Read tsotso VAKHALACHI 13 Bible Online

VAKHALACHI 13 - tsotso bible

VAKHALACHI 13

¹Vaisraeli vakhola vwoni imbeli wu Mwami Nyasaye, nalekha Vafilisti nivavamiha khumihika makhomi kane.

²Mumatukhu kenako, khwaliho nu mundu walaangwangwa Manoha khurula mu litaala lia Zora. Manoha yarulanga mu vandu vuluhia lwa Dani. Mukhali wewe yali mukuumba.

³Injelosi yu Mwami Nyasaye yalolekha khuye, nivoola, “Wali wakhaywa khwivula vaana, navutswa utsitsanga khuheelitsa wivuli mwana wi shiyayi.

⁴Uve mucheli uvuli khung'wakhu idivai inoho malwa, inoho khuliakhu shiukhulia shiakaywa;

⁵shichila utsitsanga khuvelekha wivuli mwana wi shiyayi. Mwana mwenoyo shialiitsa khuvekhwakhu nu luchembe tawe, shichila aliitsa khuva Munaziri, mwana watakaswa khu Nyasaye khuraanjila khulitukhu liu khwivulwa. Neye uliitsa khuraanga khuhonyinya Vaisraeli khurula khu Vafilisti.”

⁶Mukhali mwenoyo yasimukha natsia khuvoolelakhu musatsa wewe, “Mundu wa Nyasaye wakhandoleshela, khandi yang'ang'anga khuli injelosi ya Nyasaye. Nali nishili khureevakhu wa yali naruli, khali navula khumbolelakhu lira lielie.

⁷Navutswa yambolela ndi nzitsanga khuheelitsa, nu khwivula mwana wi shiyayi. Ambolele mbuli khung'wakhu idivai inoho malwa, inoho khuliakhu shiukhulia shiosi shiakaywa, shichila mwana mwenoyo aliitsa khukholwa khuva mutakatifu khu Nyasaye, khuli Munaziri khumatukhu koosi kaliitsa khuva nashili mwoyo.”

⁸Nalwo lwa Manoha yasaala khu Mwami Nyasaye, “Mwami Nyasaye, nuyaanza kalushitsa mundu wa Nyasaye wa waruma khwitsa khu khutsi khandi akhuvoolele ka khutushili khukhola khu mwana wi shiyayi mwenoyo lwa aliitsa khuva niyakhivulwa.”

⁹Nyasaye yakholela Manoha khuli yenyanga, ma injelosi yeye nikalukha khu mukhali wa Manoha, lwa yali niyikhale mu mulimi. Musatsa wewe Manoha shiyaliho himbi tawe.

¹⁰Mukhali mwenoyo yilukhaka vwangu, khandi navoolela musatsa wewe, “Lola! Mundu witsi khwinzi mukolovo kuvele, uloleshe khandi khwinzi.”

¹¹Manoha yasimukha nalonda mukhali wewe. Lwa Manoha yali niyakhatukha khu mundu mwenoyo, yamureeva, “Nivi mundu walomoloma khu mukhali wanje?” Yamuvoolela, “Nindio kali.”

¹²Manoha yareeva mundu mwenoyo, “Lwa makhuva ka uvooli kaliitsa khuva katoto, ni shina shia mwana wi shiyayi mwenoyo aliitsa khukhola? Ni limenya shina lia aliitsa khumenya?”

¹³Injelosi yu Mwami Nyasaye yavoolela Manoha, “Mukhali wowo aliitsa khukhola shia shindu shiosi shia namuvoolela akhole.

¹⁴Aliitsa khuvula khuliakhu shindu shiosi khurula khu musala ku musabibu, khung'wakhu idivai inoho malwa inoho khuliakhu shiukhulia shiosi shiakaywa. Aliitsa khukhola shia shindu shiosi shia muvoolela akhole.”

¹⁵Manoha yavoolela injelosi yu Mwami Nyasaye, “Tsililila khumenya hanu. Nu vulahi khukhusinzila shimeme shi imbuli.”

¹⁶Injelosi yu Mwami Nyasaye yavoolela Manoha, “Khali niiva unzikalilanga khurula hanu, shinzitsanga khuliakhu shiukhulia shioshio tawe; navutswa niiva uliitsa khusinza muruku ku khuhaana khuli shihanwa shiu khusambwa, uliitsa khukuhaana khu Mwami Nyasaye.”

¹⁷Manoha yamureeva “Khuvoolele lira liolio, nu khukhuhe luyali, lwa makhuva koko ka uvooli kaliitsa khuva katoto.”

¹⁸Injelosi yareeva Manoha, “Shichila shina wenyanga khumanya lira lianje? Ni lira liu khuchenyinya.”

¹⁹Manoha yavukula shimeme shi imbuli nende shihanwa shi imu, navikha khu vwaali vulwanda khuli shihanwa shiu Mwami Nyasaye wu kholanga mihinzilu chiu khuchenyinya.

²⁰Lwa tsimemo tsiu mulilu tsiatuumanga ikulu mwikulu khurula khu vwaali, injelosi yu Mwami Nyasaye yatsilililanga mu tsimemo tsienetso. Manoha nende mukhali wewe vakwa hasi mahunama, lwa valola kali nikakholeshe.

²¹Lwa injelosi yu Mwami Nyasaye yavula khulolekha khu Manoha nende mukhali wewe, Manoha yamanya vulahi vwene ndi yali injelosi yu Mwami Nyasaye.

²²Manoha yavoolela mukhali wewe, “Ni kilikali khutsitsanga khukhutsa, shichila khuloli Nyasaye!”

²³Navutswa mukhali wewe yavoolela Manoha, “Niiva Mwami Nyasaye yakhavele ni lienya liu khukhwiira, yakhambakhane khuhuchilila shihanwa shieru shiu khusambwa nende shihanwa shi imu. Khali yakhambakhane khukhumanyinya vindu yivi, inoho khukhuvoolelakhu makhuva khuli kenako.”

²⁴Mukhali mwenoyo yivula mwana wi shiyayi, namukulikha lira Samusoni. Mwana mwenoyo yali muhindila, khali Mwami Nyasaye namukasitsa.

²⁵Roho wu Mwami Nyasaye yatsililila khumuha tsingulu lwa yali namenyanga havundu halaangwangwa Mahanehi-dani, hakari ha mataala ka Zora nende Eshitaholi.