Read tsotso VAKHALACHI 15 Bible Online

VAKHALACHI 15 - tsotso bible

VAKHALACHI 15

¹Matukhu mati nikakhavira, Samusoni yasimukha natsia khucheniha mukhali wewe mumatukhu kukhuchesa inganu, khumuhilila shimeme shi imbuli. Samusoni yavoolela tata wewe, “Nyenyanga khutsia khwinjila mu inzu yu mukhali wanje.” Navutswa tata wu mukhali wewe yambakhana khumuhuchilila khwinjilamu.

²Tata wu mukhali mwenoyo yavoolela Samusoni, “Ni kilikali, nali ninganakani ndi wali wamwambakhana, nimuvukula nimba mulina wowo. Navutswa mwana wi shikhana wavo mushie ali ni likondo lilahi muno; nikanyalikha unyala khumuhila ave mukhali wowo, vuchila khumenya vutswa nuvula mukhali wosi.”

³Samusoni yavoola “Litukhu lia nunundi muvuli khumbukula mutamanu khu ka nzitsanga khukhola Vafilisti!”

⁴Samusoni yasimukha natsia khukumila vivwe tsimia tsivaka. Yavoha mishila chiavo halala navikha tsitaaha muvirimula, tsivili hali khavili.

⁵Yahaambitsa mulilu khu tsitaaha tsienetso niyinjilitsa vivwe vienevo mu milimi chi imu ya Vafilisti. Yakhola ndio, shikali nu khusamba imu ya vali nivachesi yonyene tawe, navutswa khali imu yali nishili mu milimi, khali misayituni.

⁶Lwa Vafilisti venya khumanya mundu ukholi kenako, vavoolelwa ndi Samusoni neye ukholi shichila kuuka wewe, mundu wi litaala lia Timuna yamunuula mukhali wewe nahaana khu mulina wewe. Nalwo lwa Vafilisti vasimukha nivatsia khusamba nu mulilu mukhali mwenoyo halala na tata wewe.

⁷Samusoni yavavoolela, “Niiva mukholi kenako, ni kilikali nzisuuhanga ndi niitsa khuvanzila ka munyi vene mukholi!”

⁸Yavinjilila navakwana khandi naviira voosi. Samusoni yakholomokha natsia khumenya muluhangaywa mu lwanda mu litaala lia Etamu.

⁹Vafilisti vitsa nivasimiikha maheemo kavo ku khumenyamu mu lusomo lwa Yuda, khandi nivakwana vandu vi litaala lia Lehi.

¹⁰Vandu vu lusomo lwa Yuda vavareeva, “Shichila shina mukhukwananga?” Vafilisti vavavoolela, “Khwitsi khukumila Samusoni khuli muvohe nu khumukhola khuli yakhukholanga khutsi.”

¹¹Vandu tsiheelefu tsivaka khurula mu lusomo lwa Yuda vasimukha nivatsia muluhangaywa mu lwanda lwa Etamu nivavoolela Samusoni, “Toto, ushili khumanyakhu ndi Vafilisti navo va khwamihanga? Makhuva shina kukhukholele?” Samusoni yavavoolela, “Mali khuvakhola vutswa makhuva ka vali nivakholele.”

¹²Vandu vu lusomo lwa Yuda vavoola, “Khwitsi hanu khukhuvoha, khu khure mu makhono ka Vafilisti.” Samusoni yavoola “Suuvilitsi ndi munyi vene muliitsa khulekha khunziira.”

¹³Vandu vu lusomo lwa Yuda vavoolela Samusoni, “Khwakhahuchilila. Khutsitsanga khukhuvoha vutswa, khukhure mu makhono kavo. Khuliitsa khulekha khukhwiira. Vavoha Samusoni ni mikoye chivili miyia nivamurulitsa muluhangaywa mu lwanda.”

¹⁴Lwa Samusoni yali niyakhatukha mu litaala lia Lehi, Vafilisti vitsa nivalaanjililanga khwilukhaka khumwakanila. Roho wu Mwami Nyasaye yamulomba khuva ni tsingulu, nakuutula mikoye chia vali nivamuvohi khu makhono keke khuli nu luvusi lulaalitswi nu mulilu.

¹⁵Samusoni yanyola shikuumba shi liino li ipunda yali niyakhutsa khu vwangu yuvu. Yinama hasi nashitoola, narumishila khwiira vandu iheelefu indala.

¹⁶Samusoni yimba lwimbo, “Narumishila shikuumba shi liino li ipunda khwiira vandu iheelefu indala; Narumishila shikuumba shi liino li ipunda khuvavunjitsa halala mu vituma.”

¹⁷Lwa yali niyakhamala khuvoola ndio, yasiuva shikuumba shienesho. Havundu henaho halaangwangwa Ramatsi Lehi.

¹⁸Samusoni yali nu vuluhu muno, nasaala khu Mwami Nyasaye navoola, “Nivi wangurila; nzitsanga khukhutsa nunundi shichila vuluhu, khali Vafilisti vangumile?”

¹⁹Nyasaye yahovola vwina hasi mu litaala lia Lehi, matsi nikarulamu. Samusoni yakang'wa naraanga khwihulila vulahi muno. Isieveye yeneyo yakulikhwa lira Hakore; [2] khali nunundi ishili mu litaala lia Lehi.

²⁰Samusoni yimilila Israeli khumihika makhomi kavili, lwa Vafilisti vali nivamihanga.