Read tsotso VAKHALACHI 17 Bible Online

VAKHALACHI 17 - tsotso bible

VAKHALACHI 17

¹Litukhu lindi, khwaliho nu mundu wamenyanga mu shivala shi vikulu shia Efurahimu, walaangwangwa Mika.

²Mika yavoolela mama wewe, “Lwa mundu wundi vutswa yakhwivila vitonye iheelefu indala ni imia indala vi ifetsa, wamulaama. Mbulili nulaamanga. Lola, ndi ni ifetsa yeneyo. Ninzi wavukula ifetsa yeneyo.” Mama wewe yamuvoolela, “Mwana wanje, Mwami Nyasaye akhukasitse!”

³Mika yakalushitsila mama wewe ifetsa yeneyo, mama wewe navoola, “Inzi mwene kholanga ifetsa yiyi khuva indakatifu khu Mwami Nyasaye, khulomba shifwanani khu musala shia vekhwakhu ifetsa. Nzitsanga khukhukalushitsila ifetsa yeneyo.”

⁴Mika yakalushitsila mama wewe ifetsa yeneyo. Mama wewe yavukula vitonye tsimia tsivili vi ifetsa naha mwiraanyi wi vivia, walomba shifwanani, khu musala, nashivekha ifetsa. Shifwanani shienesho shiavikhwa mu inzu ya Mika.

⁵Mika uyu yali na havundu hehe mwene wa yasaalilanga. Yalomba khandi shiambala nende musambwa, khali narovola mulala khu vaana veve vi shiyayi khuva musalisi.

⁶Mumatukhu kenako, khwali nu khuvula mwami mu Israeli; shia mundu wosi yakholanga ka mwene ayaanzi khukhola.

⁷Mumatukhu kenako, khwaliho nu muyayi muvukha khurula mu vandu vu lwivulu lwa Levi wali niyamenyakhu mu litaala lia Betselehemu mu lusomo lwa Yuda.

⁸Mundu mwenoyo yarula Betselehemu mu lusomo lwa Yuda, natsia khukhava havundu handi hanyala khumenya. Lwa yali nachenda chendanga, yatukha khu inzu ya Mika mu shivala shi vikulu shia Efurahimu.

⁹Mika yareeva mundu mwenoyo, “Ni hena wa urulanga?” Mundu mwenoyo yamuvoolela, “Ndi mundu urulanga mu vandu vu lwivulu lwa Levi mu litaala lia Betselehemu mu lusomo lwa Yuda. Njendanga nikhava havundu hanyala khumenya.”

¹⁰Mika yavoolela mundu mwenoyo, “Umenye ninzi. Ulava khuli tata wanje khandi musalisi wanje. Niitsa khukhurunganga vitonye likhomi vi ifetsa khu shia muhika, tsinguvu tsiotsio nende shiukhulia.”

¹¹Mundu mwenoyo yahuchilila khumenya na Mika, khali Mika namuvukula khuli mwana wewe.

¹²Mika yarovola mundu mwenoyo khuva khuli musalisi wewe, namenya mu inzu ya Mika.

¹³Nalwo lwa Mika yavoola, “Lwa ndi nu musalisi khurula mu vandu vu lwivulu lwa Levi, manyi ndi Mwami Nyasaye atsitsanga khukhola khuva nu vuhinda.”