Read tsotso YUDA 1 Bible Online

YUDA 1 - tsotso bible

YUDA 1

¹Ninzi Yuda, murumishi wa Yesu Kristo, nindi amwavo Yakobo. Mbandichilanga vandu va Nyasaye yalaanga, vali mwoyo khuvirila mu vuyaanzi vwa Nyasaye, uli Tata, khandi mu vulindi vwa Yesu Kristo.

²Tsimbavasi, milembe nende vuyaanzi mu vunyishi vive na munyi.

³Valina vaanje va nayaanza, nali ni lienya liu khumuhandichila khulondokhana khu vuhonyinyi vwa khusanganga shilala na munyi, lwa nalola nu vulahi khumuhandichila lulala nalwo lwene, khwenya mutsililile ni tsingulu khumenya khulondokhana khu lisuuvila lia Nyasaye yamala khuha vandu veve khumatukhu koosi.

⁴Vandu valala vatamanu vakorwa Nyasaye, vamali khwinjila mu khutsi muvwivisi, navo ni vandu vononyinyanga makhuva khulondokhana khu tsimbavasi tsia Nyasaye weru, khulu khwenya khunyola shivune shinyala khuvashinga mu likhola mwiima mutamanu kwi shifwavi; khandi vambakhananga Yesu Kristo, khuli lwa ali muruchi weru wonyene vutswa khandi Mwami. Mumatukhu kakhale, Mahandiko Matakatifu kali ka yivaala khuli likhalachilwa liavo liliitsa khwikholekha.

⁵Khali niiva munyi voosi mwali mwamanya yaka koosi, nzikombanga khumwitsushitsa munjila yatoto khuli Mwami Nyasaye yahonyinya vandu veve khurula mu shivala shia Misri; navutswa matukhu mati ni kakhavirakhu yativitsa yavo vambakhana khusuuvila muye.

⁶Mwitsushitse makhuva khulondokhana khu tsinjelosi tsiambakhana khutsililila khusinjila mu vwiyangu vwatsio, khandi nitsilekha havundu ha tsiali nitsiaheelwa khumenya. Nyasaye watsivoha ni minyololo mihika ni mihika, khandi watsivikha mu vwina vwi shisuundi khutukha Khulitukhu likali liu khukhalachilwa.

⁷Mwitsushitse mataala ka Sodomu nende Gomora, khali mataala kali himbi khuko, wa vandu vakhola mwiima khuli kwi tsinjelosi tsienetso tsiakhola; manivakhola mwiima mutamanu kwi shifwavi ku khukona halala vene khuvene nende miima chindi chi shifwavi chia vandu venyekhanga valeshe khukhola, nivasalilitswa lisalila lirulanga khu mulilu kwi mihika ni mihika khuva khuli shimanyilu shiu khuchelihitswa shia havulavu khu voosi.

⁸Munjila indala yeneyo khandi, vandu venavo vali na malolo kachilanga nivononyinya mivili chiavo. Valechelitsanga vunyali vwa Nyasaye, nivanyeka vilombe viaheelwa vukhumi mwikulu.

⁹Navutswa khali injelosi ingali Mikaheli, lwa yahangalitsana mulilomoloma ni Ibilisi, shichila mmbili kwa Musa, shiyachelitsakhu khulomoloma vindu vitamanu khulondokhana khuye tawe; navutswa yavoola, “Mwami Nyasaye akhukondeshele!”

¹⁰Navutswa vandu yava vanyekanga shia shindu shiosi, shia vakorwa shindu shiosi khulondokhanakhu; navutswa vindu via vamanya vuchila khukanakanakhu, khuli tsinyama tsiumbulimu, navio vindu vilala viele vivativitsanga.

¹¹Wooyi! Vali khuvutiinyu! Valonda mushilenje shia Kaini, khandi shichila tsisenti vahuchilila khukhola vindu vitamanu via Balamu yakholanga. Vahingana khuli Kora yali niyahingana, khandi khuli ye, valiitsa khutivitswa.

¹²Vandu venavo vavula tsisoni, vali khuli vibala vimwamu mulilia lienyu lia halala. Vilindanga vene munjila indahi. Vali khuli malesi ki imbuutsa ikahuutsanga, navutswa vuchila khulera imbula. Vali khuli misala chilekhanga khwama matunda, khali niiva nu mumatukhu ku khwama; khandi khuli misala chi miili chiarinyukha khandi chiakhutsa.

¹³Vali khuli maruundu ku khurishitsa mu inyanza, ni vikholwa viavo vi tsisoni vimanyinyanga khuli ni lihuulu. Vali khuli tsinyining'ini tsitsitsanga iyi neyo, tsia Nyasaye yalombela vwiyangu vwi mihika ni mihika mu vwina vwi shisuundi.

¹⁴Enoko neye mwitsukhulu watoto wa sita, khurula khu vitsukhulu va Adamu, waprofeta mumatukhu kakhale khulondokhana khuvo, navoola, “Mwami aliitsa khwitsa ni tsinjelosi tsietsie tsindakatifu mu tsiheelefu tsinyishi

¹⁵khukhalachila vandu voosi; khandi khuvayaala, shichila vikholwa viavo vitamanu via vandu vatamanu vakorwa Nyasaye vakhola, khandi khulondokhana khu vindu vitamanu via vandu vatamanu vakorwa Nyasaye valomoloma khulondokhana khuye.”

¹⁶Vandu venavo vilililanga, khandi vatulananga vene khuvene; valondanga likomba liavo litamanu; vichinjililanga vene khandi varumishilanga vupele mulilomoloma liavo khu vandi, khu vanyole vindu via venyanga vene.

¹⁷Navutswa valina vaanje, mwitsushitse makhuva ka varumwa vu Mwami weru Yesu Kristo vamuvoolela mumatukhu kavira.

¹⁸Vamuvoolela, “Mumatukhu kukhumalilikha, vandu valiitsa khwitsa nivamukholela shihenye henye, vandu valondanga likomba liavo liu mmbili liu khukhola vwoni.”

¹⁹Yava navo vandu vachilanga vwavukhani nu vuvaho, valondanga likomba liavo li mivili, shichila Roho shiali neye uvimililanga tawe.

²⁰Navutswa munyi valina vaanje, mutsililile khwiyumbakha vene khuvene mu lisuuvila lienyu litakatifu, khandi musaale khuvirila mu tsingulu tsia Roho Mutakatifu;

²¹ma mutsililile khuva mwoyo mu vuyaanzi vwa Nyasaye, numulindilila Mwami weru Yesu Kristo khuvirila mu tsimbavasi tsietsie, khumuha vulamu vwi mihika ni mihika.

²²Mulolele tsimbavasi yavo vahaya hayanga.

²³Muhonyinyi vandi, khuli unyala khuhonyinya mundu khurula mu mulilu. Muvele tsimbavasi vandi khuvirila muliria -- khali mulekhane ni tsinguvu tsiavo tsiononyinywa ni likomba liavo liu mmbili liu khukhola vwoni.

²⁴Khulwa yako, woyo uli nu vunyali vu khumulinda khuvula khukuurwa, nu khumukhola khuvula khuva nu vutamanu vwosi, khusinjila imbeli wu vukhumi vwevwe nu vuyaanzi vunyishi

²⁵khu Nyasaye wonyene, uli Muhonyinyi weru khuvirila mu Mwami weru Yesu Kristo, aheelwi vukhumi, luyali, tsingulu, nende vunyali, khuraanjila mumatukhu koosi kavira, nunundi khandi mihika ni mihika! Amina.