

⁷Navutswa Yefutsa yavavoolela, “Munyi vene mwali mwanzambakhana khali mwachila ninzilukha khurula mu inzu ya tata wanje. Shichila shina mwenyanga mukhonye lwa muli mu vutiinyu?”

⁸Vimilili venavo vavoolela Yefutsa, “Khwitsi khukhulola nunundi shichila khwenyanga utsi na khutsi khukwana Vaamoni khandi wimilili vandu voosi mu lusomo lwa Gileadi.”

⁹Yefutsa yavavoolela, “Niiva mulangalushitsa ingo khutsia khukwana na Vaamoni, ma Mwami Nyasaye angurili, niitsa khuva mwamihi wenyu.”

¹⁰Vimilili venavo vamuvoolela, “Khumali khuhuchilila. Mwami Nyasaye nu mushiahidi weru.”

¹¹Yefutsa yasimukha natsia na vimilili va vandu vu lusomo lwa Gileadi, ma vandu nivamwamihitsa khuva mwamihi khandi mwimilili wavo. Yefutsa yakalushila khuvoola makhuva keke ka yali niyenyi kakholwi imbeli wu Mwami Nyasaye, lwa yali nali mu litaala lia Mizipa.

¹²Yefutsa yaruma varumwa khutsia khu Mwami wa Vaamoni khumureeva, “Ni shina shichilanga nu khukwana? Shichila shina nuseera shivala shieru?”

¹³Mwami wa Vaamoni yavoolela varumwa va Yefutsa, “Lwa Vaisraeli vali nivakharula mu shivala shia Misri, vavukula shivala shianje khuraanjila mu litaala lia Arunoni khutukha mu litaala lia Yaboku, khali khutukha khu Muchela kwa Yorodani. Ngalushitsila shivala shianje nunundi mu milembe.”

¹⁴Yefutsa yaruma khandi varumwa veve khu Mwami wa Vaamoni

¹⁵na makhuva ku khumuvoolela, “Vaisraeli vashili khuvukulakhu shivala shia Moabu inoho shia Vaamoni.

¹⁶Navutswa lwa varula mu shivala shia Misri, vakhalakanyila mu shiangalang'wi khutsia khutukha khu Inyanza Imuuchi, khali nivachenda khutsia khutukha mu litaala lia Kadeshi.

¹⁷Vaisraeli varuma varumwa khu Mwami wa Edomu, avahuchilile khukhalakanyila mu shivala shieshie. Navutswa Mwami wa Edomu yambakhana khuvahuchilila khukhalakanyilamu. Nalwo lwa Vaisraeli vamenya mu litaala lia Kadeshi.

¹⁸Vakhalakanyila mu shiangalang'wi, nivavotokhana khundulu khwi shivala shia Edomu khandi khu shivala shia Moabu khutukha lwa vatukha khuluveka luli ivukwi wi shivala shia Moabu, khuluveka lundi lu Muchela kwa Arunoni. Vamenyayo, vuchila khwambukha Muchela kwa Arunoni, shichila nakwo kwali mupaka kwa Moabu.

¹⁹Vaisraeli varuma varumwa khu Mwami Sihoni wa Vaamori, mu litaala lia Heshiboni, nivamuvoolela, ‘Nuyaanza, khuhuchilile khukhalakanyile mu shivala shioshio khutsia havundu heru vene.’

²⁰Navutswa Sihoni yambakhana khuhuchilila Vaisraeli khukhalakanyila mu lusomo lwelwe. Sihoni yalaanga halala vasikali veve, nivamenya mu litaala lia Yahazi, khali nivakwana Vaisraeli.

²¹Navutswa Mwami Nyasaye, uli Nyasaye wa Israeli yakuurila Vaisraeli Mwami Sihoni halala na vasikali veve. Vaisraeli vavukula lusomo lwa Vaamori vali ni vamenyanga mu shivala shienesho.

²²Vamenya mu lusomo lwa Vaamoni lwosi khuraanjila khu Muchela kwa Arunoni khuluveka luli ikuvanda nivatsia khutukha khu Muchela kwa Yaboku khuluveka luli ivuluka khandi khuraanjila mu shiangalang'wi khuluveka luli ivukwi khutsia khutukha khu Muchela kwa Yorodani khuluveka luli imbo.

²³Mwami Nyasaye, uli Nyasaye wa Israeli neye wakhunganyinya Vaamori khurulamu shichila vandu veve Israeli.

