Read tsotso VAKHALACHI 8 Bible Online

VAKHALACHI 8 - tsotso bible

VAKHALACHI 8

¹Nalwo lwa vandu vuluhia lwa Efurahimu vareeva Gidioni, “Shichila shina nuvula khukhulaanga lwa wasimukha nutsia khukwana Vamidiani? Shichila shina wakhukhola ndio? Vamulemba nu vululu shichila kenako.”

²Navutswa Gidioni yavavoolela, “Ni shina shia nakhola shinyala khusasanyinywa khu shia munyi mwakhakhola? Khali mati ka munyi vandu vuluhia lwa Efurahimu mwakhola, kali nu vukhonyi khuvira ka vandu voosi vi inzu yandulamu vakholi.

³Khali ndio, khuvirila mu tsingulu tsia Nyasaye mwakhiira vimilili vavili va Vamidiani, nivali Orebu nende Zehebu. Ni shindu shina shia inzi kholi shinyala khusasanyinywa khu kenako?” Lwa yali namali khuvoola kenako, valekha khumulolela vurima.

⁴Khali niiva Gidioni nende vandu veve tsimia tsivaka vali nivakhavwa tsingulu, vatsililila khuhitsanyinya vatsiku, vatukha khu Muchela kwa Yorodani, nivambukha.

⁵Gidioni yavoolela vandu vi litaala lia Sukotsi, “Numuyaanza muheekhu vasikali vaanje mikati chiu khulia. Vavwele tsingulu, ninzi shitsilililanga khuhitsanyinya vami vavili va Vamidiani, nivali Zeba nende Zalumuna.”

⁶Navutswa vimilili va vandu vi litaala lia Sukotsi vavoola, “Shichila shina wenyanga khuhe vasikali vovo shiukhulia? Khali ushili khukumila Zeba nende Zalumuna.”

⁷Gidioni yavoola “Nu vulahi muno! Lwa Mwami ava niyakhandela mu makhono kaanje Zeba nende Zalumuna, niitsa khumurandula na mavwa ku mu shiangalangwi!”

⁸Gidioni yarulaho natsia mu litaala lia Penueli khandi navavoolela vamukhonye, navutswa vandu vi litaala lia Penueli vamuvoolela makhuva malala mele khuli vandu vi litaala lia Sukotsi vali nivamuvoolele.

⁹Gidioni yavavoolela, “Lwa nzitsanga khukalukha mu milembe, niitsa khusambulanyinya munaara kwenyu yuku!”

¹⁰Zeba nende Zalumuna halala na vasikali vavo vali nivali mu litaala lia Karikori. Khurula mu vasikali voosi va vandu vi tsimbia tsiu mu shiangalangwi, ni vasikali tsiheelefu likhomi na varanu navo vihonolokha; vasikali tsiheelefu imia indala na makhomi kavili navo viirwa.

¹¹Gidioni yatikulushila khu muhaanda kuli khundulu khwi shiangalangwi, khuluveka luli ivukwi wi litaala lia Noba nende Yogubeha, naseera vasikali vavo vuchila khumanyakhu shindu shiosi.

¹²Vami vavili va Vamidiani, nivali Zeba nende Zalumuna vilukha. Navutswa yavahitsanyinya navakumila; khali natechelitsa vasikali vavo.

¹³Lwa Gidioni mwana wa Yohashi yali narulanga muliihe, navirilanga khunjila ya Heresi,

¹⁴yakumila mwana wi shiyayi wi litaala lia Sukotsi, namureeva mareevo. Mwana wi shiyayi mwenoyo yamuhandichila mira makhomi saba na saba ka vimilili vi litaala lia Sukotsi.

¹⁵Gidioni yasimukha natsia khu vimilili vi litaala lia Sukotsi, navavoolela, “Munyala khwitsushitsa lwa mwambakhana khukhonya? Mwavoola shiumunyala khuha vasikali vaanje vali nivavwele tsingulu shiukhulia shiosi tawe, shichila nali nishili khukumila Zeba nende Zalumuna. Nu vulahi, navo yava!”

¹⁶Yavukula mavwa nende minyenya chiu mu shiangalangwi, nasalilitsila vimilili vi litaala lia Sukotsi.

¹⁷Yasambulanyinya khandi munaara kwi litaala lia Penueli, khali niyiira vandu mu litaala lienelo.

