Read tsotso VAKHALACHI 16 Bible Online

VAKHALACHI 16 - tsotso bible

VAKHALACHI 16

¹Litukhu lindi, Samusoni yasimukha natsia mu litaala lia Gaza, nalolayo mukhali wakholanga vulaaya. Yakona naye mu vutukhu vwenovo.

²Vandu vi litaala lia Gaza vavoolelwa, “Samusoni ali hanu!” Vavotokhana havundu henaho, nivamulindilila ha shilivwa shi litaala lienelo mu vutukhu vwosi. Vahonjela vutukhu vwenovo vwosi, nivavoola, “Leshi khulindilile khutukha mu mavwevwe. Nalwo lwa khumwiira.”

³Navutswa Samusoni yakonayo khutukha hakari mu vutukhu. Yavukha mu tsindolo nakumila miliango chi shilivwa shi litaala, nashikhwesesa -- miliango, misala, likafuli, nende vindu viosi. Samusoni yitiukha vindu vienevo khu maveeka keke navihila ikulu wi shikulu shili khuluveka lundi lwi litaala lia Heburoni.

⁴Matukhu mati nikakhavira, Samusoni yayaanzana nu mukhali walaangwangwa Delila mu Luhoongo lwa Soreki.

⁵Vami varanu va Vafilisti vatsia khu Delila nivamuvoolela, “Kaatilitsa Samusoni akhuvoolele shivune, shichilanga nava ni tsingulu tsinyishi, khandi khuli khunyala khumukuura, khumuvohe ni mikoye, mavuli khuva ni tsingulu. Shia mulala khu khutsi aliitsa khukhuha vitonye imia indala likhomi na indala vi ifetsa.”

⁶Delila yavoolela Samusoni, “Nuyaanza mbolela ni shina shikhulombanga nuva ni tsingulu tsinyishi. Niiva mundu yakhenyi khukhuvoha ni mikoye, nu khukhuchehitsa tsingulu, yakhakhukholi ndina?”

⁷Samusoni yavoolela Delila, “Niiva valamboha ni mikoye miyia saba vuchila khuchiuminya, nava muteteshele khuli mundu wundi wosi.”

⁸Nalwo lwa vami va Vafilisti valerela Delila mikoye miyia saba vuchila khuchuminywa, navoheela Samusoni.

⁹Delila yali navisi vandu nivakoneshe havundu handi mukari mwi inzu. Yalaanga nalaanjilila, “Samusoni! Vafilisti vitsanga khukhukwana!” Navutswa Samusoni yakutuulanyinya mikoye chienecho, khuli luvusi lukutuukhanga lwa luvetsanga nu lwakhitiilitswa khu mulilu. Khali vakorwa shindu shimuheetsanga tsingulu.

¹⁰Nalwo lwa Delila yavoolela Samusoni, “Ukholele shihenye henye, lwa umbolele vuvehi. Hamba, mbolela nunundi khuli unyala khuvohwa ni mikoye.”

¹¹Samusoni yavoolela Delila, “Niiva mundu alamboha ni mikoye miyia chishili khurumikhwakhu, nyala khuva muteteshele khuli mundu wundi wosi.”

¹²Delila yavukula mikoye miyia navoha Samusoni nachio. Delila yalaanga, “Samusoni! Vafilisti vitsanga khukhukwana!” Vandu vali nivamukoneshe valindililanga havundu handi mukari mwi inzu. Navutswa Samusoni yakutuula mikoye chia vali nivamuvohi khu makhono keke nichikutuukha khuli luvusi lukutuukhanga.

¹³Delila yavoolela Samusoni, “Khali nunundi ushikholelanga shihenye henye, lwa umbolelanga vuvehi; mbolela khuli unyala khuvohwa ni mikoye.” Samusoni yavoolela Delila, “Niiva ulashiuka halala matude saba kali mu liswi lianje, ulikumile ni likamata, nyala khuva vutswa muteteshele khuli mundu wundi wosi.”

¹⁴Delila yahombelitsa Samusoni nakona, navukula matude saba kali mu liswi lielie nalikumila halala ni likamata. Yalikumilanyinya ni likamata nalaanga, “Samusoni! Vafilisti vitsanga khukhukwana!” Navutswa Samusoni yavukha mu tsindolo, nanyila nu mukhono liswi lielie lia vali nivashiuchi halala lienelo.

¹⁵Delila yavoolela Samusoni, “Unyala khuvoola ndina wanyanza, nivi uvuli khumanyinya mu vikholwa? Yulu nalwo lwa khavaka, lwa ukholi khuva muyiingwa, khandi khali ushili khumbolelakhu shindu shichilanga nuva ni tsingulu tsinyishi.”