²⁴Munyala khuchelitsa khushikalushitsa? Munyala khutsililila khuva ni shindu shia nyasaye wenyu ulaangwangwa Chemoshi yamuha. Navutswa khutsitsanga khuvikha shia shindu shiosi shiu Mwami Nyasaye, uli Nyasaye weru, yakhuha.

²⁵Munyi shiumuli valahi khuvira Balaka mwana wa Zipori wa Moabu tawe?

²⁶Vaisraeli vali vamenya mu mataala ka Heshiboni nende Aroheri, khali mu michitsi chiliyo himbi, khandi mu mataala kali himbi khu Muchela kwa Arunoni khumihika chivaka, halala na mataala koosi kali khuluchinga lu Muchela kwa Arunoni. Shichila shina numuvula khunyala khukakalushitsa vwangu?

²⁷Shindu shitamanu shivulakhuho shia inzi nakhukholelakhu. Navutswa munyi mukholi vutamanu lwa mwenyanga khungwana. Mwami Nyasaye neye mukhalachi. Neye utsitsanga khuviritsa nunundi kakholekha hakari ha Vaisraeli nende Vaamori.”

²⁸Navutswa Mwami wa Vaamoni yambakhana khuhulishitsa makhuva ka Yefutsa yamurumila.

²⁹Nalwo lwa Roho wu Mwami Nyasaye yinjila mu Yefutsa. Yakhalakanyila mu lusomo lwa Gileadi khandi mu lusomo lwa Manaase natsililila khutsia khutukha mu shivala shia Vaamoni

³⁰Yefutsa yisuuha khu Mwami Nyasaye navoola, “Niiva uliitsa khungurila Vaamoni,

³¹shindu shia niitsa khulola ni tsimoni tsianje nishirulanga mu inzu yanje khuvirila mu muliango shiliitsa khuva shiu Mwami Nyasaye. Niitsa khushikholela musango kwi shihanwa shiu khusambwa nimali khukuura Vaamoni.”

³²Yefutsa yasimukha natsia khukwana Vaamoni, Mwami Nyasaye navakuurila.

³³Yefutsa yavativitsa khali niyononyinya mataala makhomi kavili khuraanjila mu litaala lia Aroheri khutsia khutukha mu shivala shili himbi mu litaala lia Minitsi, khali khutukha havundu halaangwangwa Abeli Karamimu. Vandu vanyishi viirwa; khali Vaisraeli nivakuura Vaamoni.

³⁴Lwa Yefutsa yakalukha ingo wewe wa yamenyanga mu litaala lia Mizipa, mwana wewe wi shikhana yalolekha niyitsanga khumwakanila, nasieva khandi nakhuvanga manyanga. Neye wali mwana wewe wonyene.

³⁵Lwa Yefutsa yamulola, yarandula tsinguvu tsietsie nu vuveli mu mwoyo navoola, “Mwana wanje wi shikhana! Umbelelitsi mu mwoyo kwanje khandi nyakhananga vululu muno, shichila mali khwisuuha khale khu Mwami Nyasaye, khandi mbula khuli nyala khusilakhu.”

³⁶Mwana wi shikhana mwenoyo yamuvoolela, “Niiva wisuuhi khu Mwami Nyasaye, khola ka umuvoolele uliitsa khukhola khwinzi, lwa Mwami Nyasaye aliitsa khuvanzila Vaamoni, nivali vatsiku vovo.”

³⁷Navutswa yareeva tata wewe, “Nuyaanza ukholele shindu shia nyenyanga yishi. Lekha menyekhu wonyene khumieli chivili khu nzi khuchenda chenda mu vikulu khwikula halala na valina vaanje, shichila niitsa khukhutsa nindi mwana wi shikhana muchima.”

³⁸Yamuvoolela, “Unyala khutsia.” Tata wewe yamuhuchilila khutsia khumieli chivili. Ye halala na vaana vi shikhana vandi vasimukha nivatsia mu vikulu khandi nivikhulilayo shichila yali natsitsanga khukhutsa vuchila khutsiakhu lukhali lwosi, khandi vuchila mwana wosi.

³⁹Lwa mieli chivili chiali nichiakhavira, mwana wi shikhana mwenoyo yakalukha khulola tata wewe. Tata wewe yamukholela ka yali niyalaaka aliitsa khukholela Mwami Nyasaye. Mwana wi shikhana mwenoyo yakhutsa nashili muchima. Yishi nashio shiali shirula shiu mwiima kwa Vaisraeli

⁴⁰ndi vaana vi shikhana khutukha vatsitsenje khuchenda khumatukhu kane shia muhika khutsia khwikhula mwana wi shikhana wa Yefutsa warulanga mu lusomo lwa Gileadi.