¹⁸Nalwo lwa Gidioni yareeva Zeba nende Zahumuna, “Ni vandu lukanu shina vamwiira mu litaala lia Tabori?” Vavoolela Gidioni, “Musasananga navo -- shia mulala khuvo yali ni likoondo khuli liu mwana wu mwami.”

¹⁹Gidioni yavoola “Yavo vali vamwavo vaanje, vaana va mama wanje yivula. Nzisuuhanga khuvirila khu Mwami Nyasaye uli mwoyo ndi niiva wakhaveleshi vave mwoyo, shimbele namwiira munyi tawe.”

²⁰Gidioni yavoolela mwana wewe mukhulundu walaangwangwa Yetseri, “Sinjila uviiri!” Navutswa Yetseri yambakhana khurulitsa shivavi shieshie, shichila yali nashili mwana wi shiyayi khandi yali waria.

²¹Nalwo lwa Zeba nende Zalumuna vavoolela Gidioni, “Hamba, khakhwiiri yivi mwene. ‘Mundu musatsa nu musatsa.’ ” Gidioni yaviira voosi navukula vindu viali ni viasiaywa mwing'ori mwi tsingamia tsiavo.

²²Vaisraeli vavoolela Gidioni, “Khwamihi -- yivi, nende vaana vovo halala na vitsukhulu vovo; lwa umali khukhuhonyinya khurula khu Vamidiani.”

²³Gidioni yavavoolela, “Shinzitsanga khumwamiha inoho khali vaana vaanje tawe. Mwami Nyasaye neye utsitsanga khumwamiha munyi.”

²⁴Gidioni yavavoolela, “Lekha mureeve shindu shia nyenyanga mukholele. Shia mulala khu munyi khutukha ambe matemba ka yavukula.” (Vamidiani venavo, shichila vali Vaishimaheli lwa vamenyanga mu shiangalangwi, vifwalanga matemba kalombwa khu itsahabu.)

²⁵Vavoolela Gidioni, “Khutsitsanga khukhuha nu mwoyo mulala.” Vaala inguvu hasi, khandi shia mundu nasiuvakhu matemba ka yali niyavukula.

²⁶Matemba kali nikalombwa khu itsahabu ka Gidioni yanyola kali himbi nu vulitoho tsikilo makhomi kavili, vuchila khuvalitsilamu vindu vi tsilaanji lukanu, matongolo nende tsinguvu tsia sambarau tsiu Mwami wa Midiani yifwalanga, inoho tsikola tsiali ni tsiavohwa khu mang'ori ki tsingamia tsiavo.

²⁷Gidioni yalomba shifwanani khurula khu itsahabu, nashivikha mu litaala lingo wa yarulanga lialaangwangwa Ofura. Vaisraeli vambakhana khuva vasuuvilwa imbeli wa Nyasaye nivasaala khu shifwanani shienesho. Nakwo kwali mureeko khu Gidioni nende vandu vi inzu yeye.

²⁸Shivala shia Midiani shiakuurwa na Vaisraeli vuchila khukwanakhu Vaisraeli. Vandu vamenya mu milembe khumihika makhomi kane, khutukha lwa Gidioni yakhutsa.

²⁹Gidioni yasimukha nakalukha khutsia khumenya ingo wewe.

³⁰Gidioni yali na vaana makhomi saba vi shiyayi, shichila yali na vakhali vanyishi.

³¹Yali nu mukhali mumenyinywa mu litaala lia Shekemu; yamwivulila mwana wi shiyayi, namukulikha lira Abimeleki.

³²Gidioni mwana wa Yohashi yakhutsa niyahindila nayeveelwa mu shilindwa shia tata wewe Yohashi, mu litaala lia Ofura, litaala lia vandu vi inzu ya Abiazari.

³³Lwa Gidioni yali namali khukhutsa, Vaisraeli vambakhana khuva vasuuvilwa khu Nyasaye, khali nivasaala khu Mabaali. Valomba Baali wi lilakano khuva nyasaye wavo;

³⁴nivambakhana khwitsushitsa Mwami Nyasaye, uli Nyasaye wavo, wa vahonyinya khurula khu vatsiku vavo voosi vamenyanga himbi khuvo.

³⁵Vakhaywa khusanditsa vandu vi inzu ya Gidioni, khulondokhana khu mihinzilu milahi chiosi chia yali niyakholela Israeli.