¹⁶Delila yatsililila khumureeva reeva shia litukhu; Samusoni yihulila khuli nu mulwale, khali naavwa tsingulu khurulana khu mareevo ka Delila yamureevanga kenako;

¹⁷namuvoolela katoto lukhumalilikha. Samusoni yavoolela Delila, “Shili khuvekwakhu nu luchembe liswi lianje. Natakaswa khu Nyasaye khuli Munaziri khuraanjila khulitukhu lia nivulwa. Niiva nyala khuvekwa liswi, nakoritsa tsingulu tsianje, nu khuva mundu muteteshele khuli mundu wundi wosi.”

¹⁸Lwa Delila yamanya ndi Samusoni umuvoolele shia shindu shiosi, yaruma likhuva khu vami va Vafilisti, navoola, “Numuyaanza hambi lukhumalilikha yulu; shichila umbolele katoto.” Vami venavo vakalukha khuye nivali ni ifetsa.

¹⁹Delila yahombelitsa Samusoni khukona mu makulu keke, nalaanga mundu, wamanya naveka matude saba kali nikali mu liswi lia Samusoni. Delila yaraanga khumunyashitsa, khali tsingulu tsietsie nitsikora.

²⁰Delila yalaanga, “Samusoni! Vafilisti vitsanga khukhukwana!” Samusoni yavukha, nakanakana, “Nakutuulanyinya mikoye, khandi mbe muvoholole, khuli mbetsanga shia khase khosi.” Samusoni yakorwa khumanya ndi Mwami Nyasaye umuleshi.

²¹Vafilisti vakumila Samusoni, nivamuhutuula tsimoni tsietsie. Vafilisti venavo vamuhila mu litaala lia Gaza, nivamuvoha ni minyololo chiu mukasa. Vamuha muhinzilu kukhusia muluchina lu mucheela.

²²Navutswa liswi lielie liaraanga khumeela khandi lwa liali niliavekwa.

²³Vami va Vafilisti vakanila halala khukholela nyasaye wavo walaangwangwa Dagoni musango khandi khwikhoya, nivavoola, “Khali nyasaye weru ukhuheele tsingulu tsiu khukuura mutsiku weru ulaangwangwa Samusoni!”

²⁴Lwa vandu valola Samusoni, vitsominya nyasaye wavo, nivavoola, “Khali nyasaye weru ukhuheele tsingulu tsiu khukuura mutsiku weru ulaangwangwa Samusoni, wali niyononyinya shivala shieru, niyiira vandu vanyishi.”

²⁵Lwa Vafilisti vali nivashiyaanzililanga, vavoola, “Leri Samusoni ilwanyi khukhukholela muvayo khu khuyaanze.” Khulwa yako, varulitsa Samusoni mucheela navavayila nivayaanza. Vasinjilitsa Samusoni hakari mutsirilu,

²⁶ma Samusoni navoolela murumishi wali namukumile mukhono kwekwe, “Lekha ndili makhono kaanje khu tsirilu tsiatiila mumbakho. Nyenyanga khwitiila khutsio.”

²⁷Vandu vanyishi muno vasatsa nende vakhali vali nivitsuli mwenomo; khali vami varanu va Vafilisti valiho khandi, khandi khwaliho na vandu himbi tsiheelefu tsivaka vasatsa nende vakhali mu mumbakho kwenoko ikulu, nivaheenzanga khuli Samusoni yavasievelanga.

²⁸Nalwo lwa Samusoni yasaala, “Mwami Nyasaye Witsingulu tsinyishi khuvira vindu viosi, nuyaanza unzitsushitse. Nyasaye, nuyaanza ngalushitsila khandi tsingulu tsianje, khu khuvirila munjila yivi mbanzile Vafilisti shichila vambutuula tsimoni tsianje.”

²⁹Samusoni yakumila tsirilu tsivili tsia hakari tsitiilanga mumbakho. Lwa yakumila mukhono mulala khu shia irilu, yatsilumbanyinya

³⁰nalaanjilila, “Leshi khali mbe nikhutsanga na Vafilisti!” Samusoni yakhwesanyinya ni tsingulu tsietsie tsiosi, ma mumbakho kwenoko nu kukwa khu vami varanu venavo halala na vandu vandi voosi vali nivalimu. Samusoni yiira vandu vanyishi muno lwa yali niyakhakhutsa khuvira vandu vayiira lwa yali nashili mwoyo.

³¹Nalwo lwa vamwavo veve nende vandu vandi vu mu inzu ya yivulwamu vitsa khuvukula mmbili kwekwe. Vamuvukula, nivamurulitsaho, nivamuyeveela mu shilindwa shili hakari ha mataala ka Zora nende Eshitaholi, havundu ha tata wewe Manoha yali niyayeveelwa. Samusoni yali mukhalachi wa Israeli khumihika makhomi kavili.