Read tsotso LIKHUNULILWA 10 Bible Online

LIKHUNULILWA 10 - tsotso bible

LIKHUNULILWA 10

¹Nalwo lwa nalola injelosi yindi yu vunyali vunyishi, niyitsanga hasi khurula mwikulu. Yali hakari mu malesi khandi luhembo lwali nu luvotokhane khu murwi kwekwe. Vweni vwayo vwang'ang'a vulavu vunyishi khuli liuva, khandi vilenje viayo viali khuli tsimemo tsiu mulilu.

²Yali ni shitabu shitititi nishikushi mu mukhono kwekwe. Yaseena shilenje shieshie shisatsa khu inyanza, khandi shilenje shieshie shikhali khulilova,

³nilaanga nu mwoyo mukali kwahulilikhana khuli tsisimba ni tsihumanga. Niyakhamala khulaanjilila, makulu saba kahilikana.

⁴Lwa likulu liali nilimali khuhilikana hali saba, nali nindi himbi khuhandika; navutswa nahulila mwoyo khurula mwikulu nu kuvoolanga, “Vikha mu vwivisi makhuva kahulilikhane, khurula khu likulu lihilikane hali saba; lekha khukahandikakhu!”

⁵Injelosi ya nalola nisinjilitsi shilenje shiayo shilala khu inyanza, na shilenje shindi khulilova, yachinguula ikulu mukhono kwayo musatsa,

⁶niyisuuha khuvirila mu lira lia Nyasaye, uli mwoyo mihika ni mihika, waloonga likulu, lilova, nende inyanza, halala ni vindu viosi vilimu. Injelosi yeneyo yavoola, “Isaa yu khucheleva imali khuvwa!

⁷Navutswa lwa injelosi ya saba iliitsa khukhuva shisiliva shiayo; nalwo lwa Nyasaye aliitsa khurweshitsa inganakani yeye yaviswa, khuli yali niyavoolela varumishi veve, nivali vaprofeti aliitsa khukhola.”

⁸Nalwo lwa mwoyo kwa nali ninahulila khurula mwikulu kwalomoloma khwinzi khandi, nu kuvoola, “Simukha utsi khuvukula shitabu shimali khwikukha shili mu mukhono kwi injelosi, isinjile shilenje shilala khu inyanza, na shilenje shindi khulilova.”

⁹Nasimukha ninzia khulola injelosi yeneyo, manichireeva imbe shitabu shitititi shienesho. Injelosi yeneyo yambolela, “Vukula shitabu shitititi yishi, ushilii; shiliitsa khuva shilulu munda mwomwo; navutswa shiliitsa khuva shinuulu muno khuli vushi mu munwa mwomwo.”

¹⁰Navukula shitabu shitititi shienesho, khurula mu mukhono kwi injelosi yeneyo nindia. Shiali shinuulu muno khuli vushi mu munwa mwanje. Navutswa nimali khumiila shitabu shienesho, shiamanya nishikwa shilulu munda mwanje.

¹¹Nalwo lwa navoolelwa, “Simukha utsi khwilwatsila vandu vi tsimbia tsindi tsiosi, tsinzivulu lukanu na lukanu, tsinomolomo lukanu na lukanu, khandi vami likhuva lia Nyasaye.”